ଦୁବାଇ,୮।୯: ୟୁଏଇରେ ଖେଳାଯାଉଥିବା ଏସିଆ କପରେ ବୁଧବାର ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ରୋମାଞ୍ଜକର ମୁକାବିଲା ହୋଇଥିଲା। ଶେଷରେ ଏହି ମ୍ୟାଚ୍ରେ ବାଜି ମାରିନେଇଥିଲା ପାକିସ୍ତାନ। ପାକିସ୍ତାନ ମାତ୍ର ଗୋଟିଏ ଉଇକେଟରେ ଜିତିବାରେ ସଫଳ ହୋଇଥିଲା। ପ୍ରାୟ ଜିତିଥିବା ଖେଳକୁ ହାରିବା ପରେ ଆଫଗାନିସ୍ତାନ ଖେଳାଳିଙ୍କ ହୃଦୟ ଭାଙ୍ଗିଯାଇଥିଲା। ପଡ଼ିଆରେ ସେମାନେ କାନ୍ଦିବାକୁ ଲାଗିଥିଲେ।
ଆଫଗାନିସ୍ତାନର ୧୩୦ ରନ୍ର ବିଜୟ ଲକ୍ଷକୁ ପିଛା କରି ପାକିସ୍ତାନ ୧୯ ଓଭରରେ ୧୧୯ ରନରେ ୯ ଉଇକେଟ ହରାଇଥିଲା। ଜିତିବା ପାଇଁ ପାକିସ୍ତାନକୁ ଶେଷ ୬ ବଲରେ ୧୧ ରନ ଆବଶ୍ୟକ ଥିଲା। ଲାଗୁଥିଲା ଆଫଗାନିସ୍ତାନ ଏହି ମ୍ୟାଚକୁ କବଜା କରିବ। ମାତ୍ର ୨୦ ଓଭରର ପ୍ରଥମ ଦୁଇଟି ବଲରେ ନସିମ ଶାହା ଦୁଇଟି ଛକା ମାରି ପାକିସ୍ତାନକୁ ବିଜୟ ଦେଇଥିଲେ।
ନାସିମ ଶାହାଙ୍କ ଦ୍ୱିତୀୟ ଛକା ଦେଖିବା ପରେ ଆଫଗାନିସ୍ତାନର କ୍ରିକେଟରମାନେ ଅତ୍ୟନ୍ତ ନିରାଶ ହୋଇଥିଲେ। ଖେଳାଳିମାନେ ନିଜ କୋହ ଅଟକାଇ ପାରି ନ ଥିଲେ। ଅଧିକାଂଶ ଖେଳାଳି ପଡିଆରେ କାନ୍ଦିଥିଲେ। ଖେଳାଳିମାନେ ମଧ୍ୟ ପରସ୍ପରକୁ ଆଲିଙ୍ଗନ କରି ସେମାନଙ୍କର ଯନ୍ତ୍ରଣା ବାଣ୍ଟିବାକୁ ଚେଷ୍ଟା କରିଥିଲେ। ଆଫଗାନିସ୍ତାନ ଖେଳାଳିଙ୍କ କାନ୍ଦିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି।
ଏହି ମ୍ୟାଚରେ ଆଫଗାନିସ୍ତାନ ମଧ୍ୟ ଭାରତୀୟ ପ୍ରଶଂସକଙ୍କ ପୂର୍ଣ୍ଣ ସମର୍ଥନ ପାଇଥିଲା। ଯଦି ଆଫଗାନିସ୍ତାନ ପାକିସ୍ତାନକୁ ପରାସ୍ତ କରିବାରେ ସଫଳ ହୋଇଥାନ୍ତା, ତେବେ ଭାରତର ଫାଇନାଲରେ ପ୍ରବେଶ କରିବାର ସମ୍ଭାବନା ରହିଥାନ୍ତା। କିନ୍ତୁ ବର୍ତ୍ତମାନ ଶ୍ରୀଲଙ୍କା ପରେ ପାକିସ୍ତାନ ଦଳ ମଧ୍ୟ ଫାଇନାଲ ପାଇଁ ଯୋଗ୍ୟତା ଅର୍ଜନ କରିଛି। ଭାରତ ସହିତ ଆଫଗାନିସ୍ତାନର ଦଳ ମଧ୍ୟ ଟୁର୍ନାମେଣ୍ଟରୁ ବାଦ୍ ପଡ଼ିଛନ୍ତି। ସେପ୍ଟେମ୍ବର ୧୧ରେ ପାକିସ୍ତାନ ଏବଂ ଶ୍ରୀଲଙ୍କା ମଧ୍ୟରେ ଟୁର୍ନାମେଣ୍ଟର ଅନ୍ତିମ ମ୍ୟାଚ ଖେଳାଯିବ।
https://twitter.com/KuchNahiUkhada/status/1567697272250732545
