ଭୁବନେଶ୍ୱର,୮୧୨(ରବିନାରାୟଣ ଜେନା):ରାଜ୍ୟର ପର୍ଯ୍ୟଟନ ଭିତ୍ତିଭୂମି ପ୍ରତି ଆକୃଷ୍ଟ ହୋଇ ବିଦେଶରୁ ଆସୁଥିବା ପର୍ଯ୍ୟଟକଙ୍କ ମଧ୍ୟରେ ଓ୍ବେଷ୍ଟର୍ନ ୟୁରୋପ ପର୍ଯ୍ୟଟକଙ୍କ ସଂଖ୍ୟା ଦିନକୁ ଦିନ ବଢୁଛି । ଏପରି କି କରୋନା ସତ୍ତ୍ୱେ ୫ବର୍ଷରେ ୭ଗୁଣ ବୃଦ୍ଧି ପାଇଛି ବୋଲି ପର୍ଯ୍ୟଟନ ମନ୍ତ୍ରୀ ତଥା ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କହିଛନ୍ତି।
ବିଧାୟକ ଟଙ୍କଧର ତ୍ରିପାଠୀଙ୍କ ପ୍ରଶ୍ନର ଉତ୍ତରରେ ଉପମୁଖ୍ୟମନ୍ତ୍ରୀ କହିଛନ୍ତି, ୨୦୨୦ରେ ରାଜ୍ୟରେ ଓ୍ବେଷ୍ଟର୍ନ ୟୁରୋପ ପର୍ଯ୍ୟଟକଙ୍କ ସଂଖ୍ୟା ୩୮୨୯ ରହିଥିବାବେଳେ ଏବେ ଏହା ୨୦,୮୫୭ରେ ପହଞ୍ଚିଲାଣି। ରାଜ୍ୟକୁ ଆସୁଥିବା ସମସ୍ତ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ତୁଳନାରେ ଏହା ଅର୍ଦ୍ଧାଧିକ। ବିଭାଗର ତଥ୍ୟ ଅନୁଯାୟୀ, ଓ୍ବେଷ୍ଟର୍ନ ୟୁରୋପ ମଧ୍ୟରେ ଅଷ୍ଟ୍ରିଆ, ବେଲଜିୟମ, ଡେନମାର୍କ, ଫିନ୍ଲାଣ୍ଡ, ଫ୍ରାନ୍ସ, ଜର୍ମାନୀ, ଆୟର୍ଲାଣ୍ଡ, ଇଟାଲୀ, ନେଦରଲାଣ୍ଡ, ସ୍ପେନ୍, ନରଓ୍ବେ, ସ୍ବିଡେନ, ସୁଇଜରଲାଣ୍ଡ, ବ୍ରିଟେନ, ଗ୍ରୀସ୍, ପର୍ତ୍ତୁଗାଲ ଓ ଅନ୍ୟାନ୍ୟ ଓ୍ବେଷ୍ଟର୍ନ ୟୁରୋପ ଦେଶରୁ ୨୦୨୧ରେ କରୋନା ପାଇଁ ମାତ୍ର ୮୪୫ଜଣ ଆସିଥିବାବେଳେ ୨୦୨୨ରେ ଏହା ୭୦୦୫କୁ ବୃଦ୍ଧି ପାଇଥିଲା। ୨୦୨୩ରେ ଏହା ୧୭ହଜାର ୧୨୬କୁ ବୃଦ୍ଧି ପାଇଥିବାବେଳେ ୨୦୨୪ରେ ୨୦ହଜାର ୮୫୭କୁ ବୃଦ୍ଧି ପାଇଛି। ଓଡ଼ିଶାକୁ ଗତବର୍ଷରେ ସମୁଦାୟ ୩୫ହଜାର ୯୭୧ଜଣ ବିଦେଶୀ ପର୍ଯ୍ୟଟକ ଆସିଥିବାବେଳେ ସେଥିମଧ୍ୟରୁ ଓ୍ବେଷ୍ଟର୍ନ ୟୁରୋପର ପର୍ଯ୍ୟଟକଙ୍କ ସଂଖ୍ୟା ସିଂହଭାଗ ରହିଛି।
ତଥ୍ୟ ଅନୁଯାୟୀ, ଓଡ଼ିଶାକୁ ୨୦୨୦ରେ ଉତ୍ତର ଆମେରିକାରୁ ୧୯୨୩ ପର୍ଯ୍ୟଟକ ଆସିଥିବାବେଳେ ଏବେ ଏହା ୭,୬୪୯ରେ ପହଞ୍ଚିଥିଲା। ସେହିପରି ଦକ୍ଷିଣ ଆମେରିକାରୁ ଏହି ଅବଧି ମଧ୍ୟରେ ୧୫୦ ପର୍ଯ୍ୟଟକରୁ ୮୮୬, ଅଷ୍ଟ୍ରେଲିଆରୁ ୫୬୮ରୁ ୨୮୫୩, ଇଷ୍ଟର୍ନ ୟୁରୋପରୁ ୪୯୧ରୁ ୩୦୬୧ ଏବଂ ଓ୍ବେଷ୍ଟ ଏସିଆରୁ ୨୫୦ରୁ ୬୬୫ଜଣକୁ ପର୍ଯ୍ୟଟକଙ୍କ ସଂଖ୍ୟା ବଢ଼ିଛି।
ଅନ୍ୟପକ୍ଷରେ ଦେଶର ପର୍ଯ୍ୟଟକଙ୍କ ଆଗମନ କ୍ଷେତ୍ରରେ ଓଡ଼ିଶା ୨୦ତମ ସ୍ଥାନରେ ରହିଛି। ଓଡ଼ିଶା ପଛରେ ଆସାମ, ପଡୁଚେରୀ, ହରିୟାଣା, ସିକ୍କିମ, ମେଘାଳୟ, ଦାଦ୍ରା ଓ ନଗର ହାଭେଳି ଏବଂ ଡାମନଡିଉ, ଚଣ୍ଡୀଗଡ଼, ଅରୁଣାଞ୍ଚଳପ୍ରଦେଶ, ଏଆଣ୍ଡଏନ୍ ଆଇସଲାଣ୍ଡ, ତ୍ରିପୁରା, ମିଜୋରାମ, ଲଦାଖ, ନାଗାଲାଣ୍ଡ, ଲାକ୍ଷାଦ୍ୱୀପ ଏବଂ ମଣିପୁର ରହିଛି। ତେବେ ଉତ୍ତରପ୍ରଦେଶକୁ ଦେଶର ସର୍ବାଧିକ ପର୍ଯ୍ୟଟକ ଆସୁଥିବା ଉପମୁଖ୍ୟମନ୍ତ୍ରୀ ବିଧାୟକ ଧ୍ରୁବଚରଣ ସାହୁଙ୍କ ଅନ୍ୟ ଏକ ପ୍ରଶ୍ନର ଉତ୍ତରରେ ଦର୍ଶାଇଛନ୍ତି।
Dharitri – Odisha’s No.1 Odia Daily
