ଔରଙ୍ଗାବାଦ, ୨୪ା୮ (ପି.ଟି.)-ଖେଳ କିପରି ତାଙ୍କ ଜୀବନଶୈଳୀ ବଦଳାଇ ଦେଇଛି ତାହାର ବର୍ଣ୍ଣନା କରିଛନ୍ତି ଅର୍ଜୁନ ପୁରସ୍କାର ପାଇବା ପାଇଁ ମନୋନୀତ ହୋଇଥିବା ଭାରତର ପୂର୍ବତନ ମହିଳା ଖୋ ଖୋ ଅଧିନାୟିକା ସାରିକା କାଲେ। ଦିନ ଥିଲା ପରିବାରର ଆର୍ଥିକ ସମସ୍ୟା ଯୋଗୁ ୧୦ବର୍ଷ ଧରି ତାଙ୍କୁ କେବଳ ଗୋଟେ ଓଳି ଖାଇବାକୁ ମିଳୁଥିଲା। ବର୍ତ୍ତମାନ ସେ କିନ୍ତୁ ମହାରାଷ୍ଟ୍ର ସରକାରଙ୍କ ଅଧୀନରେ ଜଣେ କ୍ରୀଡ଼ା ଅଧିକାରୀ ଭାବେ କାର୍ଯ୍ୟ କରୁଛନ୍ତି। ଅଗଷ୍ଟ ୨୯ରେ ଜାତୀୟ କ୍ରୀଡ଼ା ଦିବସ ଅବସରରେ ଏକ ଭର୍ଚୁଆଲ ଉତ୍ସବରେ ସାରିକାଙ୍କୁ ଅର୍ଜୁନ ପୁରସ୍କାରରେ ସମ୍ମାନିତ କରାଯିବ। ସାରିକା କହିଛନ୍ତି, ସେ ଯଦିଓ ଚଳିତ ବର୍ଷର ଅର୍ଜୁନ ପୁରସ୍କାର ପାଇଁ ମନୋନୀତ ହୋଇଛନ୍ତି ତାଙ୍କର ଖୋ ଖୋ ଖେଳୁଥିବା ସମୟର ଅନୁଭୁତି ମନେ ପଡୁଛି, ଯେତେବେଳେ ତାଙ୍କୁ ୧୦ ବର୍ଷ ଧରି ଗୋଟିଏ ଓଳି ଖାଇବାକୁ ମିଳୁଥିଲା। ୨୦୧୬ରେ ଅନୁଷ୍ଠିତ ୧୨ତମ ଦକ୍ଷିଣ ଏସୀୟ କ୍ରୀଡ଼ା (ସାଗ୍)ରେ ସାରିକାଙ୍କ ନେତୃତ୍ୱରେ ଭାରତୀୟ ଦଳ ସ୍ବର୍ଣ୍ଣ ପଦକ ଲାଭ କରିଥିଲା। ସେ କହିଛନ୍ତି ପାରିବାରିକ ଅବସ୍ଥାକୁ ନେଇ ଖେଳ ପ୍ରତି ତାଙ୍କର ଆଗ୍ରହ ସୃଷ୍ଟି ହୋଇଥିଲା। ଖେଳ ତାଙ୍କ ଜୀବନଶୈଳୀକୁ ବଦଳାଇ ଦେଇଛି। ବର୍ତ୍ତମାନ ସେ ଓସମାନାବାଦ ଜିଲାରେ ଜଣେ କ୍ରୀଡ଼ା ଅଧିକାରୀ ଭାବେ କାର୍ଯ୍ୟରତ। ୨୭ ବର୍ଷୀୟା ସାରିକା କହିଛନ୍ତି, ତାଙ୍କ ମାମୁଁ ମହାରାଷ୍ଟ୍ରର ଓସମାନାବାଦ ଜିଲାରେ ଖେଳିଥାନ୍ତି। ସେ ତାଙ୍କୁ ପ୍ରଥମେ ପଡ଼ିଆକୁ ନେଇଥିଲେ ଯେତେବେଳେ ମୋତେ ମାତ୍ର ୧୩ ବର୍ଷ ବୟସ ହୋଇଥିଲା। ତା’ପରଠାରୁ ମୁଁ ଖେଳ ଜାରି ରଖିଥିଲି। ସାରିକା କହିଛନ୍ତି, ତାଙ୍କ ମା ସିଲାଇ ମେଶିନରେ କାର୍ଯ୍ୟକରି କିଛି ରୋଜଗାର କରିଥାନ୍ତି। ଶାରୀରିକ ସମସ୍ୟା ଯୋଗୁ ପିତାଙ୍କର ଆୟ ମଧ୍ୟ ସୀମିତ। ମୋଟ ଉପରେ କହିବାକୁ ଗଲେ ମୋ ଜେଜେବାପାଙ୍କ ଉପାର୍ଜନ ଉପରେ ଆମ ପରିବାର ନିର୍ଭରଶୀଳ ଥିଲା। ସେତେବେଳେ ମୋତେ ଦିନକୁ ଥରେ ମାତ୍ର ପେଟପୂରା ଖାଇବାକୁ ମିଳୁଥିଲା। ପ୍ରତିଯୋଗିତା ପାଇଁ କ୍ୟାମ୍ପରେ ଯୋଗ ଦେବାବେଳେ ମୋତେ ସ୍ପେଶାଲ ଖାଦ୍ୟ ମିଳିଥାଏ। ନାନା ସମସ୍ୟା ସତ୍ତ୍ୱେ ବିଭିନ୍ନ ଟୁର୍ନାମେଣ୍ଟରେ ଖେଳିବା ଲାଗି ତାଙ୍କ ପରିବାର କେବେ ବାରଣ କରି ନ ଥିବା ସାରିକା କହିଛନ୍ତି।
