ଭୁବନ, ୨୪।୮(ଡି.ଏନ.ଏ.)-ଢେଙ୍କାନାଳ ଜିଲା ଭୁବନ ଥାନା ଭୂଷଳ ପଞ୍ଚାୟତ ଅଧୀନ ଅସୁରବନ୍ଧ ଦଳିତ ସାହିରେ ରବିବାର ରାତିରେ ଲୋମହର୍ଷଣକାରୀ ହତ୍ୟାକାଣ୍ଡ ଘଟିଛି। ଦିଅର ରବୀନ୍ଦ୍ର ମଳିକ (୩୩)ଙ୍କ ଟାଙ୍ଗିଆ ଚୋଟରେ ଭାଉଜ ଲିଲି ମଳିକ (୩୨)ଙ୍କ ଜୀବନ ଯାଇଛି। ଅଭିଯୁକ୍ତଙ୍କ କ୍ରୋଧରୁ ବର୍ତ୍ତିନାହାନ୍ତି ୫ ବର୍ଷର ଝିଆରି ଅଭୀସା। ତେବେ ସୌଭାଗ୍ୟବଶତଃ ସେ ବର୍ତ୍ତିଯାଇଛନ୍ତି। ହତ୍ୟାକାଣ୍ଡ ଘଟାଇବା ପରେ ଆତଙ୍କ ସୃଷ୍ଟି କରିଥିବା ରବୀନ୍ଦ୍ରଙ୍କୁ ପୋଲିସ କାବୁ କରିଛି। ମୃତ ମହିଳାଙ୍କ ସ୍ବାମୀ ଅଭିମନ୍ୟୁ ମଳିକଙ୍କ ଅଭିଯୋଗ ଅନୁଯାୟୀ ନଂ. ୨୩୫/୨୦, ଦଫା ୩୨୪, ୩୦୨ରେ ଏକ ମାମଲା ରୁଜୁ କରାଯାଇଛି।
ଏତଲାରେ ଦର୍ଶାଯାଇଛି, ରବିବାର ରାତିରେ ଅଭିମନ୍ୟୁ ଫସଲ ଜଗିବାକୁ ଜମିକୁ ଯାଇଥିଲେ। ସ୍ତ୍ରୀ ଲିଲି ଏବଂ ଝିଅ ଅଭୀସା ଘରେ ଶୋଇଥିଲେ। ଏହି ସମୟରେ ଭାଇ ରବୀନ୍ଦ୍ର ଗାଳିଗୁଲଜ କରିବା ଆରମ୍ଭ କରିଥିଲେ। ଶୋଇଥିବା ଅବସ୍ଥାରେ ଘରେ ପଶି ସ୍ତ୍ରୀଙ୍କୁ ହାଣି ଦେଇଥିଲେ। ଟାଙ୍ଗିଆ ଚୋଟରେ ଅଭୀସାଙ୍କ ମୁଣ୍ଡରେ ଆଘାତ ଲାଗିଥିଲା। ସେ ଜୀବନ ବିକଳରେ ଦୌଡ଼ି ପଳାଇବା ସହ ଚିତ୍କାର କରିଥିଲେ। ପାଖପଡ଼ୋଶୀମାନେ ଆସିବା ବେଳକୁ ରବୀନ୍ଦ୍ର ଟାଙ୍ଗିଆ ବୁଲାଉଥିଲେ। ସୂଚନା ପାଇ ଥାନାଧିକାରୀ ଜିତେନ୍ଦ୍ର ସାହୁ ପହଞ୍ଚତ୍ ଅଭିଯୁକ୍ତଙ୍କୁ କାବୁ କରିଥିଲେ। ୧୦୮ ଆମ୍ବୁଲାନ୍ସରେ ଲିଲିଙ୍କୁ ଭୁବନ ଡାକ୍ତରଖାନାକୁ ଅଣାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଚିକିତ୍ସା ପରେ ଅଭୀସା ସୁସ୍ଥ ଅଛନ୍ତି। ସୋମବାର ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯାଇଛି। ରବୀନ୍ଦ୍ରଙ୍କ ମାନସିକ ଅବସ୍ଥା ଠିକ୍ ନାହିଁ। ପାରିବାରିକ କହଳକୁ କେନ୍ଦ୍ରକରି ଏହି ହତ୍ୟାକାଣ୍ଡ ଘଟିଥିବା ପୋଲିସ ଅନୁମାନ କରିଛି। ତଦନ୍ତ ପରେ ଅଭିଯୁକ୍ତଙ୍କୁ କୋର୍ଟଚାଲାଣ କରାଯିବ ବୋଲି ଥାନାଧିକାରୀ କହିଛନ୍ତି।
