ରସୁଲପୁର,୧୩।୧୦(ଡି.ଏନ.ଏ.): ରସୁଲପୁର ଶାଖା ଡାକଘର ଓ ଏହା ଅଧୀନରେ ଥିବା ୬ଟି ଉପଡାକଘରେ ଗ୍ରାହକ ସେବା ବାଧାପ୍ରାପ୍ତ ହୋଇଛି। ଭାରତ ସଞ୍ଚାର ନିଗମ ଲିମିଟେଡ୍ (ବିଏସ୍ଏନ୍ଏଲ୍) ଇଣ୍ଟରନେଟ୍ ସେବା ଅଚଳ ହୋଇପଡ଼ିଥିବାରୁ ଗ୍ରାହକ ଅତ୍ୟାବଶ୍ୟକ ସେବାରୁ ବଞ୍ଚତ୍ତ ହେଉଛନ୍ତି। ଅନ୍ୟପକ୍ଷରେ ରସୁଲପୁର ଉପଡାକଘରେ ବିଶେଷ ଅସୁବିଧା ପରିଲକ୍ଷିତ ହୋଇଛି। ବିଏସ୍ଏନ୍ଏଲ୍ ଲିଙ୍କ ଫେଲ ହୋଇଯାଇଥିବାରୁ ଏଠାରେ ୨ ସପ୍ତାହରୁ ଊର୍ଦ୍ଧ୍ୱ ହେବ ସେବା ମିଳିପାରୁ ନାହିଁ। ଏନେଇ ଗ୍ରାହକଙ୍କ ମଧ୍ୟରେ ଅସନ୍ତୋଷ ବଢି ଚାଲିଛି। ଉକ୍ତ ଅସୁବିଧାକୁ ଦୂର କରିବା ଦିଗରେ ବିଏସ୍ଏନ୍ଏଲ୍ କର୍ତ୍ତୃପକ୍ଷଙ୍କୁ ଡାକଘର ପକ୍ଷରୁ ନିବେଦନ କରାଯାଇଛି। ହେଲେ ବିଭାଗୀୟ ଅଧିକାରୀଙ୍କ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା କୁହାଯାଉଛି।
ସୂଚନା ଅନୁସାରେ, ଉକ୍ତ ଶାଖା ଡାକଘର ଅଧୀନରେ ଭୋଟକା, ଖଣ୍ଡିତର, ସଦାନନ୍ଦପୁର, ମଧୁବନ, ଆଦମପୁର ଓ ଦରକୁଣ୍ଡି ଉପଡାକଘର ରହିଛି। ଉକ୍ତ ଡାକଘର ଅଧୀନରେ ପ୍ରାୟତଃ ୧୦ ହଜାରରୁ ଊର୍ଦ୍ଧ୍ୱ ଗ୍ରାହକ ଅଛନ୍ତି। ତେବେ ଲିଙ୍କ ଫେଲ ଯୋଗୁ ରେଜିଷ୍ଟ୍ରି ପୋଷ୍ଟ, ସ୍ପିଡପୋଷ୍ଟ, ନୂଆ ଜମାଖାତା, ସୁକନ୍ୟା ଖାତା ଖୋଲିବା, ଜମାଖାତାରେ ଟଙ୍କା ଦାଖଲ କରିବା, ଉଠାଣ କରିବା ଭଳି ଗୁରୁତ୍ୱପୂର୍ଣ୍ଣ ସେବାରୁ ଗ୍ରାହକ ବଞ୍ଚତ୍ତ ହେଉଛନ୍ତି। ଆବଶ୍ୟକତା ବେଳେ ଗ୍ରାହକ ଟଙ୍କା ଉଠାଇ ନ ପାରି ଡାକକର୍ମଚାରୀଙ୍କ ଉପରେ ଅସନ୍ତୋଷ ପ୍ରକାଶ କରୁଛନ୍ତି। ତେବେ ଅନେକ ଗ୍ରାହକ ସେମାନଙ୍କ ଜମାଖାତାକୁ ବନ୍ଦ କରିଦେବାକୁ ଶାଖା ଡାକ ଅଧିକାରୀକୁ ଧମକ ବି ଦେଉଛନ୍ତି। ତେବେ କର୍ମଚାରୀମାନେ ଗ୍ରାହକଙ୍କୁ ବୁଝାଶୁଝା କରି ଶାନ୍ତ କରାଉଛନ୍ତି। ଏନେଇ ଡାକ ସୁପରିଟେଣ୍ଡେଣ୍ଟ୍ ଦିଲ୍ଲୀପ କୁମାର ସାମଲ କହିଛନ୍ତି, ବିଏସ୍ଏନ୍ଏଲ୍ ଏବଂ ଓସ୍ବାନ ନେଟୱର୍କଠାରୁ ଇଣ୍ଟରନେଟ୍ ସଂଯୋଗ ନେବା ପାଇଁ ନିୟମ ରହିଛି। ସେଥି ପାଇଁ ଅସୁବିଧା ଦେଖାଦେଉଛି। ଏବେ ଏୟାରଟେଲ ନେଟୱାର୍କରୁ ସଂଯୋଗ ନେବା ପାଇଁ ଯୋଜନା କରାଯାଉଛି। ଏହାଛଡ଼ା ସମସ୍ୟା ଦିଗରେ ବିଏସ୍ଏନ୍ଏଲ କର୍ତ୍ତୃପକ୍ଷଙ୍କୁ ଅବଗତ କରାଯାଇଛି। ସମସ୍ୟା ଶୀଘ୍ର ସମାଧାନ ହେବ। ବିଏସ୍ଏନ୍ଏଲ୍ ଏସ୍ଡିଓ ସରୋଜ ସୁବୁଦ୍ଧି କହିଛନ୍ତି, ଏ ସମ୍ପର୍କରେ ସେ ଅବଗତ ନାହାନ୍ତି। ହେଲେ ସେ ଅଞ୍ଚଳରେ କାମ କରୁଥିବା କର୍ମଚାରୀଙ୍କଠାରୁ ସମସ୍ୟା ସମ୍ପର୍କରେ ପଚାରି ବୁଝିବା ପରେ ସମାଧାନ କରିବାକୁ ପଦକ୍ଷେପ ନେବେ ବୋଲି ମତ ରଖିଛନ୍ତି।
