ରଘୁନାଥପୁର,୨।୭(ରାଜେନ୍ଦ୍ର ନାରାୟଣ ସିଂହ)ରଘୁନାଥପୁର ଥାନା କୋଟକଣା ଗ୍ରାମର ଶରତ ଚନ୍ଦ୍ର ସ୍ବାଇଁ(୭୫)ଙ୍କୁ ଜୁନ ୧୫ରେ ମରଣାନ୍ତକ ଆକ୍ରମଣ ହୋଇଥିଲା। ଏ ସମ୍ପର୍କରେ ସ୍ତ୍ରୀ ସରୋଜିନୀ ରଘୁନାଥପୁର ଥାନାରେ ପୁତୁରା କୃତ୍ତିବାସ ସ୍ବାଇଁଙ୍କ ସହାୟତାରେ ଅଭିଯୋଗ କରିଥିଲେ। ମାତ୍ର ଏହି ମାମଲାରେ ପୋଲିସ ମୁଖ୍ୟ ଅଭିଯୁକ୍ତଙ୍କୁ ଖସାଇ ଦେବା ସହ ଅନ୍ୟ ୨ ଅଭିଯୁକ୍ତଙ୍କ ବିରୋଧରେ କୋହଳ ଦଫା ଲଗାଇଛି ବୋଲି ସ୍ତ୍ରୀ ସରୋଜିନୀ ସ୍ବାଇଁ ଅଭିଯୋଗ କରିଛନ୍ତି। ଏ ସମ୍ପର୍କରେ ସେ ଜଗତ୍ସିଂହପୁର ଏସ୍ପିଙ୍କୁ ଭେଟି ଗୁହାରି କରିଛନ୍ତି। ଇତିମଧ୍ୟରେ ୧୪ ଦିନ ବିତିଯାଇଥିଲେ ମଧ୍ୟ ତାଙ୍କୁ ନ୍ୟାୟ ମିଳୁ ନାହିଁ ବୋଲି ସରୋଜିନୀ କହିଛନ୍ତି। ଜୀବନରୁ ମାରିଦେବାକୁ ଧମକ ମିଳିଥିବାରୁ ସରୋଜିନୀ ପରଘରେ ଆଶ୍ରୟ ନେଇଥିବାବେଳେ ସ୍ବାମୀ ଶରତ ଝିଅଘରେ ରହି ଚିକିତ୍ସିତ ହେଉଛନ୍ତି।
ସରୋଜିନୀଙ୍କ କହିବା ଅନୁଯାୟୀ, ପୁଅ ମନୋଜଙ୍କ ମୃତ୍ୟୁ ପରେ ବୋହୂ ବିଭିନ୍ନ ସମୟରେ ସେମାନଙ୍କୁ ହଇରାଣ କରୁଥିଲେ। ଏପରିକି ଶ୍ୱଶୁର ପାଇଥିବା ଇନ୍ଦିରା ଆବାସ ଘରେ ବୋହୂ ରହୁଥିବା ବେଳେ ସରୋଜିନୀ ଓ ଶଙ୍କର ଏକ ଭଗ୍ନ ଚାଳଘରେ ରହୁଥିଲେ। ବୃଦ୍ଧ ଦମ୍ପତି ଉକ୍ତ ଘରକୁ ଛପର କରିବାକୁ ଉଦ୍ୟମ କରିବାରୁ ସେମାନଙ୍କୁ ଧମକ ଦିଆଯାଇ ଏହା କରିବାକୁ ଦିଆଯାଇ ନ ଥିଲା। ଫଳରେ ସେମାନେ ପଡ଼ୋଶୀ ମିନତୀ ପୃଷ୍ଟିଙ୍କ ଘରେ ରହିବାକୁ ବାଧ୍ୟ ହୋଇଥିଲେ। ଗତ ରଜ ସଂକ୍ରାନ୍ତିରେ ସକାଳୁ ବୋହୂ ଓ ବୋହୂର ଭାଇ ସଞ୍ଜୟ ରାଉତ ଓ ବାପା ଘନିଆ ରାଉତ ମିଳିତ ଭାବେ ସେମାନଙ୍କୁ ଆକ୍ରମଣ କରିଥିଲେ। ଶରତଙ୍କୁ ଘୋଷାଡ଼ି ତାଙ୍କ ଉପରେ ଚଢ଼ିଯିବା ସହ ମୁଣ୍ଡକୁ କଂକ୍ରିଟ୍ ରାସ୍ତାରେ ଛେଚି ଦେଇଥିଲେ।
ଏହାଦେଖି ସରୋଜିନୀ ଚିତ୍କାର କରି ଡାକିବାରୁ ବୋହୂ ତାଙ୍କୁ ମାରିଥିଲେ ବୋଲି ଏସପିଙ୍କୁ ଦେଇଥିବା ଅଭିଯୋଗରେ ସେ ଦର୍ଶାଇଛନ୍ତି। ଥାନାରେ ବୃଦ୍ଧ ଦମ୍ପତି ୩ ଜଣଙ୍କ ନାମରେ ଲିଖିତ ଅଭିଯୋଗ କରିଥିଲେ ସୁଦ୍ଧା ପୋଲିସ ବୋହୂଙ୍କ ନାମ ଅଭିଯୋଗରୁ କାଟି ଦେବା ପାଇଁ କହିଥିଲେ ବୋଲି ସରୋଜିନୀ ଓ ସାଙ୍ଗରେ ଯାଇଥିବା ପୁତୁରା କୃତ୍ତିବାସ ଅଭିଯୋଗ କରିଛନ୍ତି। ଏହାଛଡା ଜଣେ ବୃଦ୍ଧଙ୍କ ମୁଣ୍ଡକୁ ରାସ୍ତାରେ ଛେଚି ମାରିଦେବା ପାଇଁ ଉଦ୍ୟମ କରାଯାଇଥିବାବେଳେ ପୋଲିସ ୩୦୭ ଦଫା ନ ଲଗାଇ ମାମଲା (ନଂ. ୧୭୦/୨୩) ରୁଜୁ କରିଛି ବୋଲି ପ୍ରତ୍ୟକ୍ଷଦର୍ଶୀ ବିଜୟ କୁମାର ବାରିକ, ରଞ୍ଜନ କୁମାର ସ୍ବାଇଁ, ଶମ୍ଭୁନାଥ ଜେନା, ସରୋଜ ସ୍ବାଇଁ ଓ ମିନତୀ ପୃଷ୍ଟି ପ୍ରକାଶ କରିଛନ୍ତି। ଏ ସମ୍ପର୍କରେ ଆଇଆଇସି ସୁଶାନ୍ତ କୁମାର ସେଠୀଙ୍କୁ ପଚାରିବାରେ, ଅଭିଯୋଗ ଅନୁଯାୟୀ, ଅଭିଯୁକ୍ତଙ୍କ ନାମରେ ମାମଲା କରାଯାଇଛି। ତଦନ୍ତ ସମୟରେ ଏଥିରେ ସମ୍ପୃକ୍ତ ଥିବା ଅନ୍ୟ ବ୍ୟକ୍ତିଙ୍କ ନାମ ମଧ୍ୟ ଯୋଡାଯାଇପାରିବ। ଏହାଛଡା ବୃଦ୍ଧ ଦମ୍ପତିଙ୍କୁ ଆହତ ସମ୍ପର୍କିତ ରିପୋର୍ଟ ଦେବାକୁ କୁହାଯାଇଛି। ଏହାପରେ ଅଧିକ ଦଫା ମଧ୍ୟ ଲଗାଯାଇପାରିବ ବୋଲି ଆଇଆଇସି ସେଠୀ ପ୍ରକାଶ କରିଛନ୍ତି।
