ବାଲିକୁଦା,୨୩ା୧(ସ୍ବ.ପ୍ର.):ଜଗତ୍ସିଂହପୁର ଜିଲା ବାଲିକୁଦା ଥାନା ଅନ୍ତର୍ଗତ କୁଶୁପୁର ପଞ୍ଚାୟତର ସମୁଦ୍ରକୂଳ ଆକାଶିଆ ଜଙ୍ଗଲରୁ ବଣଭୋଜି ସାରି ଫେରୁଥିବାବେଳେ ରବିବାର ସନ୍ଧ୍ୟାରେ ଦେକଣୀ ନଦୀରେ ଯାତ୍ରୀବାହୀ ଡଙ୍ଗା ଓଲଟି ପଡ଼ିବାରୁ ବୁଡ଼ି ଯାଇଥିଲା। ସୌଭାଗ୍ୟବଶତଃ ସେଥିରେ ଥିବା ସମସ୍ତ ଯାତ୍ରୀ ରକ୍ଷା ପାଇଥିବାବେଳେ ୨ ଜଣ ଆହତ ହୋଇଛନ୍ତି। ବାଲିକୁଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଉଭୟଙ୍କ ଚିକିତ୍ସା କରାଯାଇଛି। ସରକାରୀ ନିୟମ ଅନୁସାରେ ଯାତ୍ରୀଙ୍କୁ ଡଙ୍ଗାରେ ବସାଇବା ସମୟରେ ନାଉରିଆ ସମସ୍ତଙ୍କୁ ଲାଇଫ ଜ୍ୟାକେଟ ପିନ୍ଧାଇବା କଥା। ହେଲେ ଯାତ୍ରୀମାନେ କେହି ଲାଇଫ ଜ୍ୟାକେଟ ପିନ୍ଧି ନ ଥିବା ଜଣାପଡିଛି।
ସ୍ଥାନୀୟ ନେନ୍ଦେରା ଗଁାର କେତେଜଣ ଯୁବକଙ୍କ ସହ ବାଲିକୁଦା, ଜଗତ୍ସିଂହପୁର, କଟକ ଓ ଭୁବନେଶ୍ୱରରରୁ ମୋଟ ୨୮ ଜଣ ବଣଭୋଜି ପାଇଁ ଆକାଶିଆ ଜଙ୍ଗଲକୁ ଯାଇଥିଲେ। ବଣଭୋଜି ସାରି ସନ୍ଧ୍ୟାରେ ଫେରିବା ବେଳେ ଡଙ୍ଗାରେ ପରିବହନ କ୍ଷମତାଠାରୁ ଅଧିକ ଯାତ୍ରୀ ବସିଥିଲେ। ଡଙ୍ଗାର ମୋଟର ଷ୍ଟାର୍ଟ ମାରିବା ସମୟରେ ନାଉରିଆ ଭାରସାମ୍ୟ ହରାଇ ନଦୀ ଭିତରକୁ ଖସି ପଡ଼ିଥିଲେ। ସେତେବେଳକୁ ଡଙ୍ଗା ଚାଲିବା ଆରମ୍ଭ କରି ଦେଇଥିଲା। ନାଉରିଆ ନ ଥିବାରୁ ଡଙ୍ଗାଟି କିଛି ବାଟ ଗଲା ପରେ ଓଲଟି ପଡ଼ିଥିଲା। ଉକ୍ତ ସ୍ଥାନରେ ପାଣି କମ୍ ଥିବାରୁ ୨୮ଜଣ ଯାତ୍ରୀ ରକ୍ଷା ପାଇ ଯାଇଥିଲେ। ଯାତ୍ରୀମାନଙ୍କ ଭିତରୁ କେହି ଜଣେ ଅଗ୍ନିଶମ ବାହିନୀକୁ ମୋବାଇଲ୍ରେ ଫୋନ୍ କରିଥିଲେ। ଖବରପାଇ ବାଲିକୁଦା ଦମକଳ କର୍ମଚାରୀ ଘଟଣାସ୍ଥଳରେ ପହଞ୍ଚତ୍ ସମସ୍ତଙ୍କୁ ପାଣିରୁ ଉଦ୍ଧାର କରିଛନ୍ତି।
