ରାଉରକେଲା,୨୫।୬(ବିପ୍ଳବ ରଞ୍ଜନ ଦାଶ)ରାଉରକେଲା ସହକାରୀ ଉଦ୍ୟାନ ବିଭାଗରେ ବହୁ ପଦବୀ ଖାଲି ପଡିଛି। ଫଳରେ ସୀମିତ କର୍ମଚାରୀଙ୍କୁ ନେଇ ବିଭାଗୀୟ କାର୍ଯ୍ୟ କରିବାରେ ନାନା ସମସ୍ୟା ଉପୁଜୁଛି। ଅନ୍ୟପକ୍ଷେ କର୍ମଚାରୀ ଅଭାବ ଯୋଗୁ ସ୍ଥାନୀୟ ଉଦ୍ୟାନ ଚାଷୀମାନଙ୍କୁ ଆଧୁନିକ ଜ୍ଞାନକୌଶଳ ମିଳିପାରୁନାହିଁ। ଏ ଦିଗରେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ବିହିତ ପଦକ୍ଷେପ ଗ୍ରହଣ କରିବାକୁ ଅଞ୍ଚଳର ଉଦ୍ୟାନ ଚାଷୀମାନେ ଦାବି କରିଛନ୍ତି।
ସୂଚନା ଅନୁସାରେ, ରାଉରକେଲା ସହକାରୀ ଉଦ୍ୟାନ ବିଭାଗ ଅଧୀନରେ ରାଉରକେଲା ସମେତ ନୂଆଗଁା, କୁଆଁରମୁଣ୍ଡା, ବିଶ୍ରା ଓ ଲାଠିକଟା ଆଦି ଉଦ୍ୟାନ କାର୍ଯ୍ୟାଳୟ ରହିଛି। ପ୍ରତ୍ୟେକ କାର୍ଯ୍ୟାଳୟରେ ଜଣେ ଲେଖାଏ ଉଦ୍ୟାନ ଅଧିକାରୀ ରହିବା କଥା। ମାତ୍ର ଏଠାରେ ଜଣେ ଜଣେ ଉଦ୍ୟାନ ଅଧିକାରୀ ତିନୋଟି କାର୍ଯ୍ୟାଳୟ ଦାୟିତ୍ୱ ତୁଲାଉଛନ୍ତି। ବର୍ଷ ବର୍ଷ ଧରି ଅଧିକାରୀ ପଦବୀ ପୂରଣ ହେଉନାହିଁ। ଜଣେ ଉଦ୍ୟାନ ଅଧିକାରୀ ରାଉରକେଲା, ଲାଠିକଟା ଓ ବିଶ୍ରା ଅଫିସ ଦାୟିତ୍ୱରେ ରହିଥିବା ବେଳେ ଅନ୍ୟ ଦୁଇଟି ସ୍ଥାନରେ ୨ଜଣ ମହିଳା ଉଦ୍ୟାନ ଅଧିକାରୀ କାର୍ଯ୍ୟ କରୁଛନ୍ତି। ସେହିପରି ଦୀର୍ଘବର୍ଷ ହେଲା ଅନ୍ୟ ପଦପଦବୀ ଖାଲି ପଡିଛି। ଫଳରେ ରାଉରକେଲା ସହକାରୀ ଉଦ୍ୟାନ ବିଭାଗ ଅଧୀନ ୩୦ଏକର ଜମି ପରିମିତ ଫାର୍ମର ଠିକ୍ ଭାବେ ରକ୍ଷଣାବେକ୍ଷଣ ହୋଇପାରୁନାହିଁ। କେବଳ ଜଣେ ଉଦ୍ୟାନ ନିର୍ଦ୍ଦେଶକ, ୩ ଏଚ୍ଓ, ୩ ଓଭରସିୟର, ଜଣେ ଏଚ୍ଇଡବ୍ଲ୍ୟୁ ଓ ଜଣେ ଜୁନିୟର ଆସିଷ୍ଟାଣ୍ଟଙ୍କ ଭରସାରେ ରାଉରକେଲା ସହକାରୀ ଉଦ୍ୟାନ ବିଭାଗ ଅଧୀନ ୫ଟି ଉଦ୍ୟାନ ବିଭାଗ ଚାଲିଛି। ସ୍ଥାନୀୟ ଉଦ୍ୟାନ ଚାଷୀମାନଙ୍କ ଆର୍ଥିକ ଅଭିବୃଦ୍ଧି ପାଇଁ ବିଭିନ୍ନ ସରକାରୀ ଯୋଜନା କରାଯାଉଥିବା ବେଳେ ଅଧିକାରୀ ଓ କର୍ମଚାରୀଙ୍କ ଅଭାବ ଯୋଗୁ ଯୋଜନାର ସୁଫଳ ଉଦ୍ୟାନ ଚାଷୀଙ୍କୁ ମିଳୁନାହିଁ। ସେହିପରି ଉଦ୍ୟାନ ଚାଷୀଙ୍କୁ ଉଦ୍ୟାନ ଚାଷ ଜନିତ ଆଧୁନିକ ଜ୍ଞାନକୌଶଳ ପ୍ରଦାନ ପାଇଁ ଡେମନଷ୍ଟ୍ରେଶନ ଆସିଷ୍ଟାଣ୍ଟ ଏବଂ ଟେକ୍ନିକାଲ ଆସିଷ୍ଟାଣ୍ଟ ନାହାନ୍ତି। ଏ ସମ୍ପର୍କରେ ପାନପୋଷ ଉଦ୍ୟାନ ବିଭାଗ ନିର୍ଦ୍ଦେଶକ ଦୁଷନ୍ତ ବେହେରାଙ୍କୁ ପଚାରିବାରୁ ସେ କହିଲେ, ବିଭାଗରେ ବହୁ ପଦ ପଦବୀ ଦୀର୍ଘ ବର୍ଷରୁ ଖାଲି ପଡିଛି। ଏ ବାବଦରେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଯାଇଛି। ଆଗକୁ ଖାଲି ପଦବୀ ପୂରଣ ହେବା ଆଶା ରହିଛି ବୋଲି ସେ କହିଥିଲେ।
