ଦାରିଙ୍ଗବାଡ଼ି,୧୬ା୧(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ସରକାରୀ ବାଳିକା ଉଚ୍ଚ ବିଦ୍ୟାଳୟର ବାର୍ଷିକ ଉତ୍ସବ ବୁଧବାର ସନ୍ଧ୍ୟାରେ ଉଦ୍ଯାପିତ ହୋଇଯାଇଛି। ଉଦ୍ଯାପନ ଉତ୍ସବକୁ ମୁଖ୍ୟ ଅତିଥି ଭାବେ ବାଲିଗୁଡ଼ା ଆଇଟିଡିଏର ପ୍ରକଳ୍ପ ପ୍ରଶାସକ ଗଦାଧର ପାତ୍ର ଉଦ୍ଘାଟନ କରିଥିଲେ। ତାଙ୍କୁ ବିଦ୍ୟାଳୟ ପକ୍ଷରୁ ପ୍ରଧାନଶିକ୍ଷକ ଅଜୟ କୁମାର ଜେନା ଓ ଉତ୍ସବର ଅଧ୍ୟକ୍ଷ ତଥା ଉଲିପଦର ବାଳିକା ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକ ମଦନମୋହନ ବେହେରା ସ୍ବାଗତ ଜଣାଇ ମଞ୍ଚକୁ ନେଇଥିଲେ। ଛାତ୍ରୀମାନଙ୍କ ସହ ପ୍ରକଳ୍ପ ପ୍ରଶାସକ ପାତ୍ର ନିଜ ଦ୍ୱାରା ଲେଖାଯାଇଥିବା ଏଇ ଆମ ଦାରିଙ୍ଗବାଡ଼ି ସଙ୍ଗୀତ ଗାନ କରିଥିଲେ। ଏଥିରେ ଛାତ୍ରୀମାନେ ଝୁମିଥିଲେ। ନିଜ ଅଭିଭାଷଣରେ ପ୍ରକଳ୍ପ ପ୍ରଶାସକ ଛାତ୍ରୀମାନଙ୍କୁ ଭଲ ପାଠ ପଢ଼ିବାକୁ ପରାମର୍ଶ ଦେଇଥିଲେ। ଆଉ କିଛି ଦିନ ପରେ ଦଶମ ପରୀକ୍ଷା ରହିଥିବାରୁ ଦଶମ ଛାତ୍ରୀମାନଙ୍କୁ ପରୀକ୍ଷାରେ ଭଲ ନମ୍ବର ରଖି ଉତ୍ତୀର୍ଣ୍ଣ ହେବାକୁ ଟିପ୍ସ ପ୍ରଦାନ କରିଥିଲେ। ପରେ ବିଭିନ୍ନ ପ୍ରତିଯୋଗିତାରେ କୃତିତ୍ୱ ଅର୍ଜନ କରିଥିବା ଛାତ୍ରୀଙ୍କୁ ପୁରସ୍କୃତ କରିବା ସହ ମାନପତ୍ର ପ୍ରଦାନ କରିଥିଲେ। ଛାତ୍ରୀମାନେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ନୃତ୍ୟ, ସଙ୍ଗୀତ କ୍ଷୁଦ୍ର ନାଟକ ପରିବେଷଣ କରିଥିଲେ।
