ମୋରଡା,୧୧।୬(ଡି.ଏନ.ଏ) ମୟୂରଭଞ୍ଜ ଜିଲା ମୋରଡ଼ା ବ୍ଲକ ହଳଦୀପାଳ ପଞ୍ଚାୟତ ଅନ୍ତର୍ଗତ ଚିତ୍ରଡ଼ା-ଅମର୍ଦା ରାଜ୍ୟ ରାଜପଥ କଡ଼ରେ ଥିବା ରାଜା ରାଜୁଡ଼ା ଅମଳର ରାଜା ବନ୍ଧ ପ୍ରଶାସନିକ ଅବହେଳା ଯୋଗୁ ପରିଚୟ ହରାଇବାକୁ ବସିଛି। ୧୨୫ ଏକରରୁ ଊର୍ଦ୍ଧ୍ୱ ପରିସୀମା ବିଶିଷ୍ଟ ଏହି ବନ୍ଧ ପ୍ରାୟ ୩୦୦ ହେକ୍ଟରରୁ ଅଧିକ ଚାଷ ଜମିକୁ ପାଣି ଯୋଗାଉଥିଲା। ଏହି ବନ୍ଧର ପାଣି ବ୍ୟବହାର କରି ଚାଷୀମାନେ ଉଭୟ ଖରିଫ ଓ ରବି ଋତୁରେ ଧାନ ସହିତ ଅନ୍ୟାନ୍ୟ ଚାଷ କାର୍ଯ୍ୟ କରି ସନ୍ତୁଷ୍ଟ ହେଉଥିଲେ। କିନ୍ତୁ ଦୁଃଖର ବିଷୟ, ବିଗତ କିଛି ବର୍ଷ ହେବ ଚାଷ କାର୍ଯ୍ୟ ପାଇଁ ବର୍ଷା ଜଳ ହିଁ ଭରସା ପାଲଟିଛି। ଦିନକୁ ଦିନ ବନ୍ଧ ପୋତି ହୋଇଯାଉଛି। ଯାହା ଫଳରେ ପୂର୍ବ ଭଳି ବନ୍ଧରେ ଅଧିକ ଜଳ ସଂରକ୍ଷଣ ହେଉନାହିଁ l ତେଣୁ ଅଧିକାଂଶ ଚାଷଜମିକୁ ପାଣି ପହଞ୍ଚି ପାରୁନାହିଁ। ଯାହାର ପରିଣାମ ଚାଷୀମାନେ ଭୋଗୁଛନ୍ତି। ସେହିପରି ବନ୍ଧଟି ଏବେ ଦଳରେ ଭର୍ର୍ତ୍ତିି ହୋଇ ଯାଇଥିବାରୁ ସାଧାରଣ ଲୋକେ ଗାଧୋଇବା ପାଇଁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ତେଣୁ ଏହି ବନ୍ଧର ପୁନଃରୁଦ୍ଧାର ପାଇଁ ଅଞ୍ଚଳବାସୀ ଦାବି କରିଛନ୍ତି।
ତେବେ ବନ୍ଧର ପୁନଃରୁଦ୍ଧାର ପାଇଁ ପ୍ରଶାସନଠାରୁ ଆରମ୍ଭ କରି ରାଜନେତାଙ୍କ ପର୍ଯ୍ୟନ୍ତ ଏକାଧିକ ଥର ଲିଖିତ ଭାବେ ଅଞ୍ଚଳବାସୀ, ବୁଦ୍ଧିଜୀବୀ, ବରିଷ୍ଠ ନାଗରିକ ଦାବି କରିଥିଲେ ମଧ୍ୟ ସେମାନଙ୍କ କିଛି ପଦକ୍ଷେପ ଗ୍ରହଣ କରାଯାଇନାହିଁ। ହଳଦୀପାଳ ସରପଞ୍ଚ ମାଳତୀ ମାରାଣ୍ଡି କହିଛନ୍ତି ଯେ, ରାଜା ବନ୍ଧ ଧୀରେ ଧୀରେ ତାର ଅସ୍ତିତ୍ୱ ହରାଇବାକୁ ବସିଲାଣି। ତେଣୁ ରାଜ୍ୟ ସରକାର ଓ ପ୍ରଶାସନ ଏଥିପ୍ରତି ଦୃଷ୍ଟି ଦେଇ ବନ୍ଧର ପୁନଃରୁଦ୍ଧାର କଲେ ଚାଷୀମାନେ ଉପକୃତ ହୋଇପାରିବେ l
ସେହିପରି ସମିତି ସଭ୍ୟ ତନୟ ଦାସ କୁହନ୍ତି, ରାଜା ବନ୍ଧର ପୁନଃରୁଦ୍ଧାର ନ ହେଲେ ଆଉ କିଛି ବର୍ଷ ଭିତରେ ଏହା ଏକ ନାଳରେ ପରିଣତ ହୋଇଯିବ। ସେପଟେ ବନ୍ଧର ପୁନଃରୁଦ୍ଧାର ସହିତ ବନ୍ଧ କୂଳରେ ଥିବା ମା’ଦୁଆରଶୁଣୀଙ୍କ ପୀଠର ମଧ୍ୟ ଉନ୍ନତିକରଣ କରାଗଲେ ପୀଠକୁ ଭକ୍ତଙ୍କ ସୁଅ ଛୁଟିବ। ଜିଲାର ଅଗ୍ରଣୀ ଅଣରାଜନୈତିକ ସଂଗଠନ ଭଞ୍ଜସେନାର ପ୍ରତିଷ୍ଠାତା କଳିଙ୍ଗ କେଶରୀ ଜେନା ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ବନ୍ଧର ପୁନଃରୁଦ୍ଧାର ଆଲୋକୀକରଣ ବ୍ୟବସ୍ଥା ଓ ଜଳାଶୟରେ ବୋଟିଂର ବ୍ୟବସ୍ଥା କରାଗଲେ ଏହା ଏକ ସୁନ୍ଦର ପର୍ଯ୍ୟଟନସ୍ଥଳୀର ମାନ୍ୟତା ପାଇପାରିବ। ଆଗାମୀ ଦିନରେ ପ୍ରଶାସନ ଯଦି ବନ୍ଧର ଉନ୍ନତି ଦିଗରେ କୌଣସି ପଦକ୍ଷେପ ନ ନିଏ ତେବେ ଭଞ୍ଜସେନା ରାଜରାସ୍ତାକୁ ଓହ୍ଲାଇ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବ ବୋଲି ମୋରଡା ବ୍ଲକ ଭଞ୍ଜସେନା ସଭାପତି ପରିତୋଷ ବାରିକ କହିଛନ୍ତି।
