କେନ୍ଦ୍ରାପଡ଼ା ଅଫିସ,୧୨।୧୨: କେନ୍ଦ୍ରାପଡ଼ା ଜିଲା ମହାକାଳପଡ଼ା, ରାଜନଗର ଓ ରାଜକନିକା ବ୍ଲକରେ ଗତ ୪ରୁ ୬ ତାରିଖ ମଧ୍ୟରେ ୪୭୭ ମିଲିମିଟର ବର୍ଷା ହୋଇଛି । ଏଥିରେ ଚିଙ୍ଗୁଡ଼ି ଘେରିରୁ ପାଣି ଉଛୁଳି ନିକଟସ୍ଥ ଖରିଫ ଚାଷକୁ ନଷ୍ଟ କରିଛି । ଏନେଇ ୩ ବ୍ଲକ ଅଞ୍ଚଳର ଚାଷୀ ଓ ଚିଙ୍ଗୁଡ଼ି ଘେରି ମାଲିକ ମୁଁହାମୁହିଁ ହୋଇଛନ୍ତି । ଶୁକ୍ରବାର ମହାକାଳପଡ଼ା ବ୍ଲକ ପେଟଛେଲାର କେତେଜଣ ବ୍ୟକ୍ତି ଜିଲା ପ୍ରଶାସନର ଦ୍ୱାରସ୍ଥ ହୋଇଛନ୍ତି । ଚିଙ୍ଗୁଡ଼ି ଘେରି ଚାଷୀଙ୍କ ପାଇଁ ଦୁଃଖ ବୋଲି ସେମାନେ କହିଛନ୍ତି। ବର୍ଷାଜନିତ କ୍ଷୟକ୍ଷତି ଅନୁଧ୍ୟାନ ପାଇଁ ରବିବାର ଆସୁଥିବା କେନ୍ଦ୍ରୀୟ ଦଳକୁ ଘେରି ଅଞ୍ଚଳରେ ଅନୁଧ୍ୟାନ ପାଇଁ ନେବାକୁ ଜିଲା ପ୍ରଶାସନ ନିକଟରେ ସେମାନେ ଦାବି କରିଛନ୍ତି । ଚିଙ୍ଗୁଡ଼ି ଘେରି ସମସ୍ୟାର ସ୍ଥାୟୀ ସମାଧାନ ପାଇଁ ଏଡିଏମ୍ଙ୍କୁ ସମ୍ପୃକ୍ତ ବ୍ୟକ୍ତିମାନେ ଅନୁରୋଧ କରି ଦାବିପତ୍ର ପ୍ରଦାନ କରିଛନ୍ତି ।
ଏହି ପରିପ୍ରେକ୍ଷୀରେ ମହାକାଳପଡ଼ାର ସୁନିଲ କୁମାର ଗନ୍ତାୟତ କହିଛନ୍ତି, ଜାତୀୟ ଉଦ୍ୟାନ ଭିତରକନିକା ସମେତ ସ୍ଥାନୀୟ ଚାଷୀଙ୍କ ପାଇଁ ଚିଙ୍ଗୁଡ଼ି ଘେରି ବିପଦ ସାଜିଛି। ଘେରିରୁ ଆସୁଥିବା ଲୁଣି ପାଣି ଚାଷ ଜମିକୁ ନଷ୍ଟ କରୁଛି । ଘେରିରେ ଉନ୍ନତ ଓ ଅଧିକ ଚିଙ୍ଗୁଡ଼ି ଅମଳ ପାଇଁ ରାସାୟନିକ ପଦାର୍ଥ ବ୍ୟବହାର ହେଉଛି । ପୋଖରୀରେ ପାଣି ବଦଳାଇବା ସମୟରେ ଏହି ପାଣିକୁ ନାଳ ମାଧ୍ୟମରେ ସମୁଦ୍ରକୁ ଛଡାଯାଉଛି। ରାସାୟନିକ ସାମଗ୍ରୀ ପାଇଁ ପରିବେଶ ନଷ୍ଟ ହେଉଛି । ଖରିଫ ଧାନ ସହିତ ଭିତରକନିକା ଜୈବ ବିବିଧତା ଉପରେ ଏହାର ପ୍ରଭାବ ପଡୁଛି । ଏନେଇ ଚାଷୀ ଓ ଚିଙ୍ଗୁଡ଼ି ଚାଷୀ ମୁହଁାମୁହିଁ ହେବା ସହିତ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେଉଛି। ରାଜନଗରର ଦୋଳଗୋବିନ୍ଦ ଜେନା କହିଛନ୍ତି, ଚିଙ୍ଗୁଡ଼ି ଘେରି ଉଚ୍ଛେଦ ପାଇଁ ଉଚ୍ଚ ନ୍ୟାୟାଳୟ ପକ୍ଷରୁ ଏକ ମାମଲା ହୋଇଛି। ଆମିକସକ୍ୟୁରୀ ମୋହିତ ଅଗ୍ରୱାଲ ଏହାକୁ ନେଇ ଚିନ୍ତା ପ୍ରକଟ କରିଛନ୍ତି । ଜିଲା ପ୍ରଶାସନ ତୁରନ୍ତ ବେଆଇନ ଚିଙ୍ଗୁଡ଼ି ଘେରିକୁ ଉଚ୍ଛେଦ କରିବାକୁ ସେ ନିର୍ଦ୍ଦେଶ ଦେଇଛନ୍ତି। ଜିଲାରେ ଏବେ ୧୫ ହଜାର ହେକ୍ଟରରୁ ଊର୍ଦ୍ଧ୍ୱ ଜମିରେ ଚିଙ୍ଗୁଡ଼ି ଘେରି ହୋଇଛି । ଗତ ଲଗାଣ ବର୍ଷାରେ ଏହି ଘେରିରୁ ପାଣି ବାହାରି ଚାଷ ଜମି ନଷ୍ଟ କରିଛି । ଜିଲା ପ୍ରଶାସନ ଘେରି ଉଚ୍ଛେଦ ନାମକୁମାତ୍ର କରୁଥିବା ସେ ଅଭିଯୋଗ କରିଛନ୍ତି । ଏସମ୍ପର୍କରେ ରାଜନଗରର ପ୍ରତ୍ୟୁଷ କୁମାର ନାୟକ କହିଛନ୍ତି, ଚଳିତବର୍ଷ ପ୍ରାୟ ୧୫ ଏକର ଜମିରେ ଖରିଫ ଧାନ ଫସଲ କରିଥିଲେ । ଗତ ଲଗାଣ ବର୍ଷାରେ ପାଟ ଜମି ଧୋଇ ଯାଇଥିବା ବେଳେ ଉଚ୍ଚ ଜମିରେ ଥିବା ଚିଙ୍ଗୁଡ଼ି ଘେରି ଫସଲକୁ ନଷ୍ଟ କରିଛି । ଜଳ ନିଷ୍କାସନ ବ୍ୟବସ୍ଥା ନ ଥିବାରୁ ଘେରିରୁ ଆସିଥିବା ଲୁଣା ପାଣି କ୍ଷେତ ଉଜାଡି ଦେଇଛି । ଚିଙ୍ଗୁଡ଼ି ଘେରି ସମସ୍ୟାର ସ୍ଥାୟୀ ସମାଧାନ ନ ହେଲେ ଆଗାମୀ ଦିନରେ ବହୁ ଚାଷୀ ଚାଷ ଛାଡିବାକୁ ବାଧ୍ୟ ହେବେ । ଜଣେ ଚିଙ୍ଗୁଡ଼ି ଘେରି ମାଲିକଙ୍କ କହିବା କଥା, ଘେରି ନିର୍ମାଣ ଏବେ ଲାଭଜନକ ବ୍ୟବସାୟ ପାଲଟିଛି । ଏଥିରେ ଯୁବବର୍ଗଙ୍କୁ କର୍ମ ନିଯୁକ୍ତି ମିଳୁଥିବା ବେଳେ ଜିଲାର ଅର୍ଥନୈତିକ ଅଭିବୃଦ୍ଧି ହେଉଛି । ରାଜ୍ୟ ସରକାର ଚିଙ୍ଗୁଡ଼ି ଚାଷ ପାଇଁ ବିଭିନ୍ନ ଯୋଜନା ପ୍ରଣୟନ କରୁଥିବା ବେଳେ ନିଜ ଜମିରେ ଚିଙ୍ଗୁଡ଼ି ଚାଷ ପାଇଁ ଅନୁମତି ଦେବା ଆବଶ୍ୟକ । ଏ ସମ୍ପର୍କରେ ଏଡିଏମ୍ ଦୁର୍ଗାପ୍ରସାଦ ମହାରଣା କହିଛନ୍ତି, ଉଚ୍ଚ ନ୍ୟାୟାଳୟର ନିର୍ଦ୍ଦେଶ ମୁତାବକ ଅବୈଧ ଚିଙ୍ଗୁଡ଼ି ଘେରି ଉଚ୍ଛେଦ ସହିତ ମାମଲା ରୁଜୁ କରାଯାଉଛି । ରବିବାର କେନ୍ଦ୍ରୀୟ ଦଳ ଅନୁଧ୍ୟାନ କରିବା ପାଇଁ ଆସୁଛନ୍ତି । କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ଦେବା ପାଇଁ ଯୋଜନା ଥିବା ସେ ସୂଚନା ଦେଇଛନ୍ତି ।
