ଭୁବନେଶ୍ୱର,୪।୬: ବିଗତ କିଛି ମାସ ହେବ ରାଜ୍ୟରେ ଜମି କିଣାବିକା ଓ ଆପାର୍ଟମେଣ୍ଟ ମାଲିକାନାକୁ ନେଇ ସବୁସ୍ତରରେ ସମସ୍ୟା ସୃଷ୍ଟି ହୋଇଥିଲା। ଫଳରେ କୋଟି କୋଟି ଟଙ୍କାର ପରୋକ୍ଷ ଓ ପ୍ରତ୍ୟକ୍ଷ ଟିକସ ସବୁ ବର୍ଗ ହରାଉଥିଲେ। ସମସ୍ୟାର ଗୁରୁତ୍ୱକୁ ନଜରରେ ରଖି ରାଜ୍ୟ ସରକାର ଏହାର ସମାଧାନ ବାହାର କରିଛନ୍ତି। ଏପରିକି ନିକଟରେ ସରକାରଙ୍କ ପକ୍ଷରୁ ଜାରି କରାଯାଇଥିବା ଆପାର୍ଟମେଣ୍ଟ (ମାଲିକାନା ଓ ପରିଚାଳନା) ଅଧ୍ୟାଦେଶ-୨୦୨୩ କୁ ରିଅଲ ଇଷ୍ଟେଟ୍ ଶିଳ୍ପସଂସ୍ଥା କ୍ରେଡାଇ ଓଡ଼ିଶା ଶାଖା ପକ୍ଷରୁ ସମର୍ଥନ କରାଯାଇଛି। ଏହି ପରିପ୍ରେକ୍ଷୀରେ କ୍ରେଡାଇ ଓଡ଼ିଶା ଶାଖା ପକ୍ଷରୁ ଏକ ଖବରଦାତା ସମ୍ମିଳନୀ କରାଯାଇ ଅର୍ଡିନାସ ସମ୍ପର୍କରେ ବିସ୍ତୃତ ସୂଚନା ପ୍ରଦାନ କରାଯାଇଥିଲା। ଉଲ୍ଲେଖଯୋଗ୍ୟ, ଉକ୍ତ ଅଧ୍ୟାଦେଶରେ ରେରା ନିୟମକୁ ଠିକ୍ ଭାବେ ପାଳନ କରାଯାଇଥିବ ବୋଲି କ୍ରେଡାଇ ଶାଖା ପକ୍ଷରୁ ଆଶା ପ୍ରକଟ କରାଯାଇଛି। ସେହିଭଳି ଏହାଦ୍ୱାର ଆପାର୍ଟମେଣ୍ଟ କିଣାବିକା ସହ ସାଧାରଣ ଅଞ୍ଚଳକୁ ଆବାସିକା ସଂଘଗୁଡିକୁ ହସ୍ତାନ୍ତର କରିବା ଲାଗି ଏକ ପ୍ରକାର ବାଟ ଖୋଲିବ ବୋଲି ଶାଖା ପକ୍ଷରୁ କୁହାଯାଇଛି। ଅପରପକ୍ଷରେ ରାଜ୍ୟର ରିଅଲ ଇଷ୍ଟେଟ୍ କ୍ଷେତ୍ରରେ ଉନ୍ନତି ଆଣିବା ଲାଗି ସରକାରଙ୍କ ଉଦ୍ୟମକୁ ଏହା ବେଶ୍ ସହାୟକ ହୋଇଥିବା ବେଳେ ରିଅଲ ଇଷ୍ଟେଟ୍ କ୍ଷେତ୍ରର ସନ୍ତୁଳିତ ଅଭିବୃଦ୍ଧି ଲାଗି ଏହି ଅଧ୍ୟାଦେଶ ଏକ ମାଇଲଖୁଣ୍ଟ ସଦୃଶ ହେବ ବୋଲି କ୍ରେଡାଇ ପକ୍ଷରୁ କୁହାଯାଇଛି। ଏହି ପରିପ୍ରେକ୍ଷୀରେ କ୍ରେଡାଇ ଓଡ଼ିଶାର ଅଧ୍ୟକ୍ଷ ଡି.ଏସ୍.ତ୍ରିପାଠୀ, ସଭାପତି ସ୍ବଦେଶ କୁମାର ରାଉତରାୟ, ଉପସଭାପତି ଉମେଶ ଖଣ୍ଡେଲଓ୍ବାଲ, ନବୀନ କାଣ୍ଡୋଇ,ଉମାଶଙ୍କର ପାଣିଗ୍ରାହୀ,ସମ୍ପାଦକ ଅନିଲ କୁମାର ଅଗ୍ରଓ୍ବାଲ, କୋଷାଧ୍ୟକ୍ଷ ବିଭୁଚନ୍ଦନ ଜେନା, କ୍ରେଡାଇ କଟକର ସଭାପତି ପି.ଆର୍. ମହାରଣା,କ୍ରେଡାଇ ଭୁବନେଶ୍ୱର କୋଷାଧ୍ୟକ୍ଷ ସୂର୍ଯ୍ୟକାନ୍ତ ବେହେରା ଓ କ୍ରେଡାଇ ଇଷ୍ଟ ଜୋନ୍ର ସଂଯୋଜିକା ସୋଫିଆ ଫିର୍ଦୋସ୍ ପ୍ରମୁଖ ଉପସ୍ଥିତ ଥିଲେ।
