ନୂଆଦିଲ୍ଲୀ,୩।୧୨: ଦେଶର ଲୋକପ୍ରିୟ ମସଲା କମ୍ପାନୀ ଏମ୍ଡିଏଚ୍ର ମୁଖ୍ୟ ଧର୍ମପାଲ ଗୁଲାଟିଙ୍କ ପରଲୋକ ଘଟିଛି। ସେ ଗୁରୁବାର ସକାଳ ୫.୩୮ ରେ ଶେଷ ନିଶ୍ୱାସ ତ୍ୟାଗ କରିଥିଲେ। ତାଙ୍କୁ ୯୮ ବର୍ଷ ବୟସ ହୋଇଥିଲା। କରୋନାରୁ ସୁସ୍ଥ ହେବା ପରେ ହୃଦଘାତରେ ତାଙ୍କର ମୃତ୍ୟୁ ଘଟିଥବବା ସୂଚନା ମିଳିଛି। ବ୍ୟବସାୟ ତଥା ଶିଳ୍ପ କ୍ଷେତ୍ରରେ ତାଙ୍କର ଉଲ୍ଲେଖନୀୟ ଅବଦାନ ପାଇଁ ତାଙ୍କୁ ଗତ ବର୍ଷ ରାଷ୍ଟ୍ରପତି ରାମ ନାଥ କୋବିନ୍ଦ ପଦ୍ମ ଭୂଷଣ ପ୍ରଦାନ କରିଥିଲେ। ଗୁଲାଟି ୧୯୨୩, ମାର୍ଚ୍ଚ ୨୭ରେ ସିଆଲକୋଟ (ଏବେ ପାକିସ୍ଥାନ)ରେ ଜନ୍ମଗ୍ରହଣ କରିଥିଲେ। ୧୯୪୭ରେ ଦେଶ ବିଭାଜନ ପରେ ସେ ଭାରତ ଆସିଥିଲେ। ତା’ପରେ ତାଙ୍କ ପାଖରେ ମାତ୍ର ୧,୫୦୦ଟଙ୍କା ଥିଲା। ଭାରତ ଆସିବା ପରେ ସେ ପରିବାରର ରକ୍ଷଣାବେକ୍ଷଣ ପାଇଁ ଏକ ବ୍ୟବସାୟ ଆରମ୍ଭ କରିଥିଲେ। ଦିଲ୍ଲୀର କରୋଲ ବାଗ, ଅଜମଲ ଖାନ ରୋଡରେ ଏକ ମସଲା ଦୋକାନ ଖୋଲିଲେ। ମସଲା ବ୍ୟବସାୟ ଧୀରେ ଧୀରେ ଏତେ ପରିମାଣରେ ବିସ୍ତାର ହେଲା ଯେ ଆଜି ତାଙ୍କର ଭାରତ ଏବଂ ଦୁବାଇରେ ୧୬ଟି ମସଲା କାରଖାନା ଅଛ।ଏହି କାରଖାନାଗୁଡ଼ିକରେ ପ୍ରସ୍ତୁତ ଏମ୍ଡିଏଚ୍ ମସଲା ସମଗ୍ର ବିଶ୍ୱରେ ପହଞ୍ଚେ। ଏମ୍ଡିଏଚ୍ରେ ୬୨ଟି ଉତ୍ପାଦ ଅଛ। ଉତ୍ତର ଭାରତୀୟ ବଜାରରେ ୮୦ ପ୍ରତିଶତ ଦଖଲ କରିଥିବା କମ୍ପାନୀ ଦାବି କରିଛି।
