ସମ୍ବଲପୁର,୬।୧୧(ଭବାନୀ ଶଙ୍କର ଭୋଇ): ବଡ଼ବଜାର ନିକଟରେ ରିଙ୍ଗ ରୋଡ଼ କଡ଼ରେ ରହିଛି ସମ୍ବଲପୁର ଉନ୍ନୟନ ପ୍ରାଧିକରଣ (ଏସ୍ଡିଏ)ର ଗୌରୀ ଶଙ୍କର ପାର୍କ। ଏଠାରେ ଦୀର୍ଘଦିନ ହେବ ଷ୍ଟ୍ରିଟ ଲାଇଟ ଜଳୁ ନ ଥିବା ସହ ପାର୍କରେ ରହିଥିବା ଖେଳଣା ଏବଂ ବ୍ୟାୟାମ ସାମଗ୍ରୀ ଭାଙ୍ଗିରୁଜି ଯାଇଥିବା ଦେଖିବାକୁ ମିଳିଛି। ସମ୍ବଲପୁର ସହରରେ ଲୋକଙ୍କ ଅବସର ବିନୋଦନ ପାଇଁ କୌଣସି ବିଶେଷ ପାର୍କ ନାହିଁ। ଯେଉଁ କିଛି ପାର୍କ ରହିଛି ସେଗୁଡିକର ଅବସ୍ଥା ମଧ୍ୟ ଗୁରୁତର ହୋଇପଡିଛି। ରିଙ୍ଗରୋଡ କଡରେ ଥିବା ଗୌରୀଶଙ୍କର ପାର୍କ ଯାତାୟତ ଦୃଷ୍ଟିରୁ ସହଜ। ସେଥିପାଇଁ ବିଭିନ୍ନ ଅଞ୍ଚଲରୁ ଏଠାକୁ ଲୋକମାନେ ପରିବାର ସହ ପହଞ୍ଚତ୍ଥାନ୍ତି। ତେବେ ଦୀର୍ଘ ଦିନ ହେବ ଷ୍ଟ୍ରିଟ ଲାଇଟ ଜଳୁ ନ ଥିବା ଯୋଗୁ ସନ୍ଧ୍ୟାରେ ପରିବାର ନେଇ ଲୋକେ ଆସିବାକୁ କୁଣ୍ଠାବୋଧ କରୁଛନ୍ତି। ସକାଳେ ଏବଂ ସନ୍ଧ୍ୟାରେ ଏହି ପାର୍କକୁ ଅବସର ବିନୋଦନ ସହ ବ୍ୟାୟାମ ପାଇଁ ଶହଶହ ଲୋକ ଆସୁଥିବାବେଳେ ପାର୍କର ଅବସ୍ଥା ଗୁରୁତର ରହିଥିବାରୁ ଲୋକଙ୍କ ସଂଖ୍ୟା ମଧ୍ୟ କମୁଥିବା ନେଇ ଅଭିଯୋଗ ହୋଇଛି। ଏହି ପାର୍କ ଭିତରେ ସ୍ବାଧୀନତା ସଂଗ୍ରାମୀ ହଲ ସହ ଓଡ଼ିଶା ଲଳିତ କଳା ଏକାଡେମୀର ପ୍ରାନ୍ତୀୟ କେନ୍ଦ୍ର ରହିଛି। ଯେଉଁଠି ନିୟମିତ କଳା ପ୍ରଦର୍ଶନୀ ଅନୁଷ୍ଠିତ ହୋଇଥାଏ। ପାର୍କରେ ପୂର୍ବରୁ ରହିଥିବା ଟଏ ଟ୍ରେନ ଦୀର୍ଘ ଦିନ ହେବ ଅଚଳ ହୋଇ ପଡ଼ିରହିଛି। ଯାହାଦ୍ୱାରା ଏଠାକୁ ଆସୁଥିବା ଶିଶୁମାନେ ଏହାକୁ ଉପଭୋଗ କରିପାରୁ ନାହାନ୍ତି। ପାର୍କ ସନ୍ଧ୍ୟା ସମୟରେ ଅନ୍ଧକାର ରହିଲେ ଅନେକ ଅସାମାଜିକ କାର୍ଯ୍ୟକଳାପ ହେବା ଆଶଙ୍କା ରହିଛି। ତେଣୁ ଯଥାଶୀଘ୍ର ଏହି ଗୌରୀଶଙ୍କର ପାର୍କରେ ରହିଥିବା ସମସ୍ୟାର ସମାଧାନ କରାଯିବା ସହ ଏହାକୁ ଆହୁରି ଆକର୍ଷଣୀୟ କରିବା ପାଇଁ ଏସ୍ଡିଏ ପକ୍ଷରୁ ଚେଷ୍ଟା କରାଯିବାକୁ ସାଧାରଣରେ ଦାବି ହୋଇଆସୁଛି।
ସେମାନେ କହନ୍ତି…
ଗୌରୀଶଙ୍କର ପାର୍କ ନିର୍ମାଣ ହେବା ପରେ ଆଖପାଖର ଲୋକଙ୍କ ଅବସର ବିନୋଦନ ପାଇଁ ଅନେକ ସୁବିଧା ହୋଇଥିଲା ା ଲୋକେ ସକାଳୁ ପାର୍କକୁ ଚାଲିବା ଏବଂ ବ୍ୟାୟାମ କରିବା ପାଇଁ ଆସୁଥିଲେ। ବହୁବର୍ଷ ଧରି ପାର୍କ ଭିତରେ ଯୋଗ କାର୍ଯ୍ୟକ୍ରମ ଅନୁଷ୍ଠିତ ହେଉଥିଲା। ହେଲେ ଏବେ ଅବହେଳିତ ହୋଇ ପଡିଛି। ଏହାପ୍ରତି ଏସଡିଏ ଧ୍ୟାନ ଦେବା ଦରକାର ।
-ପଙ୍କଜିନୀ ମେହେର, ପଶ୍ଚିମାଞ୍ଚଳ ଏକତା ମଞ୍ଚ, ବଡବଜାର
ପାର୍କକୁ ଅନେକ ଲୋକ ଏବଂ ଦର୍ଶକ ଆସୁଛନ୍ତି। ହେଲେ ପାର୍କରେ ଷ୍ଟ୍ରିଟ ଲାଇଟ ଜଳୁନାହିଁ। ଦେଖାଶୁଣା ଅଭାବରୁ ଗଛପତ୍ର ଏଣେତେଣେ ହୋଇ ରହିଛି। ଅନ୍ଧାର ରହିବା ଯୋଗୁ ଅସାମାଜିକ ଲୋକଙ୍କ ପ୍ରାଦୁର୍ଭାବ ଦେଖିବାକୁ ମିଳୁଛି। ସମ୍ବଲପୁର ଉନ୍ନୟନ ପ୍ରାଧୀକରଣ ଶୀଘ୍ର ପାର୍କର ସମସ୍ୟା ଗୁଡିକର ସମାଧାନ କରୁ।
– ସୂର୍ଯ୍ୟ ପାଣିଗ୍ରାହୀ, ସମ୍ବଲପୁର ବାସିନ୍ଦା
ମୁଁ ଏସ୍ଡିଏ ଅଧ୍ୟକ୍ଷ ଥିବା ସମୟରେ ଗୌରୀଶଙ୍କର ପାର୍କ ନିର୍ମାଣ କରାଯାଇଥିଲା। ଏହା ଭିତରେ ସ୍ବାଧୀନତା ସଂଗ୍ରାମୀ ହଲ ମଧ୍ୟ ନିର୍ମାଣ କରାଯାଇଛି। ଯେଉଁଠି ସ୍ବାଧୀନତା ସଂଗ୍ରାମୀମାନଙ୍କ ବିଷୟରେ ତଥ୍ୟ ପ୍ରଦର୍ଶନ କରାଯିବାର ଯୋଜନା ରହିଥିଲା। ଏବେ ସେଠାରେ ଲଲିତକଳା ଏକାଡେମୀ ପକ୍ଷରୁ ଚିତ୍ରକଳା ପ୍ରଦର୍ଶନୀ ଆୟୋଜନ କରାଯାଉଛି। ଏସ୍ଡିଏ ନିଜେ ଏହାର ଦେଖାଶୁଣା କରୁଛି। ତେବେ କର୍ମଚାରୀ ଅଭାବରୁ ଏହାପ୍ରତି ଦୃଷ୍ଟି ଦେଇପାରୁ ନ ଥିବାରୁ ଏହାକୁ ମହାନଗର ନିଗମକୁ ହସ୍ତାନ୍ତର କରିଦେବା ଦରକାର ା ଯାହାଦ୍ୱାରା ନିୟମିତ ଭାବେ କିଛି କର୍ମଚାରୀ ରହିଲେ ପାର୍କର ଦାୟିତ୍ୱ ନେଇପାରିବେ ।
-ବିଜୟ ମହାନ୍ତି, ପୂର୍ବତନ ଅଧ୍ୟକ୍ଷ, ସମ୍ବଲପୁର ଉନ୍ନୟନ ପ୍ରାଧୀକରଣ।
କରୋନା ସମୟରେ ଅନେକ ମାସ ପାର୍କ ବନ୍ଦ ରହିବା ଦ୍ୱାରା ଭିତରେ ଥିବା କିଛି ସରଞ୍ଜାମ କାମ କରୁ ନ ଥିବା ଅଭିଯୋଗ ହୋଇଛି। ଆମେ ଏହାର ପରିଚାଳନା ଏବଂ ମରାମତି ପାଇଁ ଭେଣ୍ଡରମାନଙ୍କ ଠାରୁ ପ୍ରସ୍ତାବ ଆଗତ କରିଛୁ। ଖୁବଶୀଘ୍ର ଏହାର ପୁନରୁଦ୍ଧାର କାମ କରାଯିବ। ପାର୍କରେ ରହିଥିବା ସମସ୍ୟା ଗୁଡିକର ସମାଧାନ କରାଯିବ।
– ବେଦଭୂଷଣ, ଉପାଧ୍ୟକ୍ଷ, ସମ୍ବଲପୁର ଉନ୍ନୟନ ପ୍ରାଧିକରଣ
