ଭୁବନେଶ୍ୱର,୧୨ା୧୧(ବ୍ୟୁରୋ):ଦୀର୍ଘ ବର୍ଷ ଧରି ଚାଲି ଆସୁଥିବା ଜିଲା ଗ୍ରାମ୍ୟ ଉନ୍ନୟନ ଏଜେନ୍ସି (ଡିଆରଡିଏ)କୁ ବନ୍ଦ କରିବାକୁ କେନ୍ଦ୍ର ସରକାର ନିଷ୍ପତ୍ତି ନେଇସାରିଛି। ଏବେ କୃଷି ବିଭାଗ ଅଧୀନରେ ସମସ୍ତ ଜିଲାରେ କାର୍ଯ୍ୟକାରୀ ହେଉଥିବା କୃଷି ବୈଷୟିକ ପରିଚାଳନା ଏଜେନ୍ସି(ଆତ୍ମା)କୁ ଅନୁଦାନ ଦେବା ବନ୍ଦ କରିବ କେନ୍ଦ୍ର। ଏନେଇ କେନ୍ଦ୍ର କୃଷି ମନ୍ତ୍ରଣାଳୟ ଅଧୀନ କୃଷି ଓ କୃଷକ କଲ୍ୟାଣ ବିଭାଗ ପକ୍ଷରୁ ରାଜ୍ୟ ସରକାରଙ୍କୁ ଚିଠି ଲେଖାଯାଇଛି।
ଚଳିତ ଆର୍ଥିକ ବର୍ଷ (୨୦୨୧-୨୨)ରେ ଆତ୍ମା ଯୋଜନାରେ କ୍ଷେତ୍ରସ୍ତରରେ କର୍ମଚାରୀ ନିୟୋଜିତ ନ କରିବାକୁ ରାଜ୍ୟ ସରକାରଙ୍କୁ ପରାମର୍ଶ ଦିଆଯାଇଛି। କେନ୍ଦ୍ର ଅର୍ଥ ମନ୍ତ୍ରଣାଳୟ ୨୦୨୧-୨୨ରୁ ୨୦୨୫ ପର୍ଯ୍ୟନ୍ତ ସବ୍ମିଶନ ଅନ୍ ଏଗ୍ରିକଲଚର ଏକ୍ସଟେନଶନ (ଏସ୍ଏମ୍ଏଇ) ପାଇଁ ଅନୁଦାନ ବନ୍ଦ କରିବାକୁ ନିଷ୍ପତ୍ତି ନେଇଛି। ଫଳରେ ଆତ୍ମାକୁ ଅନୁଦାନ ଦେବା ସମ୍ଭବ ହେବ ନାହିଁ। ଏହି ସଂସ୍ଥାରେ କାର୍ଯ୍ୟରତ କର୍ମଚାରୀଙ୍କ ସଂଖ୍ୟା ହ୍ରାସ କରିବାକୁ କୁହାଯାଇଛି।
କୃଷି ଓ କୃଷକମାନଙ୍କର ବିକାଶ ପାଇଁ ୨୦୦୫-୦୬ରୁ ରାଜ୍ୟ ସରକାରଙ୍କ କୃଷି ବିଭାଗ ଅଧୀନରେ ସମସ୍ତ ଜିଲା ଓ ବ୍ଲକସ୍ତରରେ ଆତ୍ମା କାର୍ଯ୍ୟକାରୀ ହେଉଛି। ଏହି ସ୍କିମ୍ କୃଷି କ୍ଷେତ୍ର ପାଇଁ ନୂଆ ଜ୍ଞାନକୌଶଳ ସମ୍ପର୍କରେ ବୈଷୟିକ ଜ୍ଞାନ ଦେଉଛି। ଏହାସହ କୃଷକମାନଙ୍କୁ ଆଧୁନିକ କୃଷି ପଦ୍ଧତି ସମ୍ପର୍କରେ ଅବଗତ କରିବା ଏବଂ ତାଲିମ ଦେବା ଆଦି କାର୍ଯ୍ୟ କରୁଛି। ଏଥିରେ କୃଷକ ଗୋଷ୍ଠୀ, କୃଷି କ୍ଷେତ୍ରରେ କାର୍ଯ୍ୟରତ ସ୍ବେଚ୍ଛାସେବୀ ସଂଗଠନ, କୃଷି ବିଜ୍ଞାନ କେନ୍ଦ୍ର ଏବଂ ପଞ୍ଚାୟତିରାଜ ଅନୁଷ୍ଠାନଗୁଡ଼ିକ ସାମିଲ ଅଛନ୍ତି। ୨୦୦୫-୦୬ରେ ଆତ୍ମା ପାଇଲଟ ପ୍ରକଳ୍ପ ଭାବେ ଓଡ଼ିଶା ସମେତ ୭ ରାଜ୍ୟରେ କାର୍ଯ୍ୟକାରୀ ହୋଇଥିଲା। ଏହାର ଗୁରୁତ୍ୱକୁ ଉପଲବ୍ଧି କରି କୃଷି ମନ୍ତ୍ରଣାଳୟ ଏହାକୁ ୨୮ ରାଜ୍ୟ ଏବଂ ୩ କେନ୍ଦ୍ର ଶାସିତ ଅଞ୍ଚଳର ୬୧୪ ଜିଲାରେ କାର୍ଯ୍ୟକାରୀ କରାଉଛି। ଏହା ଏକ କେନ୍ଦ୍ର ପ୍ରବର୍ତ୍ତିତ କାର୍ଯ୍ୟକ୍ରମ। ଏଥିରେ କେନ୍ଦ୍ର ସରକାର ୯୦ ପ୍ରତିଶତ ଅନୁଦାନ ଦେଉଥିବା ବେଳେ ରାଜ୍ୟ ସରକାର ୧୦ ପ୍ରତିଶତ ଅନୁଦାନ ଦେଉଥିଲେ। ତେବେ ୨୦୧୪ରେ କେନ୍ଦ୍ରରେ ଭାଜପା ପରିଚାଳିତ ଏନ୍ଡିଏ ସରକାର କ୍ଷମତାକୁ ଆସିବା ପରେ ଏହି ଯୋଜନାରେ ମିଳୁଥିବା ଅନୁଦାନ ପରିମାଣକୁ ୬୦:୪୦କୁ ଖସାଇ ଦିଆଯାଇଛି। ଏବେ ଏହାକୁ ସମ୍ପୂର୍ଣ୍ଣ ବନ୍ଦ କରିବାକୁ ଯୋଜନା କରାଯାଇଛି। ଏଥିଯୋଗୁ କୃଷି କ୍ଷେତ୍ର ପାଇଁ ରାଜ୍ୟକୁ ମିଳୁଥିବା ପ୍ରାୟ ୧୦୦ କୋଟି ଟଙ୍କା ହରାଇବାକୁ ପଡ଼ିବ। ସୂଚନାଯୋଗ୍ୟ, କେନ୍ଦ୍ରର ଏନ୍ଡିଏ ସରକାର ଗୋଟିଏ ପରେ ଗୋଟିଏ କେନ୍ଦ୍ରୀୟ ଯୋଜନା ସମ୍ପୂର୍ଣ୍ଣ ଉଚ୍ଛେଦ କରି ରାଜ୍ୟ ଉପରେ ଆର୍ଥତ୍କ ବୋଝ ଲଦି ଚାଲିଛନ୍ତି। କଂଗ୍ରେସ ପରିଚାଳିତ ଉପା ସରକାରଙ୍କ ସମୟରେ କାର୍ଯ୍ୟକାରୀ ହୋଇଥିବା ବିଆରଜିଏଫ୍ ପାଣ୍ଠି, ଆଦର୍ଶ ସ୍କୁଲକୁ ଅନୁଦାନ ସହ ୮ଟି କେନ୍ଦ୍ର ପ୍ରବର୍ତ୍ତିତ ଯୋଜନାକୁ ସମ୍ପୂର୍ଣ୍ଣ ଉଚ୍ଛେଦ କରାଯାଇଛି। ସେହିପରି କେତେକ ଯୋଜନାରେ କେନ୍ଦ୍ର ରାଜ୍ୟ ଅନୁଦାନ ରାଶିକୁ ୬୦:୪୦ରେ ସୀମିତ କରି ଦିଆଯାଇଛି। ଏଥିଯୋଗୁ ଅଧା ରହିଥିବା କେନ୍ଦ୍ର ଯୋଜନାକୁ ଚାଲୁ ରଖିବା ପାଇଁ ରାଜ୍ୟ ରାଜକୋଷ ଉପରେ ଆର୍ଥିକ ବୋଝ ପଡ଼ି ଚାଲିଛି।
କୃଷି ବିଭାଗର ଜଣେ ବରିଷ୍ଠ ଅଧିକାରୀଙ୍କ କହିବା ଅନୁସାରେ ଆତ୍ମା ଜରିଆରେ ରାଜ୍ୟରେ କୃଷିର ବିକାଶ ପାଇଁ ଅନେକ ଯୋଜନା ରାଜ୍ୟ ସରକାର ହାତକୁ ନେଇଛନ୍ତି। ଅନୁଦାନ ବନ୍ଦ ହେବା ପରେ ଏହା ଏକପ୍ରକାର ଅଚଳ ହୋଇଯିବ। ରାଜ୍ୟ ସରକାର ନିଜସ୍ବ ପାଣ୍ଠିରେ ଚଳାଇବା କଷ୍ଟକର ହୋଇପଡ଼ିବ।
