ପାରାଦୀପ,୯ା୯(ସ୍ବ.ପ୍ର.): ପାରାଦୀପ ବନ୍ଦର ପାଇଁ କଳଙ୍କିତ ଦାଗ ଛାଡି ଯାଇଥିବା ବ୍ଲାକ୍ରୋଜ ଜାହାଜ ବୁଡିବା ଘଟଣା ଶୁକ୍ରବାର ୧୪ ବର୍ଷରେ ପହଞ୍ଚିଛି। ସମୁଦ୍ରର ଯେଉଁ ସ୍ଥାନରେ ଜାହାଜ ବୁଡିଥିଲା ସେଠାରେ ଆଉ ଉପରିଭାଗ ଦେଖା ଯାଉନାହିଁ। ପାଣିରେ ଅଦୃଶ୍ୟ ହେବାଭଳି ଜାହାଜ ବୁଡିର କାରଣ ମଧ୍ୟ ରହସ୍ୟ ହୋଇ ରହିଛି। ସୂଚନାଯୋଗ୍ୟ, ୯ା୯ା୨୦୦୯ରେ ପାରାଦୀପ ବନ୍ଦରରେ ଲାଗିଥିବା ଏମ୍. ଭି. ବ୍ଲାକ୍ରୋଜ ଅଧା ପଣ୍ୟ ବୋଝେଇ କରି ସାରେ ସମୁଦ୍ରର ଆଙ୍କରେଜ ଏରିଆକୁ ଯିବାବେଳେ ବୁଡି ଯାଇଥିଲା। ସେଥିରେ ଥିବା ୨୭ ଜଣ ନାବିକଙ୍କ ମଧ୍ୟରୁ ୨୬ ଜଣଙ୍କୁ ବନ୍ଦର ମେରାଇନ ବିଭାଗ ଉଦ୍ଧାର କରିଥିଲା। ଜାହାଜର ମୁଖ୍ୟ ଯନ୍ତ୍ରୀ ୟୁକ୍ରେନର ନାଗରିକ ଆଲେକଜାଣ୍ଡାର ୟୁଲୋଶ୍ଚେଙ୍କୋଙ୍କ ମୃତ୍ୟୁ ଘଟିଥିଲା। ପରେ ଜାହାଜରୁ ତେଲ ନିର୍ଗତ ହୋଇ ପ୍ରଦୂଷଣ ହୋଇଥିଲା। ସେତେବେଳେ ଏହି ଘଟଣା ଆନ୍ତର୍ଜାତିକ ସ୍ତରରେ ବହୁ ବିବାଦ ସୃଷ୍ଟି କରିଥିଲା। କାରଣ ମଙ୍ଗୋଲିଆ ଦେଶର ଉକ୍ତ ଜାହାଜ ଚଳାଚଳ ଅକ୍ଷମ ଥିବା ସତ୍ତ୍ୱେ ତାହା ଅନେକ ଦେଶକୁ ଯାତାୟାତ କରୁଥିଲା। ଉକ୍ତ ଘଟଣାରେ ପ୍ରଥମେ ମେରାଇନ ପୋଲିସ ମାମଲା ରୁଜୁ କରିଥିଲା। ପରେ କ୍ରାଇମବ୍ରାଞ୍ଚ, କୋଲକତା ଓ ଓଡ଼ିଶା ହାଇକୋର୍ଟରେ ଏକାଧିକ ମାମଲା ହୋଇଥିଲା। ୨୬ ଜଣ ବିଦେଶୀ ନାଗରିକ ନିଜ ଦେଶକୁ ଫେରିବା ପାଇଁ ମାସାଧିକ ସମୟ ଲାଗିଥିଲା। ଜାହାଜରୁ ତେଲ ନିଷ୍କାସନ ଓ ଯନ୍ତ୍ରୀଙ୍କ ମୃତଦେହ ଜବତ କରିବାକୁ ସେତେବେଳେ ପାରାଦୀପ ବନ୍ଦର ୫୦ କୋଟିରୁ ଅଧିକ ଟଙ୍କା ବ୍ୟୟ କରିଥିଲା। ଯେଉଁ ସିଟ୍ରାନ୍ସ କମ୍ପାନୀ ଜାହାଜ ଆଣିଥିଲା ତାହା କଳା ତାଲିକା ଭୁକ୍ତ କରାଯାଇଛି। ଜାହାଜ ଯେଉଁ ଲୁହା ପଥର ଥିଲା ତାହା ମଧ୍ୟ ଚୋରାରେ ଚାଇନା ଯାଉଥିଲା ବୋଲି ଅଭିଯୋଗ ହୋଇଥିଲା। ସମସ୍ତ ଘଟଣାକୁ ନେଇ ୨୦୧୮ରେ ତତ୍କାଳୀନ ଅଧ୍ୟକ୍ଷ ରିଙ୍କେଶ ରାୟ ସିବିଆଇ ତଦନ୍ତ ପାଇଁ ସୁପାରିଶ କରିଥିଲେ। ଯାହା ଏ ପର୍ଯ୍ୟନ୍ତ ଆରମ୍ଭ ହୋଇନାହିଁ। ଜାହାଜର ମାଲିକ ମଙ୍ଗୋଲିଆ ଦେଶର ସି. କକ୍ଙ୍କ ପାଖରେ ଆମର ତଦନ୍ତ ଏଜେନ୍ସି ପହଞ୍ଚତ୍ ପାରିନାହିଁ। ସମୟାନୁସାରେ ତାହା ଅନାଲୋଚିତ ହୋଇଗଲାଣି। ସବୁକିଛି ରହସ୍ୟ ହୋଇ ରହିଯାଇଛି।
