ଢେଙ୍କାନାଳ/ପରଜଙ୍ଗ, ୮।୭(ରତନ ନାୟାର/ନିଗମାନନ୍ଦ ଦଳବେହେରା): ସବୁ କଳ୍ପନା ଜଳ୍ପନାର ଅନ୍ତଘଟିଛି। ରାଜ୍ୟ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଢେଙ୍କାନାଳ ଜିଲା ବିଜେଡି ସଭାପତି ଭାବେ ପରଜଙ୍ଗ ବିଧାୟକ ଡା. ନୃସିଂହ ଚରଣ ସାହୁଙ୍କୁ ଶୁକ୍ରବାର ଚୟନ କରିଛନ୍ତି। ଜିଲା ବିଜେଡି କାର୍ଯ୍ୟକାରୀ ସଭାପତି ଭାବେ ଯୁବନେତା ଦେବୀପ୍ରସାଦ ଭୂତିଆଙ୍କୁ ନିଯୁକ୍ତି ଦିଆଯାଇଛି। ସାଧାରଣ ନିର୍ବାଚନ ପୂର୍ବରୁ ଜିଲା ସଭାପତି ଭଳି ଗୁରୁତ୍ୱପୂର୍ଣ୍ଣ ପଦବୀରେ ପରିବର୍ତ୍ତନ ବିଧାୟକ ଡା. ସାହୁଙ୍କ ପ୍ରତି ରାଜ୍ୟ ନେତୃତ୍ୱଙ୍କ ଆସ୍ଥାର ପ୍ରତିଫଳନ ବୋଲି କୁହାଯାଉଛି।
କାମାକ୍ଷାନଗର ବିଧାୟକ ତଥା ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକଙ୍କ ପୂର୍ବରୁ ଏହି ପଦବୀରେ ବିଧାୟକ ଡା. ନୃସିଂହଚରଣ ଥିଲେ। ସେତେବେଳେ ରାଜ୍ୟ ମନ୍ତ୍ରୀମଣ୍ଡଳରେ ସେ ସଦସ୍ୟ ଥିଲେ। ହେଲେ କିଛିଦିନ ଧରି ଜିଲା ସଭାପତି ବଦଳିବେ ବୋଲି ଜୋର୍ଦାର ଚର୍ଚ୍ଚା ହେଉଥିଲା। ଏହି ଦୌଡ଼ରେ ବିଧାୟକ ସୁଧୀର ସାମଲଙ୍କ ନାମ ମଧ୍ୟ ଉଠିଥିଲା। କିନ୍ତୁ ସେ ବରଗଡ ଜିଲା ପାଇଁ ଦଳୀୟ ପର୍ଯ୍ୟବେକ୍ଷକ ରହିଥିବାରୁ ଡା. ନୃସିଂହଙ୍କୁ ନୂତନ ସଭାପତି ଭାବେ ଘୋଷଣା କରାଯାଇଛି। ସେହିପରି ଜିଲା ବିଜେଡି କାର୍ଯ୍ୟକାରୀ ସଭାପତି ଭାବେ ନିଯୁକ୍ତି ପାଇଥିବା ଦେବୀ ପ୍ରସାଦ ଭୂତିଆ ଏବେ ରାଜ୍ୟ ବନ ନିଗମର ଉପଦେଷ୍ଟା ରହିଛନ୍ତି। ସେ ୨୦୦୧ରୁ ୨୦୧୧ ଯାଏ ଜିଲା ଯୁବ ବିଜେଡି ସଭାପତି ଏବଂ ୨୦୧୧ରୁ ୨୦୧୯ ପର୍ଯ୍ୟନ୍ତ ରାଜ୍ୟ ଯୁବ ବିଜେଡି ସମ୍ପାଦକ ରହିଥିଲେ। ଏଥିସହିତ ଜିଲା ଜୀବନବିନ୍ଦୁ କାର୍ଯ୍ୟକ୍ରମର ଜିଲା ସଂଯୋଜକ, ଢେଙ୍କାନାଳ ଆଞ୍ଚଳିକ ଉନ୍ନୟନ ସଂସ୍ଥାର ଅଧ୍ୟକ୍ଷ ଭଳି ଗୁରୁତ୍ୱପୂର୍ଣ୍ଣ ପଦପଦବୀରେ ଥିଲେ। ନୂତନ ଜିଲା ସଭାପତିଙ୍କୁ ପରଜଙ୍ଗ ବ୍ଲକ ଆତ୍ମା ଅଧ୍ୟକ୍ଷ ଅକ୍ଷୟ କୁମାର ବେହେରା, ବ୍ଲକ ବିଜେଡି ସଭାପତି କୃଷ୍ଣଚନ୍ଦ୍ର ମହାନ୍ତି, ଯୁବ ବିଜେଡି ସଭାପତି ସୁବ୍ରତ ଦାସ, ଛାତ୍ର ବିଜେଡି ସଭାପତି ପ୍ରିୟଜିତ ସାମଲ, ଜିଲା ପରିଷଦ ଉପସଭାନେତ୍ରୀ ବିଳାସିନୀ ସେଠୀ, କଙ୍କଡ଼ାହାଡ଼ ଯୁବ ବିଜେଡି ସଭାପତି ତାପସ ପାଣି ପ୍ରମୁଖ ତାଙ୍କ ବାସଭବନରେ ଭେଟି ଶୁଭେଚ୍ଛା ଜଣାଇଛନ୍ତି।
ଜିଲା ସଭାପତି ଭାବେ ନିଯୁକ୍ତି ହେବା ପରେ ବିଧାୟକ ଡା. ସାହୁ କହିଛନ୍ତି, ମୁଖ୍ୟମନ୍ତ୍ରୀ ତାଙ୍କ ଉପରେ ଭରସା କରିଥିବାରୁ ସେ ତାଙ୍କ ନିକଟରେ କୃତଜ୍ଞ। ଆଗକୁ ସାଧାରଣ ନିର୍ବାଚନ ଥିବାରୁ ଦଳୀୟ ସଙ୍ଗଠନକୁ ସୁଦୃଢ଼ କରାଯିବ। ଆସନ୍ତା ନିର୍ବାଚନରେ ଜିଲାର ସମସ୍ତ ୪ ବିଧାନସଭା ଏବଂ ଗୋଟିଏ ଲୋକ ସଭା ଆସନରେ ବିଜେଡି ପ୍ରାର୍ଥୀ ବିଜୟୀ ହେବା ଲାଗି ଉଦ୍ୟମ କରାଯିବ। ସେହିପରି ଦେବୀପ୍ରସାଦ ମଧ୍ୟ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜ୍ଞାପନ କରିଛନ୍ତି।
