ବରଗଡ/ବରପାଲି,୧୫।୧(ପ୍ରେମାନନ୍ଦ ଖମାରୀ/ଚିତ୍ତରଞ୍ଜନ ସାହୁ):ବରଗଡ ଜିଲାରେ ଧାନ ବିକ୍ରିବଟା ସମସ୍ୟା ଲାଗି ରହିଛି। ଆଉ ୩ଦିନ ପରେ ଜିଲାରେ ଖରିଫ ଧାନ ସଂଗ୍ରହ ପ୍ରକ୍ରିୟାକୁ ୩ମାସ ପୂରିବ। ହେଲେ ଏବେ ମଧ୍ୟ ଅନେକ ମଣ୍ଡିରେ ଧାନବିକ୍ରି ସମସ୍ୟା ଅସମାହିତ ରହିଛି। ଧାନବିକ୍ରି ହେବା ତ ଦୂରର କଥା, ଏପର୍ଯ୍ୟନ୍ତ ଅନେକ ଚାଷୀଙ୍କ ପାଖକୁ ଧାନବିକ୍ରି ଟୋକନ ପହଞ୍ଚି ନାହିଁ। ସେହିପରି ମଣ୍ଡିରେ ଧାନ ଉଠାଣ ମନ୍ଥର ଗତିରେ ଚାଲିଥିବା ଯୋଗୁ ବିଭିନ୍ନ ମଣ୍ଡିରେ ବିକ୍ରି ଅପେକ୍ଷାରେ ବହୁ ପରିମାଣରେ ଧାନ ପଡିରହିଛି। ଅନ୍ୟପଟେ ଖରିଫ ଅମଳ ଧାନ ବିକ୍ରି କରିପାରି ନ ଥିବା ଯୋଗୁ ରବିଚାଷ କିଭଳି କରିବେ, ଜିଲାର ଚାଷୀମାନଙ୍କୁ ଏବେ ସେହି ଚିନ୍ତା ଘାରିଛି। ବୁଧବାର ସଂଯୁକ୍ତ କୃଷକ ସଙ୍ଗଠନର ଏକ ପ୍ରତିନିଧି ଦଳ ବରପାଲି ବ୍ଲକ ଅନ୍ତର୍ଗତ ବିଭିନ୍ନ ମଣ୍ଡି ପରିଦର୍ଶନରେ ଯାଇଥିଲେ। ସେଠାରେ ଧାନବିକ୍ରି ଅବ୍ୟବସ୍ଥା ଦେଖି ଚାଷୀ ପ୍ରତିନିଧିମାନେ ଉଦ୍ବେଗ ପ୍ରକାଶ କରିବା ସହିତ ଚଳିତ ମାସ ଶେଷସୁଦ୍ଧା ଚାଷୀଙ୍କ ସମସ୍ତ ଅମଳ ଧାନ କିଣିବା ଦିଗରେ ପଦକ୍ଷେପ ନେବା ପାଇଁ ସରକାରଙ୍କଠାରେ ଦାବି କରିଛନ୍ତି। ଚାଷୀ ପ୍ରତିନିଧିବୃନ୍ଦ କଟାପାଲି, ବରପାଲି, ତୁଳଣ୍ଡି, କୁମ୍ଭାରୀ ଆଦି ମଣ୍ଡି ପରିଦର୍ଶନ କରିଥିଲେ। ଧାନବିକ୍ରି କ୍ଷେତ୍ରରେ ଚାଷୀଙ୍କୁ ଅନେକ ଅସୁବିଧା ହଇରାଣ ହେବାକୁ ପଡୁଛି ଏବଂ ଅତି ମନ୍ଥର ଗତିରେ ଧାନ କିଣା ଯାଉଛି ବୋଲି ଚାଷୀ ପ୍ରତିନିଧିମାନେ କହିଛନ୍ତି। ପ୍ରକୃତ ଚାଷୀ ଟୋକନ ମାଧ୍ୟମରେ ଧାନ ଆଣୁଥିଲେ ସୁଦ୍ଧା ଏଭଳି ହଟହଟା ହେଉଛନ୍ତି ବୋଲି ସଂଯୁକ୍ତ କୃଷକ ସଙ୍ଗଠନର ପ୍ରତିନିଧିମାନେ ପ୍ରକାଶ କରିଛନ୍ତି। ସଙ୍ଗଠନର ପ୍ରତିନିଧିମାନେ କହିଛନ୍ତି, କୁମ୍ଭାରୀ ମଣ୍ଡିରେ ୪୦ହଜାର କୁଇଣ୍ଟାଲ ଧାନ ବିକ୍ରି କରିବା ପାଇଁ ୮୩୧ ଜଣ ଚାଷୀ ଜମି ପଞ୍ଜୀକରଣ କରିଥିଲେ। ସେମାନଙ୍କ ମଧ୍ୟରୁ ୭୩୦ ଜଣଙ୍କ ଟୋକନ ଆସିଛି। ଅନ୍ୟ ୧୦୧ଜଣ ଚାଷୀଙ୍କ ଟୋକନ ଏପର୍ଯ୍ୟନ୍ତ ଆସି ନାହିଁ। ସେହିପରି ତୁଳଣ୍ଡି ମଣ୍ଡିରୁ ଗତ ବର୍ଷ ୨୫ହଜାର କୁଇଣ୍ଟାଲ ଧାନ କିଣା ଯାଇଥିଲା। ଚଳିତବର୍ଷ ଏହି ମଣ୍ଡିରୁ ମାତ୍ର ୫୮୩୮ କୁଇଣ୍ଟାଲ ଧାନ କିଣା ଯାଇଛି ଏବଂ ୮୬୩୮ ପକେଟ ଧାନ ମଣ୍ଡିରେ ପଡ଼ି ରହିଛି। ଅତଏବ ଚାଷୀମାନେ ଟୋକନ ଆଧାରରେ ମଣ୍ଡିରେ ଧାନ ପକାଇଥିଲେ ମଧ୍ୟ ଦିନିକିଆ ନିୟନ୍ତ୍ରିତ କୋଟା କାରଣରୁ ଧାନ କିଣାଯାଇ ପାରୁ ନାହିଁ ବୋଲି ସଙ୍ଗଠନର ପ୍ରତିନିଧିବୃନ୍ଦ କହିଛନ୍ତି। ଏହି ପ୍ରତିନିଧି ଦଳରେ ସଂଯୁକ୍ତ କୃଷକ ସଙ୍ଗଠନର ଉପଦେଷ୍ଟା ରମେଶ ମହାପାତ୍ର, ତପନ ମିଶ୍ର, ତୁଳଣ୍ଡି ମଣ୍ଡିର ବନବାସ ସାହୁ, ହରଧାର ସାହୁ, ସୁବଳ ଶତପଥି, ଶ୍ରୀବତ୍ସ ବେରିଆ, ନିରାକାର ଦୀପ ପ୍ରମୁଖ ଉପସ୍ଥିତ ଥିଲେ।
Dharitri – Odisha’s No.1 Odia Daily
