ଢେଙ୍କାନାଳ ଅଫିସ, ୧୧।୪ ମୁଖ୍ୟମନ୍ତ୍ରୀ କର୍ମତତ୍ପର ଅଭିଯାନ (ମୁକ୍ତା) ଯୋଜନାରେ ଖୋଳାଯାଇଛି ବିଶାଳକାୟ ପୋଖରୀ। ଏଥିରେ ଖର୍ଚ୍ଚ ହୋଇଛି ପ୍ରାୟ ୧୨ ଲକ୍ଷ ଟଙ୍କା। କାମ ଶେଷ ପର୍ଯ୍ୟାୟରେ। ହେଲେ ପାଣିର ଚିହ୍ନବର୍ଣ୍ଣ ନାହିଁ। ସମ୍ପୂର୍ଣ୍ଣ ଶୁଖିଲା ପଡ଼ିଛି। ସୁବିଧାରେ ମୃତଦେହ ସତ୍କାର କରିବା ଲାଗି ଜିଲା ଖଣିଜ ପାଣ୍ଠି (ଡିଏମ୍ଏଫ୍)ରୁ ୧୨ ଲକ୍ଷ ଟଙ୍କା ବ୍ୟୟରେ ନିର୍ମାଣ ହୋଇଛି ବହୁମୁଖୀ ଶ୍ମଶାନ। ସୁଉଚ୍ଚ ପାଚେରି, ଶବଦାହ ଗୃହ, ସ୍ନାନଶୌଚାଦି ଲାଗି ଆବଶ୍ୟକ ସୁବନ୍ଦୋବସ୍ତ ରହିଛି। ବାହାରୁ ଚକ୍ଚକ୍ ଦିଶୁଥିବା ଶ୍ମଶାନର ଭିତର ପରିବେଶ କିନ୍ତୁ ସମ୍ପୂର୍ଣ୍ଣ ଭିନ୍ନ। ଲଟାବୁଦାରେ ଭର୍ତ୍ତି ହୋଇ ସୃଷ୍ଟି କରୁଛି ଜଙ୍ଗଲର ଭ୍ରମ। ପାଲଟିଛି ବିଷଧର ସରୀସୃପଙ୍କ ଆବାସ। କେବଳ ପୋଖରୀ କିମ୍ବା ଶ୍ମଶାନ ନୁହେଁ, ପୌରସଂସ୍ଥାର ଦୂରଦୃଷ୍ଟି ଅଭାବରୁ ଢେଙ୍କାନାଳ ପୌରାଞ୍ଚଳରେ ଏଭଳି ଅନେକ ବହୁମୁଖୀ ଯୋଜନା ଦିଗହରା ହୋଇଯାଇଛି। ରାଜକୋଷରୁ ବିପୁଳ ଅର୍ଥ ବ୍ୟୟରେ ପ୍ରକଳ୍ପ ନିର୍ମାଣ କରାଯାଉଥିଲେ ମଧ୍ୟ ତାହା ଲୋକଙ୍କ କାମରେ ଲାଗୁନାହିଁ।
କୋଭିଡ୍ ମହାମାରୀ ସମୟରେ ରାଜ୍ୟକୁ ଛୁଟିଥିଲା ପ୍ରବାସୀ ଶ୍ରମିକଙ୍କ ସୁଅ। ସେମାନଙ୍କୁ କାମଯୋଗାଇ ଆର୍ଥିକ ସ୍ବାବଲମ୍ବୀ କରିବା ପାଇଁ ୨୦୨୧ ଫେବୃୟାରୀ ୧ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆରମ୍ଭ କରିଥିଲେ ମୁକ୍ତା ଯୋଜନା। ଉଭୟ ଗ୍ରାମାଞ୍ଚଳ ଏବଂ ସହରାଞ୍ଚଳର ଶ୍ରମିକଙ୍କୁ କାମ ଯୋଗାଇ ଦେବାକୁ ଲକ୍ଷ୍ୟ ରଖାଯାଇଥିଲା। ତଦନୁଯାୟୀ ଢେଙ୍କାନାଳ ପୌରସଂସ୍ଥାର ୧ନଂ. ୱାର୍ଡ ଶ୍ୟାମାଚରଣପୁରର ଜଙ୍ଗଲତଳି ଅଞ୍ଚଳରେ ଖନନ କରାଯାଉଛି ଏକ ଜଳାଶୟ। ଏଥିଲାଗି ବଳି ପଡ଼ିଛି ବହୁ ମୂଲ୍ୟବାନ ଗଛ। ଇତିମଧ୍ୟରେ ପୋଖରୀ କାମ ସରିବାକୁ ବସିଲାଣି। ହେଲେ ଜଳାଶୟ ଖେଳପଡ଼ିଆର ଭ୍ରମ ସୃଷ୍ଟି କରୁଛି। ଏପରି କି ଆଗାମୀ ଦିନରେ ମଧ୍ୟ ପୋଖରୀରେ ପାଣି ରହିବନି ବୋଲି ଜଳଜଳ ହୋଇ ଦିଶିଲାଣି।
ଏ ସଂକ୍ରାନ୍ତରେ ପୌର ନିର୍ବାହୀ ଅଧିକାରୀ ଅତନୁ ସାମନ୍ତ କୁହନ୍ତି, କେବଳ ପୋଖରୀ ନିର୍ମାଣ କାର୍ଯ୍ୟକୁ ନେଇ ଅଭିଯୋଗ ଆସିଛି। ଏହାର ଅନୁଧ୍ୟାନ କରାଯିବ ପରେ କାର୍ଯ୍ୟ କରୁଥିବା ସଂସ୍ଥାକୁ ପେମେଣ୍ଟ କରାଯିବ। ସେହିପରି ସୋମବାର ଘଟଣାସ୍ଥଳ ପରିଦର୍ଶନ କରାଯିବା ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ପୌରାଧ୍ୟକ୍ଷା ଜୟନ୍ତୀ ପାତ୍ର ସୂଚନା ଦେଇଛନ୍ତି।