ଶ୍ରୀନଗର,୧୪।୭: ଶହୀଦ ଦିବସକୁ ନେଇ ଜମ୍ମୁ କଶ୍ମୀରରେ ଆରମ୍ଭ ହୋଇଥିବା ବିବାଦ ଥମିବାର ନାଁ ନେଉନାହିଁ। ପ୍ରଶାସନ ଅନେକ ନେତାଙ୍କୁ ଗୃହବନ୍ଦୀ କରିଥିଲା ଏବଂ ଅନେକଙ୍କୁ ଗିରଫ କରିଥିଲା। ଏହା ସହିତ ଜମ୍ମୁ କଶ୍ମୀର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲାଙ୍କୁ ଫାତିହା ପାଠ କରିବାରୁ ବାରଣ କରାଯାଇଥିବା ଅଭିଯୋଗ ହୋଇଛି। ତାଙ୍କୁ ଅଟକାଇବା ପରେ, ସେ ମଜାର-ଏ-ଶୁହାଦାର ସୀମା କାନ୍ଥ ଡେଇଁ ଫାତିହା ପାଠ କରିବାକୁ ଯାଇଥିଲେ। ଏହି ସମୟରେ ତାଙ୍କ ଏବଂ ପୋଲିସଙ୍କ ମଧ୍ୟରେ ସଂଘର୍ଷ ହୋଇଥିଲା।
ମୁଖ୍ୟମନ୍ତ୍ରୀ ଅଭିଯୋଗ କରିଛନ୍ତି, ପୋଲିସ ମୋତେ ଶାରୀରିକ ନିର୍ଯାତନା ଦେଇଛି, କିନ୍ତୁ ମୁଁ ଦୃଢ଼ ଥିଲି। ମୁଁ କୌଣସି ବେଆଇନ କାମ କରୁ ନ ଥିଲି। ଏହି ‘ଆଇନର ରକ୍ଷକ’ ମାନଙ୍କୁ ସ୍ପଷ୍ଟ କରିବାକୁ ପଡିବ ଯେ, ସେମାନେ କେଉଁ ଆଇନ ଅନୁଯାୟୀ ଆମକୁ ଫାତିହା ପାଠ କରିବାରୁ ବାରଣ କରିବାକୁ ଚେଷ୍ଟା କରିଥିଲେ। ଏହି ଘଟଣା ପୋଲିସର ମନମାନୀ ଏବଂ ଧାର୍ମିକ ସ୍ବାଧୀନତାର ଉଲ୍ଲଂଘନର ଏକ ସ୍ପଷ୍ଟ ଉଦାହରଣ। ଏହି ଅଭିଜ୍ଞତା ବହୁତ ଯନ୍ତ୍ରଣାଦାୟକ ଏବଂ ନିରାଶାଜନକ ହୋଇଛି। ମୁଖ୍ୟମନ୍ତ୍ରୀ ପୋଲିସ ଉପରେ ମଧ୍ୟ ଧସ୍ତାଧସ୍ତିର ଅଭିଯୋଗ କରିଛନ୍ତି।
ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ଭିଡିଓ ମଧ୍ୟ ଶେୟାର କରିଛନ୍ତି, ଯେଉଁଥିରେ ପୋଲିସ ମୁଖ୍ୟମନ୍ତ୍ରୀଙ୍କୁ ଅଟକାଇବାକୁ ଚେଷ୍ଟା କରୁଥିବାର ଦେଖାଯାଉଛି।
ପରେ ଓମାର ଅବଦୁଲ୍ଲା କହିଛନ୍ତି, ଏହା ବହୁତ ଦୁଃଖଦ ଯେ, ସେହି ଲୋକମାନେ ଯେଉଁମାନେ ନିଜେ ଦାବି କରନ୍ତି ଯେ ସେମାନଙ୍କର ଦାୟିତ୍ୱ କେବଳ ସୁରକ୍ଷା ଏବଂ ଆଇନ ଶୃଙ୍ଖଳା, କିନ୍ତୁ ଆମକୁ ଏଠାକୁ ଆସି ଫାତିହା ପାଠ କରିବାକୁ ଦିଆଯାଇ ନ ଥିଲା। ସମସ୍ତଙ୍କୁ ସେମାନଙ୍କ ଘରେ ବନ୍ଦ କରି ରଖାଯାଇଥିଲା। ଯେତେବେଳେ ଫାଟକ ଖୋଲିବା ଆରମ୍ଭ ହେଲା, ମୁଁ ନିୟନ୍ତ୍ରଣ କକ୍ଷକୁ କହିଲି ଯେ, ମୁଁ ଏଠାକୁ ଆସିବାକୁ ଚାହୁଁଛି, ତା’ପରେ କିଛି ମିନିଟ ମଧ୍ୟରେ ମୋ ଫାଟକ ବାହାରେ ଏକ ବଙ୍କର ରଖାଯାଇଥିଲା। ରାତି ୧୨-୧ଟାଏ ପର୍ଯ୍ୟନ୍ତ ଏହାକୁ ହଟାଯାଇ ନ ଥିଲା। ଆଜି ମୁଁ ସେମାନଙ୍କୁ କହି ନ ଥିଲି, ମୁଁ ସେମାନଙ୍କୁ ନ କହି ଗାଡ଼ିରେ ବସିଥିଲି। ସେମାନଙ୍କର ନିର୍ଲଜ୍ଜତା ଦେଖନ୍ତୁ, ଆଜି ମଧ୍ୟ ସେମାନେ ଆମକୁ ଅଟକାଇବାକୁ ଚେଷ୍ଟା କରିଥିଲେ।
ସେ କହିଥିଲେ ଯେ, ମୁଁ ଜାଣିବାକୁ ଚାହୁଁଛି ଯେ ମୋତେ କେଉଁ ଆଇନ ଅନୁଯାୟୀ ଅଟକାଯାଇଥିଲା। ଏହା ଏକ ସ୍ବାଧୀନ ଦେଶ, କିନ୍ତୁ ସେମାନେ ଭାବନ୍ତି ଯେ ଆମେ ସେମାନଙ୍କର ଦାସ। ଆମେ କାହାର ଦାସ ନୁହଁ। ଆମେ କେବଳ ଏଠାକାର ଲୋକଙ୍କ ଦାସ। ଆମେ ସେମାନଙ୍କର ପ୍ରୟାସକୁ ବିଫଳ କରିଦେଲୁ। ସେମାନେ ଆମର ପତାକା ଚିରିବାକୁ ଚେଷ୍ଟା କରିଥିଲେ, କିନ୍ତୁ ଆମେ ଏଠାକୁ ଆସି ଫାତିହା ପାଠ କରିଥିଲୁ।
