କାକଟପୁର,୨୮।୬(ଡି.ଏନ୍.ଏ.)- ପୁରୀ ଜିଲା କାକଟପୁର ବ୍ଲକ ଅନ୍ତର୍ଗତ ବାଜପୁର ଗାଁର ସାପଧରାଳି ବ୍ରଜକିଶୋର ସାହୁଙ୍କ ଘରେ ମଙ୍ଗଳବାର ତମ୍ପ ସାପର ୧୯ଟି ଅଣ୍ଡା ଫୁଟି ଜନ୍ମ ହୋଇଛନ୍ତି ୧୯ଟି ଛୁଆ। ପରେ ବ୍ରଜକିଶୋର ଉକ୍ତ ଛୁଆଗୁଡ଼ିକୁ ଉଦ୍ଧାର କରି ସ୍ଥାନୀୟ ବନଖଣ୍ଡକୁ ହସ୍ତାନ୍ତର କରିଛନ୍ତି। ସୂଚନା ମୁତାବକ, ପ୍ରାୟ ୨ ମାସ ପୂର୍ବରୁ କୋଣାର୍କର ଜଣେ ବ୍ୟକ୍ତିଙ୍କ ଘରୁ ଏକ ସାପ ଥିବା ଖବରପାଇ କାକଟପୁରର ସାପଧରାଳି ବ୍ରଜକିଶୋର ସେଠାକୁ ଯାଇ ଗୋଟିଏ ବିଷଧର ତମ୍ପକୁ ଉଦ୍ଧାର କରିଥିଲେ। ରାତି ହୋଇଯାଇଥିବାରୁ ସାପଟିକୁ ଘରକୁ ଆଣି ଗୋଟିଏ ଡବାରେ ରଖିଥିଲେ। ପରଦିନ ସକାଳୁ ଜଙ୍ଗଲ ବିଭାଗକୁ ହସ୍ତାନ୍ତର କରିବା ପାଇଁ ଡବା ଖୋଲିବାବେଳେ ଉକ୍ତ ସାପଟି ୧୯ଟି ଅଣ୍ଡା ଦେଇଥିବା ଦେଖିଥିଲେ। ଉକ୍ତ ସାପଟିକୁ ବନ ବିଭାଗକୁ ହସ୍ତାନ୍ତର କରି ଅଣ୍ଡା ଦେବା ବାବଦରେ ତତ୍କାଳୀନ ଜଙ୍ଗଲ ଅଧିକାରୀ ସବୀର ସାହୁଙ୍କୁ ସୂଚନା ଦେଇଥିଲେ। କିନ୍ତୁ ଉକ୍ତ ଅଣ୍ଡାଗୁଡିକର ଯତ୍ନ ନେବା ପାଇଁ ବ୍ରଜକିଶୋର ବନ ବିଭାଗକୁ କହିବାରୁ ଅଧିକାରୀ ରାଜି ହୋଇଥିଲେ। ଅଣ୍ଡାରୁ ଛୁଆ ଫୁଟିବା ପର୍ଯ୍ୟନ୍ତ ଅଣ୍ଡାଗୁଡିକର ଯତ୍ନ ନେଇଥିଲେ ବ୍ରଜକିଶୋର। ତେବେ ମଙ୍ଗଳବାର ସକାଳେ ସେ ଦେଖିବାବେଳେ ସେହି ଡବାରେ ଅଣ୍ଡାଗୁଡିକ ଫୁଟି ତମ୍ପ ଛୁଆ ଜନ୍ମ ନେଇଥିଲେ। ଏହି ଖବର ପ୍ରଚାର ହେବା ପରେ ସାପ ଛୁଆଗୁଡ଼ିକୁ ଦେଖିବାକୁ ବ୍ରଜକିଶୋରଙ୍କ ଘରେ ଲୋକଙ୍କ ଭିଡ଼ ଜମିଥିଲା। ପରେ ବ୍ରଜକିଶୋର ବନ ବିଭାଗକୁ ଜଣାଇ ସାପଛୁଆଗୁଡ଼ିକୁ ହସ୍ତାନ୍ତର କରିଥିଲେ। ସାପଧରାଳି ବ୍ରଜକିଶୋରଙ୍କ ଏଭଳି ପ୍ରୟାସ ପାଇଁ ବୁଦ୍ଧିଜୀବୀମାନେ ପ୍ରଶଂସା କରିଛନ୍ତି।
