ନାଉଗଁା,୩୦ା୧(ସ୍ବ.ପ୍ର.):ନାଉଗଁା ବ୍ଲକ ବଛାଳୋ ସରକାରୀ ଉଚ୍ଚ ବିଦ୍ୟାଳୟରେ ପ୍ରଥମରୁ ୧୦ମ ଶ୍ରେଣୀ ପର୍ଯ୍ୟନ୍ତ ୨୧୬ଜଣ ପିଲା ପାଠ ପଢୁଛନ୍ତି। ବିଦ୍ୟାଳୟକୁ ବିଦ୍ୟୁତ୍ ସଂଯୋଗ କରାଯାଇଥିଲେ ମଧ୍ୟ ୨୦୨୨ ମାର୍ଚ୍ଚ ପର୍ଯ୍ୟନ୍ତ ୧ ଲକ୍ଷରୁ ଊର୍ଦ୍ଧ୍ୱ ଟଙ୍କାର ବିଲ୍ ବାକି ରହିଛି। ଫଳରେ ବିଦ୍ୟୁତ୍ ବିଭାଗ ପକ୍ଷରୁ ୨୦୨୨ ଅଗଷ୍ଟଠାରୁ ବିଦ୍ୟାଳୟରୁ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯାଇଛି। ବିଦ୍ୟୁତ୍ ସଂଯୋଗ ବିଚ୍ଛନ୍ନ କରାଯାଇଥିବାରୁ ବିଦ୍ୟାଳୟର ଛାତ୍ରୀଛାତ୍ର ବିଭିନ୍ନ ପ୍ରକାର ଅସୁବିଧାର ସମ୍ମୁଖୀନ ହେଉଛନ୍ତି। ସରକାରଙ୍କ ପକ୍ଷରୁ ବିଦ୍ୟାଳୟଗୁଡିକର ରୂପରେଖା ପରିବର୍ତ୍ତନ କରାଯିବା ସହ ପିଲାମାନଙ୍କୁ ବିଦ୍ୟାଳୟ ପ୍ରତି ଆକୃଷ୍ଟ କରିବା ସହ ଉନ୍ନତ ଜ୍ଞାନ କୌଶଳ ଅବଲମ୍ବନ କରି ପାଠ ପଢାଇବା ୫-ଟି ଯୋଜନାରେ ଅନ୍ତର୍ଭୁକ୍ତ କରାଯାଉଛି। ହେଲେ ଦୀର୍ଘ ୬ ମାସ ହେବ ବିଦ୍ୟୁତ୍ ନ ଥିବା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ବିଦ୍ୟୁତ୍ ବିଚ୍ଛିନ୍ନ ହୋଇ ଥିବାରୁ ବିଦ୍ୟାଳୟରେ ଲାଗିଥିବା ବୈଦ୍ୟୁତିକ ସାମଗ୍ରୀ ଫ୍ୟାନ, ପାଣି ପମ୍ପ ଆଦି ଚାଲି ପାରୁନାହିଁ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ପ୍ରତି ବିଦ୍ୟାଳୟରେ ଶୌଚାଳୟ ଓ ବିଶୁଦ୍ଧ ପାନୀୟ ଜଳ ଯୋଗାଇବାକୁ ବ୍ୟବସ୍ଥା ରହିଥିଲେ ମଧ୍ୟ ପାଣି ପମ୍ପ ଚାଲି ପାରୁ ନ ଥିବାରୁ ପିଲାମାନେ ଶୌଚାଳୟ ଯାଇ ପାରୁନାହାନ୍ତି।
ବିଦ୍ୟାଳୟରେ ୨ ଶହରୁ ଊର୍ଦ୍ଧ୍ୱ ପିଲା ପାଠ ପଢୁଥିବା ବେଳେ ପାନୀୟ ଜଳ ଓ ମଧ୍ୟାହ୍ନ ଭୋଜନରେ ସମସ୍ୟା ସୃଷ୍ଟି ହୋଇଛି। ବିଦ୍ୟାଳୟ ପରିସରରେ ଗୋଟିଏ ନଳକୂପ ରହିଛି। ପାନୀୟ ଜଳ ପାଇଁ ସମସ୍ତ ପିଲା ନିର୍ଭର କରୁଥିବା ବେଳେ ପିଇବା ପାଣି ପାଇଁ ସମସ୍ୟା ସୃଷ୍ଟି ହେଉଛି। ଏପରିକି ଉକ୍ତ ନଳକୂପ ପାଣିରେ ମଧ୍ୟାହ୍ନ ଭୋଜନ ରୋଷେଇ, ଖାଦ୍ୟ ସାମଗ୍ରୀ ଧୁଆ ହେଉଛି। ପିଲାମାନେ ହାତ ଧୋଇବା ଓ ପାଣି ପିଇବାକୁ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡୁଥିବା ଛାତ୍ରୀଛାତ୍ରମାନେ କହିଛନ୍ତି। ଏ ସମ୍ପର୍କରେ ଭାରାପ୍ରାପ୍ତ ପ୍ରଧାନ ଶିକ୍ଷକ ସୁଧାଂଶୁ ବେହେରାଙ୍କୁ ପଚାରିବାରେ ଏ ବିଷୟରେ ଜିଲା ଶିକ୍ଷାଧିକାରୀଙ୍କ ସହ ଆଲୋଚନା କରାଯାଇଛି। ବିଲ୍ ପୈଠ କରାଯିବା ପରେ ବିଦ୍ୟୁତ୍ ସଂଯୋଗ ହେବ ବୋଲି ସେ କହିଛନ୍ତି। ଏ ସଂକ୍ରାନ୍ତରେ ଟାଟା ପାଓ୍ବାର ନାଉଗଁା ଶାଖା ଲିଡ୍ ମ୍ୟାନେଜର ଦୀପକ ଭୂଇଁଙ୍କୁ ପଚାରିବାରେ ବିଦ୍ୟାଳୟରେ ଦୀର୍ଘଦିନ ହେବ ବିଦ୍ୟୁତ୍ ବିଲ୍ ପୈଠ କରାଯାଇନାହିଁ। ଏ ବିଷୟରେ ବିଦ୍ୟାଳୟକୁ ଅବଗତ କରାଯାଇଥିଲା। ସଂଯୋଗ ବିଚ୍ଛିନ୍ନ ପରେ ପ୍ରଧାନ ଶିକ୍ଷକ ଆସି ଅଣ୍ଡରଟେକିଂ ଲେଖି ମାର୍ଚ୍ଚ ମଧ୍ୟରେ ବିଲ୍ ପୈଠ କରିବାକୁ କହିଥିଲେ। କିନ୍ତୁ ବିଲ୍ ପୈଠ କରାଯାଇ ନ ଥିବାରୁ ବିଦ୍ୟୁତ୍ ସଂଯୋଗ ବିଚ୍ଛିନ୍ନ ରହିଛି।
