ଭୁବନେଶ୍ୱର, ୧୮।୫(ବ୍ୟୁରୋ): ସର୍ବସମ୍ମୁଖରେ ସ୍ବାମୀଙ୍କୁ ଚାପୁଡା ମାରି ଭିଣୋଇଙ୍କ ସହ ଜଣେ ନବବିବାହିତା ଫେରାର ହେବା ଘଟଣା ରାଜଧାନୀରେ ଚର୍ଚ୍ଚାର ବିଷୟ ପାଲଟିଛି। ଶ୍ରୀଲିଙ୍ଗରାଜ ମନ୍ଦିର ନିକଟରେ ଏହି ଅଭାବନୀୟ ଘଟଣା ଦେଖିବାକୁ ମିଳିଥିବାବେଳେ ସ୍ବାମୀ ବଳରାମ ସାହୁ ସ୍ତ୍ରୀ ଓ ତାଙ୍କ ଭିଣୋଇଙ୍କ ବିରୋଧରେ ଲିଙ୍ଗରାଜ ଥାନାରେ ଏତଲା ଦେଇଛନ୍ତି। ଅଭିଯୋଗ ଆଧାରରେ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି।
ଅନ୍ୟପକ୍ଷରେ ଏହି ଘଟଣାରେ ସମ୍ପୃକ୍ତ ମହିଳା ମଙ୍ଗଳବାର ମୁହଁ ଖୋଲିଛନ୍ତି। ସେ ସ୍ବାମୀଙ୍କ ନାମରେ ଗଣମାଧ୍ୟମରେ ପାଲଟା ଅଭିଯୋଗ କରିଛନ୍ତି। ସେ କହିଛନ୍ତି, ବାହାଘର ରାତିରେ ସେ ଓ ତାଙ୍କ ସ୍ବାମୀ ବଳରାମ ଏକାଠି ଥିଲେ। ସ୍ବାମୀ ତାଙ୍କ ପରିବାର ବିଷୟରେ ରାତି ସାରା କହିବା ସହ ଆହୁରି ଯୌତୁକ ଦାବି କରିଥିଲେ। ପୂର୍ବରୁ ତାଙ୍କ ବଡ଼ଭାଇଙ୍କ ସ୍ତ୍ରୀ ମଧ୍ୟ ଏଭଳି ଚାଲିଯାଇଛନ୍ତି। ସେମାନେ ତାଙ୍କୁ ନିର୍ଯାତନା ଦେଇଥାନ୍ତେ। ତେଣୁ ସେ ଘର ଛାଡି ପଳାଇଯିବାକୁ ନିଷ୍ପତ୍ତି ନେଇଥିଲେ। ତେବେ କୌଣସି ପୁରୁଷ ବନ୍ଧୁ ସହ ସେ ବିବସ୍ତ୍ର ଅବସ୍ଥାରେ ଭିଡ଼ିଓ କଲ୍ କରିନାହାନ୍ତି। ଏଭଳି ଅଭିଯୋଗ ମିଛ ବୋଲି ସେ କହିଛନ୍ତି।
ସୂଚନାଯୋଗ୍ୟ, ଭରତପୁର ଥାନା ଅଞ୍ଚଳରେ ବଳରାମ ଗତ ୧୨ ତାରିଖରେ ପିପିଲି ଅଞ୍ଚଳର ଜଣେ ଯୁବତୀଙ୍କୁ ସେ ବିବାହ କରିଥିଲେ। ପରଦିନ ସ୍ତ୍ରୀ ଏପରି କାଣ୍ଡ ଘଟାଇ ଫେରାର ହୋଇଥିଲେ।
