ପୁରୀ, ୨୭ା୮(ଅଜିତ୍ ମହାନ୍ତି)ରାଜ୍ୟର ବିଭିନ୍ନ ଜିଲାରେ ଆସ୍ତେ ଆସ୍ତେ ଡେଙ୍ଗୁର ପ୍ରଭାବ ବୃଦ୍ଧି ପାଇବାରେ ଲାଗିଛି। ତେବେ ପୁରୀରେ ମଧ୍ୟ ଡେଙ୍ଗୁର ପ୍ରଭାବ ଦେଖିବାକୁ ମିଳିଛି। ଗତ କିଛିଦିନ ମଧ୍ୟରେ ଜିଲାରେ ବଢି ଚାଲିଛି ଡେଙ୍ଗୁ ରୋଗୀଙ୍କ ସଂଖ୍ୟା। ସଦର ମୁଖ୍ୟ ଚିକିତ୍ସାଳୟରେ ଅଧିକରୁ ଅଧିକ ଡେଙ୍ଗୁ ଆକ୍ରାନ୍ତ ପହଞ୍ଚତ୍ିବାରେ ଲାଗିଛନ୍ତି। ଡେଙ୍ଗୁ ଆକ୍ରାନ୍ତଙ୍କ ସଂଖ୍ୟା ବଢ଼ି ଚାଲିଥିବାବେଳେ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସା ପାଇଁ ପର୍ଯ୍ୟାପ୍ତ ଶଯ୍ୟା ନ ଥିବା ଅଭିଯୋଗ ହୋଇଛି। ସେହିପରି ଡେଙ୍ଗୁ ଆକ୍ରାନ୍ତଙ୍କୁ ଚିହ୍ନଟ କରିବା ପାଇଁ ହେଉଥିବା ପରୀକ୍ଷାରେ ଆବଶ୍ୟକ ଅନୁଯାୟୀ ଭିତ୍ତିଭୂମି ନ ଥିବାରୁ ଟେଷ୍ଟିଂରେ ଅଧିକ ସମୟ ଲାଗୁଥିବା ଅଭିଯୋଗ ହେଉଛି। ପୁରୀ ଭଳି ଏକ ଅନ୍ତର୍ଜାତୀୟ ପର୍ଯ୍ୟଟନ ସ୍ଥଳୀରେ ଡେଙ୍ଗୁ ରୋଗର ମୁକାବିଲା ପାଇଁ ଜିଲା ସ୍ବାସ୍ଥ୍ୟ ବିଭାଗ ଖାମଖିଆଲି ନୀତି ଗ୍ରହଣ କରୁଥିବା ନେଇ ବିଭିନ୍ନ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ବର୍ତ୍ତମାନ ପୁରୀ ପୌରାଞ୍ଚଳରେ ବଢ଼ିବଢ଼ି ଚାଲିଛି ଡେଙ୍ଗୁ ରୋଗୀଙ୍କ ସଂଖ୍ୟା। ପୁରୀ ଜିଲା ସ୍ବାସ୍ଥ୍ୟ ବିଭାଗର ତଥ୍ୟ ଅନୁସାରେ ଗତ ଜାନୁୟାରୀ ମାସରୁ ଅଗଷ୍ଟ ୨୬ ସୁଦ୍ଧା ୨୮୫ଜଣ ଡେଙ୍ଗୁ ରୋଗୀ ଚିହ୍ନଟ ହୋଇସାରିଲେଣି। ତେବେ ହଠାତ ଗତ ଏକମାସ ହେବ ଡେଙ୍ଗୁ ଆକ୍ରାନ୍ତଙ୍କ ସଂଖ୍ୟା ବଢ଼ି ଚାଲିଥିବା ଦେଖିବାକୁ ମିଳିଛି। ଡେଙ୍ଗୁ ଆକ୍ରାନ୍ତଙ୍କ ପାଇଁ ଜିଲା ମୁଖ୍ୟ ଚିକିତ୍ସାଳୟରେ ମାତ୍ର ୬ଟି ବେଡ୍ ରହିଛି। ପର୍ଯ୍ୟାପ୍ତ ବେଡ୍ ନ ଥିବାରୁ ଡେଙ୍ଗୁ ରୋଗୀମାନେ ଉପଯୁକ୍ତ ଚିକିତ୍ସା ପାଇବାରୁ ବଞ୍ଚତ୍ତ ହେଉଥିବା ଅଭିଯୋଗ ହୋଇଛି। ଫଳରେ ଅନେକ ଡେଙ୍ଗୁ ରୋଗୀ ବାଧ୍ୟହୋଇ ଘରୋଇ ହସ୍ପିଟାଲମୁହଁା ହେଉଛନ୍ତି। ପୁରୀ ଏକ ଅନ୍ତର୍ଜାତୀୟ ପର୍ଯ୍ୟଟନସ୍ଥଳୀ ହୋଇଥିବା ବେଳେ ଡେଙ୍ଗୁ ଆକ୍ରାନ୍ତଙ୍କୁ ଉପଯୁକ୍ତ ଚିକିତ୍ସା ନ ମିଳିବା ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ଏ ନେଇ ଜିଲା ମୁଖ୍ୟ ଚିକିତ୍ସା ଅଧିକାରୀ ଡ. ସୁଜାତା ମିଶ୍ର କହିଛନ୍ତି, ଗତ ଜାନୁୟାରୀ ମାସରୁ ଏପର୍ଯ୍ୟନ୍ତ ଜିଲାରେ ୨୮୫ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି। ତେବେ ଯେତିକି ପରିମାଣରେ ରୋଗୀ ଚିହ୍ନଟ ହୋଇଛନ୍ତି ସେମାନଙ୍କ ମଧ୍ୟରୁ ୫୦ ଶତକଡା ଜିଲାର ଅଧିବାସୀ ହୋଇଥିବା ବେଳେ ବାକି ଜିଲା ବାହାରର ଅଟନ୍ତି, ଯେଉଁମାନେ ପୁରୀରେ ରହି କାର୍ଯ୍ୟ କରୁଛନ୍ତି। ତେବେ ଡେଙ୍ଗୁ ରୋଗୀଙ୍କ ଚିକିତ୍ସା ପାଇଁ ମେଡିକାଲରେ ୬ଟି ବେଡ୍ କାର୍ଯ୍ୟକ୍ଷମ ରହିଛି। ଅପରପକ୍ଷେ ଲାବରେ ପ୍ରତ୍ୟେକ ଦିନ ଟେଷ୍ଟ କରାଯାଇ ଡେଙ୍ଗୁ ଚିହ୍ନଟ କରାଯାଉଛି। ପ୍ରତ୍ୟେକ ଦିନ ୨୫୦ରୁ ୩୦୦ ହାରାହାରି ନମୁନାର ଟେଷ୍ଟ କରାଯାଉଛି। ଟେଷ୍ଟରୁ ପ୍ରାୟ ଦିନକୁ ୨୦ରୁ ଅଧିକ ଡେଙ୍ଗୁ ବାହାରୁଥିଲେ। ତେବେ ଏବେ ଏହା କମିବାରେ ଲାଗିଛି। ଶୁକ୍ରବାର ଟେଷ୍ଟରେ ୧୧ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ଯେପରି ଡେଙ୍ଗୁ ଅଧିକ ନ ହେବ ସେଥିପାଇଁ ପୌରସଂସ୍ଥା ପକ୍ଷରୁ ଲୋକମାନଙ୍କୁ ସଚେତନ କରାଯାଉଛି। ଡାକବାଜି ଯନ୍ତ୍ର ସାହାଯ୍ୟରେ ସହରବାସୀଙ୍କୁ ସଚେତନ କରାଯାଉଛି। ମଶାରି ଟାଣି ଶୋଇବା, ଦେହକୁ ଘୋଡାଇ ରଖିବା, ବିଶେଷ କରି ସକାଳେ ଓ ସନ୍ଧ୍ୟାରେ ସଜାଗ ରହିବା, ନିଜ ଘର ଏବଂ ଚାରିପାଖକୁ ସଫା କରିବା, ପାଣି ନ ଜମିବାକୁ ସୂଚନା ଦିଆଯାଉଛି। ସେହିପରି ମଶାଙ୍କ ସଂଖ୍ୟାକୁ କମାଇବା ପାଇଁ ନାଳ ଏବଂ ଡ୍ରେନରେ ମଶାମରା ତେଲ ପକାଯାଉଛି। ପାଗ ଶୁଖିଲା ହେବା ପରେ ମଶାଧୂଆଁ ଛଡ଼ାଯିବ। ଲୋକମାନେ ସଚେତନ ରହିଲେ ଡେଙ୍ଗୁ ବ୍ୟାପିବାରୁ ନିଜକୁ ରକ୍ଷା କରିପାରିବେ। ଯଦି କାହାଘରେ ଡେଙ୍ଗୁ ରୋଗୀ ଅଛନ୍ତି ସେମାନଙ୍କୁ ଦିନରେ ମଧ୍ୟ ମଶାରି ମଧ୍ୟରେ ରଖନ୍ତୁ। ସମସ୍ତଙ୍କ ସହଯୋଗରେ ଡେଙ୍ଗୁର ନିୟନ୍ତ୍ରଣ କରିହେବ। ଅପରପକ୍ଷେ ଜିଲାପାଳ ସମର୍ଥ ବର୍ମା କହିଛନ୍ତି, ଜିଲା ମୁଖ୍ୟ ଚିକିତ୍ସାଳୟରେ ଡେଙ୍ଗୁ ରୋଗୀଙ୍କ ଚିକିତ୍ସା ପାଇଁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଛି। ନାଳ ନର୍ଦ୍ଦମାର ସଫେଇ, ମଶାମରା ତେଲ ସିଞ୍ଚନ କରିବା ପାଇଁ ପୁରୀ ପୌରପାଳିକାକୁ ନିର୍ଦ୍ଦେଶ ଦିଆଯାଇଛି। ଲୋକମାନଙ୍କୁ ସଚେତନ କରାଇବା ପାଇଁ ସଚେତନତା କାର୍ଯ୍ୟକ୍ରମ କରାଯାଉଛି। ଜନସାଧାରଣ ମଧ୍ୟ ନିଜ ପ୍ରତି ସଚେତନ ହେବା ଆବଶ୍ୟକ ବୋଲି ଜିଲାପାଳ କହିଛନ୍ତି।
