ପାଟଣା,୧୭ା୨(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ୨୧ ନମ୍ବର ଜିଲା ପରିଷଦ ଅନ୍ତର୍ଗତ କଣ୍ଟିଆପଡ଼ା ପଞ୍ଚାୟତ ବଲାଣିପଶି ଗାଁରେ ବୁଧବାର ରାତି ଅଧରେ ରାଜନୈତିକ ହଟଚମଟ ସୃଷ୍ଟି ହୋଇଛି। ୨ ଜଣ ଭାଜପା କର୍ମୀଙ୍କୁ ଘରୁ ପୋଲିସ ଉଠାଇ ଆଣିବାକୁ ଯାଇ ହଟହଟା ହୋଇଛି।
ସୂଚନାନୁଯାୟୀ, ବଲାଣିପଶି ଗାଁର ଏକ ରାଜନୈତିକ ଦଳର ୨ ଯୁବକ ବୁଧବାର ରାତି ଗୋଟାଏରେ ଭୋଟରଙ୍କୁ ଟଙ୍କା ବାଣ୍ଟୁଥିବାର ଅଭିଯୋଗ ପାଇ ତୁରୁମୁଙ୍ଗା ପୋଲିସ ଅଳ୍ପ ସଂଖ୍ୟକ କର୍ମଚାରୀଙ୍କୁ ନେଇ ସେମାନଙ୍କ ମଧ୍ୟରୁ ଜଣଙ୍କୁ ଥାନା ଗାଡ଼ିରେ ଆଣି ଆଉ ଜଣଙ୍କୁ ଗାଡ଼ିରେ ଆଣୁ ଥିବା ବେଳେ ପ୍ରଥମ ବ୍ୟକ୍ତି ପରିସ୍ରା ବାହାନା କରି ଦୌଡ଼ି ପଳାଇ ରାତି ଅଧରେ ଘରଘର ବୁଲି କବାଟ କବାଟ ବାଡ଼େଇ ପୋଲିସ ଉଠାଇ ନେଉଥିବା କହିଥିଲେ। ଫଳରେ ଭାଜପାର କେତେକ କର୍ମୀଙ୍କ ସହ ଗାଁଲୋକେ ପୋଲିସକୁ ଘେରି ରହିଥିଲେ। ତୁରୁମୁଙ୍ଗା ଥାନାକଧିକାରୀଙ୍କ ସହ ଅନ୍ୟ ୨ ପୋଲିସ କର୍ମଚାରୀଙ୍କୁ ବଲାଣିପଶି ଗାଁରେ ରାତି ତମାମ ଅଟକ ରଖିଥିଲେ। ପରେ ଖବର ପାଇ, ଚମ୍ପୁଆ ଏସ୍ଡିପିଓ ରାମରାୟ ମୁର୍ମୁ, ପାଟଣା ଥାନାଧିକାରୀ ରାଜେନ୍ଦ୍ର ସ୍ବାଇଁ,ଝୁମ୍ପୁରା ଥାନାଧିକାରୀ ବିରେନ୍ଦ୍ର ଶିଆଳ ଓ ଅନ୍ୟ ପୋଲିସ ଅଧିକାରୀ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଶୁଝା କରିବା ପରେ ତୁରୁମୁଙ୍ଗା ପୋଲିସଙ୍କୁ ଉଦ୍ଧାର କରିଛନ୍ତି।
