ନୂଆଦିଲ୍ଲୀ,୨୨।୭: ସଂସଦର ମୌସୁମୀ ଅଧିବେଶନର ଆଜି ହେଉଛି ତୃତୀୟ ଦିନ। ହଙ୍ଗାମାର ଆଶାକୁ ଦୃଷ୍ଟିରେ ରଖି ଲୋକସଭା ବାଚସ୍ପତି ଓମ ବିର୍ଲା ସମସ୍ତ ଦଳ ସହିତ ଆଲୋଚନା କରିବାର ଆଶା କରାଯାଉଛି। ମୌସୁମୀ ଅଧିବେଶନର ପ୍ରଥମ ଏବଂ ଦ୍ୱିତୀୟ ଦିନରେ ବିରୋଧୀ ଦଳଗୁଡ଼ିକର ହୋ-ହଲ୍ଲା କାରଣରୁ କୌଣସି ବି କାର୍ଯ୍ୟ ହୋଇପାରି ନାହିଁ। ସଦନରେ ପ୍ରଶ୍ନକାଳ ଏବଂ ଶୂନ୍ୟକାଳ ଚାଲିପାରି ନାହିଁ। ବିରୋଧୀ ଦଳଗୁଡ଼ିକ NEET ପେପର ଲିକ୍ ମାମଲାରେ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରୁଥିବା ବେଳେ, ସରକାର ଏହି ଅଧିବେଶନରେ ଅନେକ ଗୁରୁତ୍ୱପୂର୍ଣ୍ଣ ବିଲ ପାସ କରାଇବା ପାଇଁ ପ୍ରସ୍ତୁତି ଚଳାଇଛନ୍ତି। ଏଭଳି ପରିସ୍ଥିତିରେ ସ୍ପିକର ଓମ ବିର୍ଲା ସମସ୍ତ ଦଳ ସହ କଥା ହୋଇ କୌଣସି ସମାଧାନର ବାଟ ବାହାର କରିପାରନ୍ତି। NEET ପ୍ରଶ୍ନପତ୍ର ଲିକ ମାମଲା ଏବଂ ଏହାର ପ୍ରତିବାଦରେ ଦିଲ୍ଲୀରେ ପ୍ରଦର୍ଶନ କରୁଥିବା ଛାତ୍ରୀଛାତ୍ରଙ୍କୁ ପୋଲିସ କାର୍ଯ୍ୟାନୁଷ୍ଠାନର ପ୍ରସଙ୍ଗକୁ ନେଇ ବିରୋଧୀ ସଦସ୍ୟମାନଙ୍କ ହଙ୍ଗାମା କାରଣରୁ ପୂର୍ବରୁ ଜୁଲାଇ ୨୦ ଏବଂ ପୁଣି ଜୁଲାଇ ୨୧ ତାରିଖରେ ରାଜ୍ୟ ସଭା-ଲୋକ ସଭାର କାର୍ଯ୍ୟକ୍ରମ ବାରମ୍ବାର ବାଧାପ୍ରାପ୍ତ ହୋଇଥିଲା ଏବଂ ଶେଷରେ ଦିନସାରା ପାଇଁ ସ୍ଥଗିତ ରଖାଯାଇଥିଲା।
ସେପଟେ କଂଗ୍ରେସ ସାଂସଦ ପୱନ ଖେଡ଼ା କହିଛନ୍ତି, ଆମର ସମସ୍ତ ସାଂସଦ ବିରୋଧ ପ୍ରଦର୍ଶନ କରିବା ପାଇଁ କଳା ପୋଷାକ ପିନ୍ଧିବେ। ଏହି ବିରୋଧ ଏହି କଥାକୁ ନେଇ ଯେ ସେମାନେ ଦିଲ୍ଲୀରେ ଦେଶର ଛାତ୍ରୀଛାତ୍ରଙ୍କ ସହିତ କ’ଣ କରିଛନ୍ତି, ଧର୍ମେନ୍ଦ୍ର ପ୍ରଧାନଙ୍କ ନିଜ ପଦରେ ବଜୟ ରହିବାର ଜିଦ୍ ବିରୁଦ୍ଧରେ ଏବଂ ଛାତ୍ରୀଛାତ୍ରଙ୍କ ପ୍ରତିବାଦ ଉପରେ ସରକାରଙ୍କ ଆଭିମୁଖ୍ୟ ବିରୁଦ୍ଧରେ ଅଟେ। ତେଣୁ, ପ୍ରତିବାଦ ଜଣାଇବା ପାଇଁ ଆମର ସମସ୍ତ ସାଂସଦ ଆଜି କଳା ପୋଷାକ ପିନ୍ଧୁଛନ୍ତି। ଆମର ବିରୋଧର ଉଦ୍ଦେଶ୍ୟ ହେଉଛି ଯୁବବର୍ଗଙ୍କ ସ୍ବାର୍ଥର ସୁରକ୍ଷା କରିବା।