ଭୁବନେଶ୍ୱର,୮।୭: ଘରୋଇ କ୍ରିକେଟ ସେସନ ଆରମ୍ଭ କରିବା ନେଇ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତା’ର ପ୍ରସ୍ତୁତି ଓ ଯୋଜନା ଚୂଡାନ୍ତ କରିବା ପରେ ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ମଧ୍ୟ ଏ ନେଇ ଅଣ୍ଟା ଭିଡିଛି। ଘରୋଇ କ୍ରିକେଟ ସେସନ ଆରମ୍ଭ କରିବାକୁ ଓସିଏ ଏବେ ରାଜ୍ୟ ସରକାରଙ୍କ ଅନୁମତି ଲୋଡିଛି। ବିସିସିଆଇର ବିଭିନ୍ନ ଇଭେଣ୍ଟରେ ଅଂଶଗ୍ରହଣ ଓ ଏ ନେଇ ରାଜ୍ୟର ପ୍ରସ୍ତୁତି ତଥା ଅଭ୍ୟାସ ଶିବିର ଆୟୋଜନ ନେଇ ମଧ୍ୟ ସରକାରଙ୍କ ଅନୁମତି ମଗାଯାଇଛି। ବୁଧବାର ଏ ସଂକ୍ରାନ୍ତରେ ଟୁର୍ନାମେଣ୍ଟ କମିଟି ଓ ଚୟନ କମିଟି (ସିନିୟର ଓ ଜୁନିୟର ପୁରଷ, ମହିଳା)କୁ ନେଇ ଓସିଏ ଆୟୋଜନ କରିଥିବା ବୈଠକରେ ବିଭିନ୍ନ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି।
କୋଭିଡ୍-୧୯ ମହାମାରୀକୁ ଦୃଷ୍ଟିରେ ରଖି ଓସିଏ ଧୀରେ ଧୀରେ କ୍ରିକେଟ କାର୍ଯ୍ୟକଳାପ ଆରମ୍ଭ କରିବ। ନିୟମ ଅନୁଯାୟୀ ସୁରକ୍ଷିତ ବାୟୋ ବବଲରେ କ୍ରିକେଟର ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯିବ।
ଜୁଲାଇ ୨୫ ତାରିଖରୁ କଟକ ଓ ଭୁବନେଶ୍ୱରରେ ସିନିୟର ଓ ୧୯ ବର୍ଷରୁ କମ୍ ଆନ୍ତଃଜିଲା କ୍ରିକେଟ ଟୁର୍ନାମେଣ୍ଟ ଆରମ୍ଭ ହେବ। ୩୭ଟି ଦଳକୁ ୬ଟି ଗ୍ରୁପ୍ରେ ବିଭକ୍ତ କରାଯିବ। ଲିଗ୍ ମ୍ୟାଚ୍ଗୁଡିକ ଦିନିକିଆ ଫର୍ମାଟ୍ରେ ଖେଳାଯିବ। ତେବେ ସୁପର ଲିଗ୍ ମ୍ୟାଚ୍ଗୁଡିକ ୩ଟି ଭିନ୍ନ ଫର୍ମାଟ(ଦିନିକିଆ, ଟି୨୦ ଓ ୨ ଦିନିଆ)ରେ ଆୟୋଜନ ହେବ।
ସୁପର ଲିଗ୍ରେ ୮ଟି ଦଳ ରହିବେ। ଲିଗ୍ର ୬ଟି ଦଳ ସହିତ ଅବଶିଷ୍ଟ ଓଡ଼ିଶାର ଏ ଓ ବି’ ଦଳ ମଧ୍ୟ ସୁପରଲିଗ୍ରେ ସାମିଲ ହେବେ। ସୁପରଲିଗ୍କୁ କ୍ୱାଲିଫାଏ କରିପାରି ନ ଥିବା ୩୧ ଦଳର ଖେଳାଳିଙ୍କୁ ପ୍ରଦର୍ଶନ ଭିତ୍ତିରେ ଚୟନକର୍ତ୍ତାମାନେ ଏହି ଦୁଇ ଦଳରେ ସାମିଲ କରିବେ। ଫଳରେ ୩୧ଟି ଦଳଗୁଡିକରୁ ପ୍ରତିଭାସମ୍ପନ୍ନ ଖେଳାଳିଙ୍କୁ ନିଜ ଦକ୍ଷତା ପ୍ରଦାନ କରିବା ଲାଗି ପୁନଃ ସୁଯୋଗ ମିଳିବ।
ସେହିପରି ଭୁବନେଶ୍ୱରରେ ୧୬ ବର୍ଷରୁ କମ୍ ଆନ୍ତଃଜିଲା ଟୁର୍ନାମେଣ୍ଟ ମଧ୍ୟ ଜୁଲାଇ ୨୫ରୁ ଆରମ୍ଭ ହେବ। ଏଥିରେ ୩୬ଟି ଦଳକୁ ୬ଟି ଗ୍ରୁପ୍ରେ ବିଭକ୍ତ କରାଯିବ। ଲିଗ୍ ମ୍ୟାଚ୍ଗୁଡିକ ଦିନିକିଆ ଫର୍ମାଟରେ ଖେଳାଯିବ। ସେହିପରି ସୁପରଲିଗ୍ ମ୍ୟାଚ୍ଗୁଡିକ ୮ଟି ଦଳ ମଧ୍ୟରେ ଖେଳାଯିବ ଓ ଏଗୁଡିକ ୨ ଦିନିଆ ଫର୍ମାଟରେ ଖେଳାଯିବ।
ସେହିପରି ଓସିଏ ମହିଳା କ୍ରିକେଟ ଟୁର୍ନାମେଣ୍ଟ ମଧ୍ୟ ଜୁଲାଇ ୨୫ ତାରିଖରୁ ଆରମ୍ଭ ହେବ। ଏହା ଭୁବନେଶ୍ୱରରେ ଉଭୟ ଦିନିକିଆ ଓ ଟି୨୦ ଫର୍ମାଟରେ ଖେଳାଯିବ।
ଏହି ଟୁର୍ନାମେଣ୍ଟଗୁଡିକରେ ପ୍ରଦର୍ଶନକୁ ଭିତ୍ତିକରି ଚୟନକର୍ତ୍ତାମାନେ ଶ୍ରେଷ୍ଠ ଖେଳାଳିଙ୍କୁ ନେଇ ୨୩, ୧୯ ଓ ୧୬ ବର୍ଷରୁ ଓଡ଼ିଶା ପୁରୁଷ ଦଳ ଓ ୨୩ ଓ ୧୯ ବର୍ଷରୁ କମ୍ ମହିଳା ଦଳ ଚୟନ କରିବେ। ଏହି ଦଳଗୁଡିକ ବିସିସିଆଇ ଟୁର୍ନାମେଣ୍ଟରେ ଅଂଶଗ୍ରହଣ କରିବେ।
