ବ୍ରହ୍ମପୁର ଅଫିସ,୨୨।୩: ବ୍ରହ୍ମପୁର ସହରରେ ଭଡ଼ା ଘରେ ବିଭିନ୍ନ ପ୍ରକାର ଅପରାଧ ଘଟିବା ସହ ଚୋରା ମଦ, ଗଞ୍ଜେଇ ଓ ଗୁଟ୍ଖା ଆଦି କାରବାର ଓ ଅନୈତିକ କାର୍ଯ୍ୟ ହେଉଛି। ଭଡା ଦେଉଥିବା ମାଲିକମାନେ ସେମାନଙ୍କ ସମ୍ପର୍କରେ କୌଣସି ତଥ୍ୟ ଠିକ୍ ଭାବେ ରଖୁନାହାନ୍ତି। ଫଳରେ ବିଭିନ୍ନ ସମୟରେ ଘଟୁଥିବା ଅପରାଧ ଯୋଗୁ ମାଲିକମାନେ ଥାନା ଓ କୋର୍ଟର ଦ୍ୱାରସ୍ଥ ହେଉଛନ୍ତି ।
ବିଗତ ଦିନରେ ଏଭଳି ବହୁ ଘଟଣାର ପର୍ଦ୍ଦାଫାଶ ହୋଇଛି। ସହରରେ ସହଜ ଓ ସୁବିଧାରେ ଘରଭଡ଼ା ମିଳିଯାଉଛି। ଯାହାର ଫାଇଦା ଉଠାଉଛନ୍ତି ଅପରାଧୀ ଓ ନିଶା ବେପାରୀ। ଘର ମାଲିକଙ୍କ ବରାଦ ଅନୁସାରେ ଘରଭଡ଼ା ଦେଇ ସେଠାରେ ବେଆଇନ କାମ କରୁଛନ୍ତି। ସଦର ଓ ଗୋଳନ୍ଥରା ଥାନା ଅଞ୍ଚଳରେ ଏଭଳି କାରବାର ବଢ଼ିବାରେ ଲାଗିଛି। ଗୋଳନ୍ଥରା ଥାନା ପୋଲିସ ହଳଦିଆପଦର ଓ ଅଟୋନଗର ସ୍ଥିତ ଦୁଇଟି ସ୍ଥାନରେ ଚଢ଼ାଉ କରି ପ୍ରାୟ ୧୦ କୋଟି ଟଙ୍କାର ଗୁଟ୍ଖା ପ୍ୟାକ୍ଟ୍ରି ଠାବ କରିଥିଲା। ଏହି କାରବାରର ମୁଖ୍ୟ ଅଭିଯୁକ୍ତ ପି. ଗୋପାଳ କ୍ରିଷ୍ଣା ବିଭିନ୍ନ ଲୋକଙ୍କୁ ଏଠାରେ ନିୟୋଜିତ କରି ଦୀର୍ଘଦିନ ହେଲା ଏହି କାରବାର ଜାରି ରଖିଥିଲେ। ସେହିପରି ବିଭିନ୍ନ ସମୟରେ ଭଡ଼ାଘରୁ ନକଲି ମଦ ଫ୍ୟାକ୍ଟ୍ରି ମଧ୍ୟ ଠାବ ହୋଇଛି। ଗତ ସେପ୍ଟେମ୍ବର ୯ରେ ଅବକାରୀ ଗୋଇନ୍ଦା ବିଭାଗର ଏକ ଟିମ୍ ୧୬ ନମ୍ବର ଜାତୀୟ ରାଜପଥ ପୁକୁଡ଼ିବନ୍ଧ ଜଙ୍କସନରୁ ମଦ ବୋଝେଇ ଅଟୋ ଠାବ କରିଥିଲା। ତାହା ନକଲି ବୋଲି ଜଣାପଡ଼ିବା ପରେ ଅବକାରୀ ଟିମ୍ ମଦ ପ୍ରସ୍ତୁତ ହେଉଥିବା ସ୍ଥାନ ବଡ଼ବଜାର ଥାନା ଅନ୍ତର୍ଗତ ଫାଷ୍ଟଗେଟ୍ ଓମ୍ନଗର ସ୍ଥିତ ଏକ ଭଡ଼ାଘରେ ଚଢ଼ାଉ କରିଥିଲା। ଯାଞ୍ଚ ପରେ ସେଠାରୁ ବିଭିନ୍ନ ବ୍ରାଣ୍ଡର ୧୨ଶହ ନକଲି ବିଦେଶୀ ମଦ ଓ ପ୍ରସ୍ତୁତି ପାଇଁ ଦରକାର କଞ୍ଚାମାଲ୍ ଜବତ ହୋଇଥିଲା। ସେହିପରି ଗତ ଜୁଲାଇ ୧୩ରେ ବ୍ରହ୍ମପୁର ଅବକାରୀ ବିଭାଗର ଏକ ଟିମ୍ ଟାମଣା ଛକରୁ ଏକ ସ୍କୁଟିରେ ଚାଲାଣ ହେଉଥିବା ନକଲି ମଦ ଜବତ କରିଥିଲା। ଗୋଳନ୍ଥରା ଥାନା ଅନ୍ତର୍ଗତ ରାଳବ ଗ୍ରାମର ଏକ ଘରେ ଓ କେ.ନୂଆଗାଁ ଥାନା ଅନ୍ତର୍ଗତ ଗୌଡ଼ଗାଁରେ ଚଢ଼ଉ କରି ବିଭିନ୍ନ ବ୍ରାଣ୍ଡର ବିଦେଶୀ ମଦ ଜବତ କରିଥିଲା। ଏହା ପୂର୍ବରୁ ମେ’ ୨ତାରିଖରେ ଡୁରା ଗ୍ରାମରେ ଚଢ଼ଉ କରି ଏକ ଘରୁ ୧୩୪ ଲିଟର ନକଲି ବିଦେଶୀ ମଦ, ୪୦ଲିଟର ସ୍ପିରିଟ୍, ଅବକାରୀ ଲେବଲ୍, ଠିପି, ନଗଦ ୨୫ହଜାର ଟଙ୍କା, ଖାଲି ବୋତଲ ଓ ବିଭିନ୍ନ କମ୍ପାନୀର ଲେବଲ୍ ଜବତ ହୋଇଥିଲା। ଭଡ଼ାଘରେ ରୀତିିମତ ଏଭଳି କାରବାର ଜାରି ରହିଛି। କୋଲକାତାରୁ ନକଲି ମଦ ପ୍ରସ୍ତୁତି ସାମଗ୍ରୀ ଆସୁଥିବା ବେଳେ ହୋମିଓପାଥି ସ୍ପିରିଟ ବ୍ୟବହାର କରି ନକଲି ମଦ ତିଆରି କରାଯାଉଛି। ଭୁବନେଶ୍ୱର-କଟକ କମିଶନରେଟ ପୋଲିସ ବ୍ୟବସ୍ଥାରେ ଭଡ଼ାଟିଆଙ୍କ ସମ୍ପର୍କରେ ସବିଶେଷ ତଥ୍ୟ ସମ୍ପୃକ୍ତ ଇଲାକାର ଥାନାକୁ ଦେବା ପାଇଁ କଡ଼ା ନିର୍ଦ୍ଦେଶ ରହିଛି। କିନ୍ତୁ ବ୍ରହ୍ମପୁର ପୋଲିସ ଜିଲାରେ ଏହା ଲାଗୁ ହୋଇ ନ ଥିବାରୁ ଅପରାଧୀ ଓ ମାଫିଆମାନେ ଘରଭଡ଼ା ନେଇ ଏଭଳି ବେଆଇନ କାରବାର କରୁଛନ୍ତି। ଏନେଇ ବ୍ରହ୍ମପୁର ଏସ୍ପି ଡା. ଶ୍ରବଣା ବିବେକ ଏମ. କହିଛନ୍ତି, ଯେଉଁ ବ୍ୟକ୍ତିମାନେ ନିଜର ଘର ଭଡା ଦେଉଛନ୍ତି ସେମାନେ ଭଡ଼ାଟିଆଙ୍କ ସୂଚନା ପୋଲିସକୁ ଦେବାକୁ ବାଧ୍ୟତାମୂଳକ କରାଯିବ। ଯଦି କେହି ଏହାର ଖିଲାପ କରନ୍ତି, ପୋଲିସ ଚଢ଼ାଉ ବେଳେ ସେଠାରୁ ଯଦି କୌଣସି ଅପରାଧୀ ଧରାପଡନ୍ତି, ସେଥିପାଇଁ ସେମାନେ ଉତ୍ତରଦାୟୀ ହେବେ ବୋଲି ସେ କହିଛନ୍ତି।
