ବରଗଡ଼ ଅଫିସ,୧୦ା୩: ବରଗଡ଼ ଜିଲା ଗାଇସିଲେଟ ଥାନା ଶରଧାପାଲି କଲେଜ ସମ୍ମୁଖରେ ଗୁରୁବାର ଏକ ସଡ଼କ ଦୁର୍ଘଟଣା ଘଟିଛି। ଏକ ଟ୍ୟାଙ୍କର (ନଂ-ଓଡି ୧୫ଏଫ ୨୯୭୭) ଚାପାରେ ଜଣେ କଲେଜ ଛାତ୍ରୀଙ୍କ ମୃତ୍ୟୁ ହୋଇଛି। ମୃତକ ଜଣକ ବଲାଙ୍ଗୀର ଜିଲା ଲୋଇସିଂହା ଥାନା ଭରସୁଜା କଲେଜର ଯୁକ୍ତଦୁଇ ଛାତ୍ରୀ ନୀଳନ୍ଦ୍ରୀ ନାୟକ । ସେ ବରଗଡ଼ ଜିଲା ଗାଇସିଲେଟ ବ୍ଲକ ନୁଆପାଲି ଗ୍ରାମର ସାଧୁ ନାୟକଙ୍କ ଝିଅ ଅଟନ୍ତି। ସାଇକେଲ ଯୋଗେ କଲେଜରୁ ଘରକୁ ଫେରିବା ବାଟରେ ଶରଧାପାଲି କଲେଜ ଆଗରେ ଟ୍ୟାଙ୍କର ତାଙ୍କ ଉପରକୁ ଚଢ଼ି ଯାଇଥିଲା। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ଖବର ପାଇ ପୋଲିସ ସେଠାକୁ ପହଞ୍ଚିଥିଲା ଏବଂ ଉତ୍ତେଜନା ପ୍ରକାଶ ପାଇବା ସହିତ ପୋଲିସ ଓ ଲୋକଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଚାପା ଉତ୍ତେଜନା ଲାଗି ରହିଥିବା ବେଳେ ଘଟଣାସ୍ଥଳରେ ବ୍ୟାପକ ପୋଲିସ ମୁତୟନ ରହିଥିବା ସୂଚନା ମିଳିଛି।
