ସୋନପୁର,୧୨ା୧୨(ନି.ପ୍ର.): ସୁବର୍ଣ୍ଣପୁର ଜିଲାରେ ଧାନକିଣା ଆରମ୍ଭ ହେବାର ୬ ଦିନ ବିତିଲାଣି। ପ୍ରଥମ ପର୍ଯ୍ୟାୟରେ ଜିଲାର ଚାଷୀଙ୍କଠାରୁ ୩୦ଲକ୍ଷ ୪୭ ହଜାର କୁଇଣ୍ଟାଲ ଧାନ ସଂଗ୍ରହ କରିବାକୁ ଏ ପର୍ଯ୍ୟନ୍ତ ଟାର୍ଗେଟ୍ ମିଳିଛି। ମାତ୍ର ଶନିବାର ସନ୍ଧ୍ୟା ସୁଦ୍ଧା କେବଳ ୧୮୦୧ ଚାଷୀଙ୍କ ନିକଟରୁ ୯୮ ହଜାର ୯୬୮ କୁଇଣ୍ଟାଲ ଧାନ ସଂଗ୍ରହ ହୋଇଛି। ୬୩ ପ୍ୟାକ୍ସ ଓ ୩୮ଟି ମହିଳା ସ୍ବୟଂ ସହାୟକ ଗୋଷ୍ଠୀ ଧାନକିଣା ପାଇଁ ଯୋଗାଣ ନିଗମ ସହିତ ଚୁକ୍ତିନାମା କରିଛନ୍ତି। ତେବେ ଜିଲାର କେବଳ ୨୪ଟି ପାକ୍ସ ଓ ୧୬ଟି ଏସ୍ଏଚ୍ଜି ଧାନ କିଣା ଆରମ୍ଭ କରିଥିବା ଜଣାପଡିଛି।
ଜିଲାସ୍ତରୀୟ ଧାନ ସଂଗ୍ରହ କମିଟିର ନିଷ୍ପତ୍ତି ଅନୁଯାୟୀ ଡିସେମ୍ବର ୫ ତାରିଖରୁ ଜଳସେଚିତ ବିନିକା ଓ ଡୁଙ୍ଗୁରିପାଲି ବ୍ଳକ ଏବଂ ୯ ରୁ ସୋନପୁର, ତରଭା, ବୀରମହାରାଜପୁର ଓ ଉଲୁଣ୍ଡା ବ୍ଲକରୁ ଧାନକିଣା ଆରମ୍ଭ ହୋଇଛି। ତେବେ ତଥ୍ୟ ଅନୁଯାୟୀ ଜିଲାର ୩୯ଟି ପାକ୍ସ ଓ ୨୨ ମହିଳା ସ୍ବୟଂ ସହାୟକ ଗୋଷ୍ଠୀ ଏ ପର୍ଯ୍ୟନ୍ତ ଧାନ କିଣା ଆରମ୍ଭ କରି ନାହାନ୍ତି। ଚାଷୀଙ୍କ ଟୋକନ୍ ଆସିଥିବା ବେଳେ ମଣ୍ଡି ଖୋଲି ନ ଥିବାରୁ ଧାନ ବିକ୍ରି ହୋଇପାରୁନି। ସୁବର୍ଣ୍ଣପୁର ଜିଲା କୃଷକ ସଂଗଠନ ଏଥିପାଇଁ ଜିଲା ପ୍ରଶାସନ, ମିଲର୍ସ ଓ ଅସାଧୁ ବ୍ୟବସାୟୀଙ୍କୁ ଦାୟୀ କରିଛି। ମଣ୍ଡିରୁ ଚାଷୀଙ୍କ ଧାନ ଉଠୁ ନଥିବା ବେଳେ ରାଇସ୍ ମିଲ୍ର ଗୋଦାମଗୁଡିକ ଭର୍ତ୍ତି ହୋଇ ସାରିଥିବା କୃଷକ ସଂଗଠନ ଅଭିଯୋଗ କରିଛି। ଏବେ ଆଦ୍ରତା ଦର୍ଶାଇ ଚାଷୀଙ୍କଠାରୁ ଧାନ କିଣାଯାଉନି। ଆରଏମସି କର୍ମଚାରୀ ଓ ଯୋଗାଣ ବିଭାଗ ଠିକ୍ ଭାବେ ଧାନର ମାନ ନିର୍ଦ୍ଧାରଣ କରୁନାହାନ୍ତି।
ଖରିଫ ଧାନ ବିକ୍ରି ପାଇଁ ୬୫ହଜାର ୫୨୩ଜଣ ଚାଷୀ ପଞ୍ଜୀକୃତ ହୋଇଛନ୍ତି। ତେବେ ଧାନ ବିକ୍ରି ଅନ୍ୟବର୍ଷ ତୁଳନାରେ ମନ୍ଥର ଗତିରେ ଚାଲିଛି। କୋହଲା ପାଗ ପାଇଁ ଧାନ ସଂଗ୍ରହ ଧିମେଇ ଥିବା ପ୍ରଶାସନ ସଫେଇ ଦେଉଛି। ଜିଲାର ୪୦ ମିଲର୍ସ ଚଳିତ ଧାନ ସଂଗ୍ରହ ପ୍ରକ୍ରିୟାରେ ସାମିଲ ହେବା ପାଇଁ ଯୋଗାଣ ନିଗମ ସହିତ ଚୁକ୍ତିନାମା କରିଛନ୍ତି। ତଦନୁଯାୟୀ ସେମାନଙ୍କୁ ଧାନ ସଂଗ୍ରହ ପାଇଁ ଟାର୍ଗେଟ୍ ମିଳିଛି। କିନ୍ତୁ ଏପର୍ଯ୍ୟନ୍ତ ୩୧ ମିଲର୍ସ ମଣ୍ଡିରୁ ଧାନ ନେଇଛି । ଚାଷୀଙ୍କ ଧାନ ସଂଗ୍ରହରେ ପାକ୍ସ, ଏସ୍ଏଚ୍ଜି ଓ ମିଲର୍ସମାନେ ଅସହଯୋଗ କରୁଥିବା ଅଭିଯୋଗ ହେଉଛି। ଏ ସମ୍ପର୍କରେ ଜିଲା ଯୋଗାଣ ଅଧିକାରୀ ସୁରେଶ ପାଣିଗ୍ରାହୀ କୁହନ୍ତି, ଧାନକିଣାରେ ସେମିତି କିଛି ସମସ୍ୟା ନାହିଁ। ଧାନରେ ଆଦ୍ରତା ରହିଛି। କୋହଲା ପାଗ ଯୋଗୁଁ ଚାଷୀ ମଣ୍ଡିକୁ ଧାନ ଆଣୁନାହାନ୍ତି। ସମସ୍ତ ମଣ୍ଡି ଖୋଲିବ ଓ ଆସନ୍ତା ସପ୍ତାହ ଠାରୁ ଧାନ ସଂଗ୍ରହ ପ୍ରକ୍ରିୟା ତ୍ୱରାନ୍ବିତ ହେବ।
