ବୌଦ୍ଧ,୨୧ା୫(ସ୍ବ.ପ୍ର.): ବୌଦ୍ଧ ଜିଲାରେ ଚିରସ୍ରୋତା ମହାନଦୀ ଜିଲାର ମନମୁଣ୍ଡାଠାରୁ ହରଭଙ୍ଗା ବ୍ଲକର ମାରଡା ପର୍ଯ୍ୟନ୍ତ ପ୍ରାୟ ୧୨୦ କିମି ପର୍ଯ୍ୟନ୍ତ ପ୍ରବାହିତ ହୋଇଛି। ମହାନଦୀ କୂଳରେ ୨୦୦ରୁ ଅଧିକ ଗ୍ରାମ ଥିବା ବେଳେ ୧୦ ହଜାରରୁ ଊର୍ଦ୍ଧ୍ୱ ପରିବାର ଘର କରି ରହି ଆସୁଛନ୍ତି। କିନ୍ତୁ ଜିଲାରେ ବର୍ତ୍ତମାନ ମହାନଦୀ କୂଳ ଖାଇ ଚାଲିଥିବାରୁ ପ୍ରତିବର୍ଷ ନଦୀକୂଳିଆ ଗାଁଗୁଡିକ ବନ୍ୟାରେ ବିଶେଷ ପ୍ରଭାବିତ ହେଉଛି। ପାଣିପାଗ ବିଜ୍ଞାନୀମାନେ ପୂର୍ବ ସୂଚନା ଦେଇ ସାରିଲେଣି ଯେ ଚଳିତବର୍ଷ ସ୍ବାଭାବିକ ମୌସୁମୀ ବର୍ଷା ହେବ। ପ୍ରତିବର୍ଷ ଜୁଲାଇ ଠାରୁ ସେପ୍ଟେମ୍ବର ମାସ ପର୍ଯ୍ୟନ୍ତ ବୌଦ୍ଧ ଜିଲାରେ ବର୍ଷା ବିପତ୍ାତ ଘଟିବା ସହିତ ମହାନଦୀ ଓ ତେଲନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଥାଏ। ଅଗଷ୍ଟ ମାସ ଶେଷ ପର୍ଯ୍ୟନ୍ତ ନଦୀକୂଳରେ ରହୁଥିବା ପରିବାର ଆତଙ୍କିତ ଅବସ୍ଥାରେ ରହିଥାନ୍ତି। ଜିଲାରେ ମହାନଦୀ ଓ ତେଲନଦୀ ଦୁଇଟି ଚିରସ୍ରୋତା ନଦୀ ପ୍ରବାହିତ ହେଉଥିବା ବେଳେ ବାଘ ଓ ସାଲୁଙ୍ଖି ଭଳି ଛୋଟ ନଦୀ ଯୋଗୁ ଜିଲାରେ ବନ୍ୟା ଦେଖାଦେଇଥାଏ।
ବୌଦ୍ଧ ଜିଲାରେ ୧୯୮୨ରେ ପ୍ରଳୟଙ୍କରୀ ବନ୍ୟା ଦେଖାଦେଇଥିବା ବେଳେ ଜିଲାରେ ପ୍ରତିବର୍ଷ ବନ୍ୟା ତାଣ୍ଡବ ରଚିଥାଏ। ପ୍ରତିବର୍ଷ ବନ୍ୟା ଯୋଗୁ ନଦୀ କୂଳ ଖାଇ ଚାଲିଥିବା ବେଳେ ଅନେକ ସ୍ଥାନରେ ମହାନଦୀ ଶଯ୍ୟାରେ ବାଲି ପୋତି ହୋଇଯିବା ଯୋଗୁ ନଦୀ ପାଣି ନଦୀକୂଳିଆ ଗାଁ ଭିତରକୁ ପ୍ରବେଶ କରିବାକୁ ସୁବିଧା ହେଉଛି ା ପ୍ରତିବର୍ଷ ପ୍ରଶାସନ କାଁ ଭାଁ ନଦୀକୂଳିଆ ଗ୍ରାମଗୁଡିକରେ ପଥର ପ୍ୟାକିଂ କରି କାମ ସାରି ଦେଉଥିବା ବେଳେ ଏହା ପ୍ରକୃତ ବନ୍ୟାପାଣିକୁ ରୋକି ପାରି ନ ଥାଏ। ନଦୀ କୂଳର ସୁରକ୍ଷା ଲାଗି ପଥର ପ୍ୟାକିଂ ସହିତ ବୃକ୍ଷରୋପଣ ପାଇଁ ପ୍ରତିବର୍ଷ ଯୋଜନା ହୋଇ କେବଳ କାଗଜକଲମରେ କରାଯାଉଥିବା ଦେଖିବାକୁ ମିଳୁଛି। ଜିଲାରେ ନଦୀବନ୍ଧର ସୁରକ୍ଷା ସହିତ ପରିବେଶର ସୁରକ୍ଷା ପାଇଁ ସବୁଜ ମହାନଦୀ ଯୋଜନା ଆରମ୍ଭ ହୋଇ କାର୍ଯ୍ୟକାରୀ ହୋଇଥିବା ବେଳେ ଜିଲାରେ ଏହି ଯୋଜନା ପୁରାପୁରି ଫେଲ୍ ମାରିଛି। ସେହିପରି ବୌଦ୍ଧ ସହରର ମହାନଦୀ କୂଳେ କୂଳେ ଏକ ବନ୍ୟା ପ୍ରତିରୋଧକ ପ୍ରାଚୀର ନିର୍ମାଣ ପାଇଁ ସରକାର ଅର୍ଥ ମଞ୍ଜୁର କରିଥିଲେ। କିନ୍ତୁ ଅନେକ ସ୍ଥାନରେ ବେସରକାରୀ ଜମି ପଡୁଥିବାରୁ ଜଳସେଚନ ବିଭାଜନ କାର୍ଯ୍ୟାଳୟ ପକ୍ଷରୁ ଏହି ଅର୍ଥରୁ କିଛି ଖର୍ଚ୍ଚ କରି ବଳକା ଅର୍ଥକୁ ସରକାରଙ୍କୁ ଫେରାଇ ଦିଆଗଲା। ଏବେ ପୁଣି ଥରେ ବଙ୍କାପଡାଠାରୁ ବନ୍ୟା ପ୍ରତିରୋଧକ ପ୍ରାଚୀର ନିର୍ମାଣ ପାଇଁ ଯୋଜନା ପ୍ରସ୍ତୁତ ହୋଇଥିବା କୁହାଯାଉଛି। ବୌଦ୍ଧ ସହରର ଜନସାଧାରଣ ପ୍ରତିବର୍ଷ ଗ୍ରୀଷ୍ମରେ ପାନୀୟଜଳ ପାଇଁ ଡହଳ ବିକଳ ହେଉଥିବା ବେଳେ ବର୍ଷାରେ ବନ୍ୟା ଆଶଙ୍କାରେ ରହୁଛନ୍ତି। ତେଣୁ ବୌଦ୍ଧ ସହର ସମେତ ଜିଲାର ଜନବସତି ରହିଥିବା ନଦୀକୂଳଗୁଡିକର ଉପଯୁକ୍ତ ସୁରକ୍ଷା ପାଇଁ ପଦକ୍ଷେପ ଗ୍ରହଣ କରାଯିବା ସହିତ ନଦୀ କୂଳେ କୂଳେ ଏକ ରିଙ୍ଗବନ୍ଧ ନିର୍ମାଣ ପାଇଁ ସାଧାରଣରେ ମତପ୍ରକାଶ ପାଉଛି। ସେହିପରି ବୌଦ୍ଧ ସହରର ମହାନଦୀ ଘେରି ରହିଥିବା ମର୍ଜାକୁଦର ଚାରିପଟୁ ପ୍ରତିବର୍ଷ କୂଳଖାଇ ଚାଲିଥିବା ଯୋଗୁ ଏହାର ସୁରକ୍ଷା ପାଇଁ ସ୍ବତନ୍ତ୍ର ଯୋଜନାର ଆବଶ୍ୟକତା ରହିଛି।
