ନୂଆଗାଁ,୩୦।୬ (ଧନେଶ୍ୱର ସାହୁ): ଆଦିବାସୀ ଗାଁକୁ ରାସ୍ତାଟିଏ ନିର୍ମାଣ କରିବା ପାଇଁ ସ୍ଥାନୀୟ ନେତା , ବ୍ଲକ ପ୍ରଶାସନକୁ ଗ୍ରାମବାସୀ ବାରମ୍ବାର ଗୁହାରୀ କରିଥିଲେ। ହେଲେ ରାସ୍ତା ନିର୍ମାଣ ହୋଇପାରିଲା ନାହିଁ । ହେଲେ ସମ୍ପୃକ୍ତ ଗ୍ରାମର ମନେଇ କହଁର ନାମକ ଜଣେ ବୃଦ୍ଧ ସେହି ରାସ୍ତା ନିର୍ମାଣ କରିଛନ୍ତି। ଏଥିପାଇଁ ତାଙ୍କୁ ନିଜସ୍ବ ଜାଗା ଦେବାକୁ ପଡିଛି। କେବଳ ସେତିକି ନୁହେଁ ଧାନ ବିକି ସଞ୍ଚିତ କରି ରଖିଥିବା ଦେଢ଼ଲକ୍ଷ ଟଙ୍କା ସେ ଖର୍ଚ୍ଚ କରିଛନ୍ତି। ଅବଶିଷ୍ଟ ସେ ୫୦ହଜାର ଟଙ୍କା ଅନ୍ୟମାନଙ୍କଠାରୁ ଧାର ସୂତ୍ରରେ ଆଣିଛନ୍ତି। ଏଥର ଧାନ ବିକିବା ପରେ ସେ ସେହି ଟଙ୍କା ସୁଝି ଦେବେ ବୋଲି କହିଛନ୍ତି। ନିଜସ୍ବ ଖର୍ଚ୍ଚରେ ସଡ଼କ ନିର୍ମାଣ କରି ମନେଇ ଅନ୍ୟମାନଙ୍କ ପାଇଁ ଉଦାହାରଣ ସୃଷ୍ଟି କରିଛନ୍ତି। ଏହି ଘଟଣା ନୟାଗଡ଼ ଜିଲା ନୁଆଗାଁ ବ୍ଲକ ବେରୁହଁାବାରୀ ପଞ୍ଚାୟତ ମଧୁବନ ଗାଁରେ ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁଯାୟୀ, ନୂଆଗାଁ ବ୍ଲକ ବେରୁହାଁବାରୀ ପଞ୍ଚାୟତ ମଧୂବନ ଗାଁରେ ୮ଟି ଆଦିବାସୀ ପରିବାର ବସବାସ କରନ୍ତି। ଏହି ଗାଁକୁ ରାସ୍ତା ନାହିଁ। ଗ୍ରାମବାସୀଙ୍କୁ ବାହାଡ଼ାଝୋଲାଠାରୁ ସୁନାମୁହିଁ ସଂଯୋଗ କରୁଥିବା ରାସ୍ତା ଭେଜିଖାଲକୁ ଯିବାକୁ ପଡେ । ସେଠାରୁ ଗାଁ ଭିତରକୁ ଚାଲି ଚାଲି ଯିବାକୁ ହୁଏ। ତେବେ ସରକାରଙ୍କ ଅନୁଦାନରେ ଦୀର୍ଘ ବର୍ଷ ପୂର୍ବେ ଗ୍ରାମ ଭିତରେ କଂକ୍ରିଟ ରାସ୍ତା ନିର୍ମାଣ କରାଯାଇଥିଲା । କିନ୍ତୁ ରାଜରାସ୍ତାଠାରୁ ଗ୍ରାମକୁ ଯିବାକୁ କୌଣସି ରାସ୍ତା ନ ଥିଲା। ଫଳରେ ଗହୀର ବିଲ ହୁଡା ଦେଇ ଗ୍ରାମବାସୀ ଯାତାୟତ କରୁଥିଲେ। କିନ୍ତୁ ଚାଲିକି ଯିବା ସହ ସାଇକେଲ କାନ୍ଧରେ ରଖି ଯିବା ଛଡା କୌଣସି ବାଇକ, ତିନି ଚକିଆ କିମ୍ବା ଚାରିଚକିଆ ଯାନ ଯାତାୟତ ସମ୍ଭବ ହେଉ ନ ଥିଲା । ପରିସ୍ଥିତି ଏପରି ହୋଇଥିଲା ଯେ, ରୋଗୀକୁ ଖଟିଆରେ ବୋହି ଆଣି ଭେଜିଖାଲଠାରୁ ଆମ୍ବୁଲାନ୍ସରେ ଡାକ୍ତରଖାନାରେ ନେବାକୁ ପଡୁଥିଲା । ତେବେ ଗ୍ରାମକୁ ରାସ୍ତାଟିଏ ନିର୍ମାଣ କରିବା ପାଇଁ ସ୍ଥାନୀୟ ନେତା, ବ୍ଲକ ପ୍ରଶାସନକୁ ମଧୁବନବାସୀ ବାରମ୍ବାର ନେହୁରା ହୋଇଥିଲେ। ହେଲେ କେହି କିଛି ଶୁଣୁ ନ ଥିଲେ । ଗ୍ରାମବାସୀଙ୍କ ଏପରି ଅବସ୍ଥା ଗ୍ରାମର ୮୦ ବର୍ଷର ବୃଦ୍ଧ ମନେଇ କହଁର ସହ୍ୟ କରି ପାରିଲେ ନାହିଁ । ନିଜ ଗାଁକୁ ରାସ୍ତା ନିର୍ମାଣ କରିବା ପାଇଁ ସେ ଅଣ୍ଟା ଭିଡିଲେ । ଗାଁକୁ ରାସ୍ତା ନିର୍ମାଣ ପାଇଁ ସେ ନିଜ ଚାଷ ଜମିକୁ ଦାନ କରିବା ସହ ଆଉ ଜଣେ ବ୍ୟକ୍ତିଙ୍କୁ କହି କିଛି ଜାଗା ମାଗିଲେ । ନିଜେ ଧାନ ବିକ୍ରୀ କରି ରଖିଥିବା ସ୍ବ ଅର୍ଜିତ ଟଙ୍କାରୁ ପ୍ରାୟ ୨ ଲକ୍ଷ ଟଙ୍କା ବ୍ୟୟରେ ସେ ଦଶଫୁଟ ଚଉଡାର ପ୍ରାୟ ଏକ କିଲୋମିଟର ରାସ୍ତା ନିର୍ମାଣ କରିଛନ୍ତି। ନିଜେ ଜେସିବି, ଟ୍ରାକ୍ଟର ଲଗାଇ ରାସ୍ତା ନିର୍ମାଣ କରିବାକୁ ପଛାଇ ନ ଥିଲେ ମନେଇ। ଏଥିପାଇଁ ମନ୍ତୋଇଙ୍କ ସଞ୍ଚତ୍ତ ଦେଢ଼ ଲକ୍ଷ ଟଙ୍କା ସେ ଖର୍ଚ୍ଚ କରି ସାରିଛନ୍ତି। ଆଉ ୫୦ହଜାର ଟଙ୍କା ସେ ଅନ୍ୟମାନଙ୍କୁ ସୁଝିବାକୁ ବାକି ରହିଛି। ଚଳିତ ବର୍ଷ ଧାନ ଅମଳ ହେଲେ ସେ ବାକି ଟଙ୍କା ସୁଝି ଦେବି ବୋଲି କହିଛନ୍ତି। ତାଙ୍କର ଏଭଳି କାର୍ଯ୍ୟକୁ ଅଞ୍ଚଳବାସୀ ପ୍ରଶଂସା କରିଛନ୍ତି।