ପାରାଦୀପ,୧୩ା୩(ସ୍ବ.ପ୍ର.): ପାରାଦୀପ ପୋର୍ଟ ହସ୍ପିଟାଲରେ ଗତବର୍ଷ ଅଗଷ୍ଟ ୯ରୁ ଘଟିଥିବା ଅସଦାଚରଣ ଘଟଣାର ଦୁଃଖଦ ଖବର ମିଳିଛି। ନିର୍ଯାତନାର ଶିକାର ନର୍ସଙ୍କ ମଧ୍ୟରୁ ରବିବାର ପ୍ରତ୍ୟୁଷରୁ ଜଣଙ୍କର ଅସ୍ବାଭାବିକ ମୃତ୍ୟୁ ଘଟିଛି। ଘଟଣା ପରେ ପୋର୍ଟ ହସ୍ପିଟାଲ ଆଗରେ ସିଏମ୍ଓ ଡାକ୍ତର ପ୍ରହଲ୍ଲାଦ ପଣ୍ଡାଙ୍କ ବହିଷ୍କାର ଓ ଗିରଫ ଦାବିରେ ମୃତଦେହ ରଖି ଧାରଣା ଦିଆଯାଇଛି। ଘଟଣାକୁ ନିୟନ୍ତ୍ରଣ ପାଇଁ ପାରାଦୀପ ଆଦର୍ଶଥାନା ପୋଲିସ ଓ ବନ୍ଦର ସୁରକ୍ଷାରେ ଥିବା ସିଆଇଏସ୍ଏଫ୍ ଫୋର୍ସ ମୁତୟନ କରାଯାଇଛି।
ପ୍ରକାଶ ଯେ, ଗତବର୍ଷ ଅଗଷ୍ଟ ୯ ରାତିରେ ଡ୍ୟୁଟିରେ ଥିବା ଡାକ୍ତର ବାଦଲ ସିଂ ଜଣେ ନର୍ସଙ୍କୁ ଅସଦାଚରଣ କରିଥିଲେ। ଏହି ଘଟଣାରେ ସେତେବେଳେ ସଂପୃକ୍ତ ମହିଳା ନର୍ସ ହସ୍ପିଟାଲ ସିଏମଓଙ୍କୁ ଲିଖିତ ଅଭିଯୋଗ କରିଥିଲେ। କିନ୍ତୁ ତାଙ୍କୁ ନ୍ୟାୟ ନ ମିଳିବାରୁ ପାରାଦୀପ ଆଦର୍ଶଥାନାରେ ଅଭିଯୋଗ କରିଥିଲେ। ପରେ ଡା. ପଣ୍ଡା ଥାନାରେ ପହଞ୍ଚି ବୁଝାମଣା ଭିତରେ ସମାଧାନ ହେବ କହି ମାମଲାକୁ ଆଗକୁ ବଢ଼ିବାକୁ ଦେଇ ନ ଥିଲେ। ପରେ ହସ୍ପିଟାଲର ଏକ ଟିମ୍ ଗଠନ କରି ତଦନ୍ତ ଆରମ୍ଭ କରାଯାଇଥିଲା। ୭ ମାସ ମଧ୍ୟରେ ଯାଞ୍ଚ ବେଳେ ଡାକ୍ତରଙ୍କୁ ସୁରକ୍ଷା ଦେଇ ଆମ ୫ ଜଣ ନର୍ସଙ୍କୁ ନିର୍ଯାତନା ଦେଉଥିଲେ ବୋଲି ମୃତ ନର୍ସ ନିବେଦିତା ଜେନା ଶନିବାର ଗଣମାଧ୍ୟମକୁ ସୂଚନା ଦେଇଥିଲେ। ୫ ଜଣ ନର୍ସ ଶନିବାର ଗଣମାଧ୍ୟମ ପ୍ରତିନିଧିଙ୍କୁ ଜଣାଇଥିଲେ। ଏହାପରେ ତାଙ୍କୁ ହସ୍ପିଟାଲକୁ ଡକାଇ ଭୟଙ୍କର ଭାବେ ମାନସିକ ନିର୍ଯାତନା ଦିଆଯାଇଥିଲା ବୋଲି ନର୍ସ ରଶ୍ମିରେଖା କହିଛନ୍ତି। ଏପରିକି ଆମମାନଙ୍କ ନାଁରେ ଥାନାରେ ଏଫ୍ଆଇଆର ଲେଖା ଗଲା। ସେତିକି ବେଳେ ନିବେଦିତାଙ୍କ ରକ୍ତଚାପ ବଢ଼ି ଯାଇଥିଲା। ତାଙ୍କୁ ପ୍ରଥମେ ପୋର୍ଟ ହସ୍ପିଟାଲରେ ପ୍ରାଥମିକ ଚିକିତ୍ସା ପରେ କଟକର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ସେଠାରୁ ପୁଣି ଏମ୍ସ ନିଆଯାଇଥିଲା। ରବିବାର ଭୋର୍ରୁ ତାଙ୍କର ମୃତ୍ୟୁ ଘଟିଛି।
