ବାଲେଶ୍ୱର,୧୩।୮(ବାଞ୍ଛାନିଧି ଦେ): ବାଲେଶ୍ୱର ସଦର ଥାନା ପୋଲିସକୁ ମିଳିଛି ବଡ ସଫଳତା । ବିଳମ୍ବିତ ରାତିରେ ଫୁଲାଡି ନିକଟରେ ଡକାୟତି ଯୋଜନା କରୁଥିବା ବେଳେ ପୋଲିସ ପକ୍ଷରୁ ଚଢ଼ାଉ ହୋଇଛି । ଘଟଣାସ୍ଥଳରୁ ୪ ଜଣ ଅଭିଯୁକ୍ତଙ୍କୁ ପୋଲିସ ଗିରଫ କରିବାରେ ସମର୍ଥ ହୋଇଥିବାବେଳେ ଜଣେ ଫେରାର ହୋଇଯାଇଛନ୍ତି। ଗିରଫ ଅଭିଯୁକ୍ତ ହେଲେ ଏହି ଥାନା ଅଧୀନ ପାରିକୁଳ ଗ୍ରାମର ବଣ୍ଟି ଓରଫ ଦେବବ୍ରତ ମହାପାତ୍ର, ରଜତ ମହାପାତ୍ର, ସାନୁ ମହାଳିକ ଓ ରାମଚନ୍ଦ୍ର ସେଠୀ । ସେମାନଙ୍କଠାରୁ ଗୋଟିଏ ତେଲେଙ୍ଗା କଟୁରୀ, ସ୍କେଚ ମ୍ୟାପ, ୩ଟି ମୋବାଇଲ, ଗୋଟିଏ ସୁତୁଲି ବୋମା ଜବଦ ହୋଇଛି। ସମ୍ପର୍କରେ ପୋଲିସ ଏକ ମାମଲା ନଂ୩୧୯/୨୫ ରୁଜୁ କରି ୪ ଅଭିଯୁକ୍ତଙ୍କୁ ମଙ୍ଗଳବାର କୋର୍ଟ ଚାଲାଣ କରିଛି । ଅନ୍ୟ ଜଣେ ଅଭିଯୁକ୍ତ ନଗ୍ରମ ଗ୍ରାମର ବିକି ଓରଫ ସାଇସୁମନ ରାଉତ ବନ୍ଧୁକ ସହ ଘଟଣାସ୍ଥଳରୁ ଚମ୍ପଟ ମାରିଛି। ଅଭିଯୁକ୍ତଙ୍କ ନାମରେ ବସ୍ତା, ସଦର, ଶିଳ୍ପାଞ୍ଚଳ ଓ ନୀଳିଗିରି ଥାନାରେ ବିଭିନ୍ନ ଅପରାଧିକ ମାମଲା ରହିଥିବା ପୋଲିସ କହିଛି। ଏକ ବଡଧରଣର ଡକାୟତି କରିବା ପାଇଁ ଅଭିଯୁକ୍ତମାନେ ୧୬ ନଂ ଜାତୀୟ ରାଜପଥର ଫୁଲାଡି ନିକଟରେ ଯୋଜନା କରୁଥିଲେ। ବିଶ୍ୱସ୍ତ ସୂତ୍ରରୁ ଖବର ପାଇ ଆଇଆଇସି ସାଲଖାନ ମୁର୍ମୁ, ହଳଦୀପଦା ଫାଣ୍ଡି ଅଧିକାରୀ ସଦଳବଳେ ସେଠାରେ ଚଢ଼ାଉ କରିଥିଲେ ।
