ଗୋପ,୧୭।୩ (ଡି.ଏନ୍.ଏ.): ଗୋପ ବ୍ଲକରେ ଥିବା ବ୍ରିଟିଶ ଶାସନ ଅମଳର ନିଗମାନନ୍ଦ ସ୍ମାର୍ଟ ସ୍କୁଲ ବର୍ତ୍ତମାନ ବିପଦସଙ୍କୁଳ ଅବସ୍ଥାରେ ଥିବା ଅଭିଯୋଗ ହୋଇଛି। ପୂର୍ବରୁ ସ୍କୁଲ ଛାତରୁ କଂକ୍ରିଟ୍ ପଲସ୍ତରା ଖସିଥିବାବେଳେ ଗୁରୁବାର ପୁଣି ପଲସ୍ତରା ଖସିଛି। ସ୍କୁଲ କର୍ତ୍ତୃପକ୍ଷ ଏ ସମ୍ପର୍କରେ ୩ଟି ବିଭାଗକୁ ଚିଠି ଲେଖିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସୁଫଳ ମିଳିପାରିନାହିଁ।
ସୂଚନା ମୁତାବକ, ଗଣେଶ୍ୱରପୁର ଅଞ୍ଚଳର ସ୍ବାଧୀନତା ସଂଗ୍ରାମୀ ବନମାଳୀ ଦାଶ ୧୯୪୪ ମସିହାରେ ଏହି ସ୍କୁଲ ପ୍ରତିଷ୍ଠା କରିିଥିଲେ। ଗତ ଫେବୃୟାରୀ ୪ ତାରିଖରେ ସ୍କୁଲର ଗୋଟିଏ କୋଠରି ଛାତରୁ ଅତଡା ଖସିବା ସହ କାନ୍ଥରେ ଫାଟ ସୃଷ୍ଟି ହୋଇଥିବା ଦେଖାଯାଇଥିଲା। ସେଥିପାଇଁ ସ୍କୁଲ ପ୍ରଧାନ ଶିକ୍ଷକ ମନୋରଞ୍ଜନ ପଟ୍ଟନାୟକ ସ୍କୁଲ ଚିଠି ନମ୍ବର ୩୯, ୪୩ ଓ ୪୪ରେ ଗ୍ରାମ୍ୟ ଉନ୍ନୟନ ବିଭାଗ, ଗୋପ ବ୍ଲକ ବିଡିଓ ସହିତ ଜିଲା ଶିକ୍ଷା ବିଭାଗ କର୍ତ୍ତୃପକ୍ଷଙ୍କୁ ମରାମତି ପାଇଁ ଚିଠି ଲେଖି ଜଣାଇଥିଲେ। ପରେ ବିଡିଓ ଦୀପ୍ତିରାଣୀ ଦାସଙ୍କ ନିର୍ଦ୍ଦେଶରେ ଯନ୍ତ୍ରୀମାନେ ଆସି ସ୍କୁଲ ଦେଖିଥିଲେ। ଉକ୍ତ କୋଠରିଟି ବିପଦସଙ୍କୁଳ ଅବସ୍ଥାରେ ଥିବାରୁ ସ୍କୁଲ କର୍ତ୍ତୃପକ୍ଷ ସେହି କୋଠରିରେ ପିଲାଙ୍କୁ ବସାଇ ନ ଥିଲେ। ଗୁରୁବାର ମାଟ୍ରିକ ପରୀକ୍ଷା ଚାଲିଥିବାବେଳେ ପୁଣି ସେହି କୋଠରି ଛାତରୁ ଅତଡା ଖସିଥିବା ଜଣାପଡିଛି। ଗଣଶିକ୍ଷାମନ୍ତ୍ରୀ ସମୀର ରଞ୍ଜନ ଦାଶଙ୍କ ନିର୍ବାଚନ ମଣ୍ଡଳୀରେ ଏହି ସ୍କୁଲଟି ଥିବାବେଳେ ସରକାରଙ୍କ ସ୍ମାର୍ଟ ସ୍କୁଲ ଯୋଜନାରେ ପ୍ରଥମ ପର୍ଯ୍ୟାୟରେ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇଥିଲା। ଗୋପ ବ୍ଲକରୁ ବଦଳି ହୋଇଥିବା ଜଣେ କନିଷ୍ଠ ଯନ୍ତ୍ରୀଙ୍କ ନାମରେ ସ୍ମାର୍ଟ ସ୍କୁଲ କାର୍ଯ୍ୟାଦେଶ ରହିଥିଲା। କିନ୍ତୁ ସେହି ଯନ୍ତ୍ରୀ ଜଣକ କେତେ ବିଲ୍ କଲେ କେତେ ଟଙ୍କା ଖର୍ଚ୍ଚ କରାଗଲା ତାହାର ଫାଇଲ୍ ଏବେ ବ୍ଲକରେ ନାହିଁ। ସେଥିପାଇଁ ପଞ୍ଚାୟତିରାଜ ବିଭାଗ ସଚିବ ଓ ଜିଲାପାଳଙ୍କୁ ଦୃଷ୍ଟି ଦେବାକୁ ଦାବି ହୋଇଛି। ତେବେ ଏହି ପୁରାତନ ବ୍ରିଟିଶ ଅମଳର ସ୍କୁଲ୍ଟି ଗଣଶିକ୍ଷାମନ୍ତ୍ରୀଙ୍କ ଅଞ୍ଚଳରେ ଥିବା ସତ୍ତ୍ୱେ ଏଥିପ୍ରତି ଗୁରୁତ୍ୱ ଦିଆଯାଉ ନ ଥିବାରୁ ଏଠାରେ ପ୍ରଶ୍ନବାଚୀ ସୃଷ୍ଟି କରିଛି। ଏହି ସ୍କୁଲରେ ଅଧ୍ୟୟନରତ ୮ ଶହ ଛାତ୍ରୀଛାତ୍ର ଏବେ ବିପଦପୂର୍ଣ୍ଣ ଭାବରେ ରହିଥିବା ଜଣାପଡିଛି। ଏହି ଅଭିଯୋଗ ସମ୍ପର୍କରେ ଉକ୍ତ ସ୍କୁଲ ପ୍ରଧାନ ଶିକ୍ଷକ ପଟ୍ଟନାୟକଙ୍କୁ ପଚାରିବାରେ, ସେ ଚିଠି ଲେଖି ୩ ଗୋଟି ବିଭାଗକୁ ଜଣାଇଥିବା କହିଛନ୍ତି। ଏଥିସହ ଛାତ୍ରୀଛାତ୍ରଙ୍କ ଲାଗି ପରିସ୍ରାଗାର ନ ଥିବା କହିଛନ୍ତି।
