ଭୁବନେଶ୍ୱର,୨୫।୬(ବ୍ୟୁରୋ): କଟକ ଜିଲା ଆଠଗଡ଼ ବନଖଣ୍ଡରୁ ଉଦ୍ଧାର ହୋଇଥିବା ଦୁଇଟି ହାତୀ କଙ୍କାଳ ଘଟଣାରେ ରାଜ୍ୟ ସରକାର ସ୍ବତନ୍ତ୍ର ତଦନ୍ତକାରୀ ଟିମ୍(ଏସ୍ଆଇଟି) ଗଠନ କରିଛନ୍ତି। ମାସକ ଭିତରେ ତଦନ୍ତ କରି ରିପୋର୍ଟ ଦେବା ପାଇଁ ନିର୍ଦ୍ଦେଶ ଦିଆଯାଇଛି। ମିଳିଥିବା ସୂଚନାନୁସାରେ, ଏସ୍ଆଇଟି ଆସନ୍ତା ୨୭ ତାରିଖ ସୋମବାର ଆଠଗଡ଼ ବନଖଣ୍ଡ ଅଧୀନ ବଡ଼ମ୍ବା ରେଞ୍ଜ ଅନ୍ତର୍ଗତ ଖାରୋଡ ଓ ଜେନାପାଳ ଗାଁକୁ ଯାଇ ୨ ଓ ୩ ତାରିଖରେ ଯେଉଁ ସ୍ଥାନରୁ ହାତୀ କଙ୍କାଳ ଉଦ୍ଧାର କରାଯାଇଥିଲା ସେହି ସ୍ଥାନ ପରିଦର୍ଶନ କରିବେ। ବୈଷୟିକ ସଦସ୍ୟ ହିସାବରେ ଭାରତର ବିଶିଷ୍ଟ କଙ୍କାଳ ବିଶେଷଜ୍ଞ ଡ. ଶିବପ୍ରସାଦ ପରିଡ଼ା ଏବଂ ଓୟୁଏଟିସ୍ଥିତ ଭେଟେରିନାରି କଲେଜ୍ର ସର୍ଜରି ଓ ରେଡିଓଲୋଜି ବିଭାଗର ପ୍ରଫେସର ଡା. ଇନ୍ଦ୍ରମଣି ନାଥ ସାମିଲ ହେବେ। ତେବେ ଏସ୍ଆଇଟି ତଦନ୍ତ କମିଟିରେ ଜଣେ ନିରପେକ୍ଷ ସଦସ୍ୟଙ୍କୁ ସାମିଲ ନ କରିବା ନେଇ ଆପତ୍ତି ଉଠାଇଛନ୍ତି ବନ୍ୟପ୍ରାଣୀ ବିଶେଷଜ୍ଞ ତଥା କେନ୍ଦ୍ରୀୟ ବନ୍ୟପ୍ରାଣୀ ବୋର୍ଡର ସଦସ୍ୟ ବିଶ୍ୱଜିତ ମହାନ୍ତି। ଏ ସର୍ମ୍ପକରେ ବିଶ୍ୱଜିତ କହିଛନ୍ତି, ଗତ ୧୭ ତାରିଖରୁ ମୁଁ ଜଙ୍ଗଲ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ, ବନ୍ୟପ୍ରାଣୀ ପିସିସିଏଫ୍ ଏବଂ ପ୍ରୋଜେକ୍ଟ ଏଲିଫ୍ୟାଣ୍ଟର ମୁଖ୍ୟଙ୍କୁ ଜଣେ ନିରପେକ୍ଷ ବେସରକାରୀ ବ୍ୟକ୍ତିଙ୍କୁ ଏସ୍ଆଇଟିରେ ସାମିଲ କରିବା ପତ୍ର ଲେଖିଛି। ତଦନ୍ତ ପ୍ରକ୍ରିୟାରେ ସ୍ବଚ୍ଛତା ବଜାୟ ରଖିବା ପାଇଁ ଜଣେ ନିରପେକ୍ଷ ତଥା ବନ୍ୟପ୍ରାଣୀ ଅପରାଧ ରୋକିବାରେ ଅଭିଜ୍ଞ ଲୋକଙ୍କୁ ଏସ୍ଆଇଟିରେ ନିହାତି ସାମିଲ କରିବା ଆବଶ୍ୟକ ବୋଲି ବିଶ୍ୱଜିତ କହିଛନ୍ତି।
