ଚମ୍ପୁଆ, ୪। ୮(ଡି.ଏନ.ଏ.)-କେନ୍ଦୁଝର ଜିଲା ଚମ୍ପୁଆ ବ୍ଲକ ଅନ୍ତର୍ଗତ ସାତହଳିଆ ଗ୍ରାମରେ ପ୍ରାୟ ୨୦ ଦିନ ହେବ ସୋଲାର ପାନୀୟ ଜଳ ପ୍ରକଳ୍ପ ଅଚଳ ହୋଇଯାଇଥିବାରୁ ଗ୍ରାମବାସୀମାନେ ଅସୁବିଧାର ସମ୍ମୁଖୀନ ହେଉଛନ୍ତି। ରାତି ପାହିଲେ ପାନୀୟ ଜଳ କେଉଁଠୁ ଆଣିବେ ଚିନ୍ତା ବଢୁଥିବା ବେଳେ ପ୍ରାୟ ଅଧ କି.ମି. ଚାଲି ଚାଲି ପାନୀୟ ଜଳ ସଂଗ୍ରହ କରୁଛନ୍ତି। ସାମ୍ଭାବ୍ୟ ପରିସ୍ଥିତିରେ ବର୍ଷା ନ ହେବାରୁ କୂଅ ପୋଖରୀ ଏକ ପ୍ରକାର ଶୁଖିଲା ପଡିଥିବା ବେଳେ ଏହି ପାନୀୟ ଜଳ ପ୍ରକଳ୍ପ ଅଚଳ ହେବାରୁ ଗ୍ରାମବାସୀଙ୍କୁ ବ୍ୟଥିତ କରିଛି।
ସୂଚନା ଅନୁସାରେ ସାତହଳିଆ ଠାରେ ଥିବା ଏହି ପାନୀୟ ଜଳ ପ୍ରକଳ୍ପ ଉପରେ ଅଙ୍ଗନୱାଡି କେନ୍ଦ୍ରକୁ ମିଶାଇ ଶତାଧିକ ଆଦିବାସୀ ନିର୍ଭର କରି ଆସୁଥିଲେ। ମାତ୍ର ଏହା ଅଚଳ ହେବାପରେ ଗ୍ରାମବାସୀ ସ୍ଥାନୀୟ ସରପଞ୍ଚ ସମେତ ବିଭାଗକୁ ସୂଚନା ଦେଇଥିଲେ। ମାତ୍ର ତାହା ଅଜି ପର୍ଯ୍ୟନ୍ତ ଫଳପ୍ରଦ ହୋଇପାରିଲା ନାହିଁ। ପାନୀୟ ଜଳ ଭଳି ପ୍ରମୁଖ ମୌଳିକ ଆବଶ୍ୟକତା ପ୍ରତି ପଦକ୍ଷେପନ ନିଆଯାଉ ନ ଥିବାରୁ ଗ୍ରାମବାସୀଙ୍କ ପକ୍ଷରୁ ଏଥିପ୍ରତି ଅସନ୍ତୋଷ ବ୍ୟକ୍ତ କରାଯାଇଛି। ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି। ତେବେ ଏସମ୍ପର୍କରେ ବିଭାଗୀୟ ଯନ୍ତ୍ରୀ କରନ ସୋରେନଙ୍କୁ ପଚାରିବାରୁ ଦୁଇରୁ ତିନି ଦିନ ମଧ୍ୟରେ ସମସ୍ୟାର ସମାଧାନ କରାଯିବ ବୋଲି କହିଛନ୍ତି।
