ରସୁଲପୁର,୮ା୧୦(ଡି.ଏନ୍.ଏ.): ଯାଜପୁର ଜିଲା ରସୁଲପୁର ବ୍ଲକ ମଧୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ନୂତନ କୋଠାକୁ ସ୍ଥାନାନ୍ତର ହେବାକୁ ୮ଦିନ ବିତିଲାଣି। ହେଲେ ଡାକ୍ତରଖାନାର ନାମ ଏବେ ବି ବଦଳି ନାହିଁ। ଏଥିପ୍ରତି ଡାକ୍ତରଖାନା କର୍ତ୍ତୃପକ୍ଷ ଦୃଷ୍ଟି ଦେବାକୁ ସାଧାରଣରେ ଦାବି ଜୋରଧରିଛି। ଡାକ୍ତରଖାନା ନାମ ନ ବଦଳି ଥିବାରୁ ସାଧାରଣ ରୋଗୀ ଓ ସେମାନଙ୍କ ସମ୍ପର୍କୀୟମାନଙ୍କୁ ନାନା ହଇରାଣ ହେବାକୁ ପଡୁଛି। ଡାକ୍ତରଖାନା ସ୍ଥାନାନ୍ତରରେ ବାଧା ସୃଷ୍ଟି କରୁଥିବା ସ୍ଥାନୀୟ କେତେଜଣ ଔଷଧ ବ୍ୟବସାୟୀ ବାହାରୁ ଆସୁଥିବା ରୋଗୀମାନଙ୍କୁ ଡାକ୍ତରଖାନା ସ୍ଥାନାନ୍ତର ପ୍ରସଙ୍ଗରେ ବାଟବଣା କରୁଥିବା ଲକ୍ଷ୍ୟ କରାଯାଉଛି। ଏଭଳି ଭ୍ରାନ୍ତ ଧାରଣା ଲୋକମାନଙ୍କ ମନରେ ପ୍ରସାରିତ ହେବା ପୂର୍ବରୁ ଡାକ୍ତରଖାନା କର୍ତ୍ତୃପକ୍ଷ ଏଥିପ୍ରତି ଯତ୍ନବାନ ହେବାର ଆବଶ୍ୟକତା ରହିଛି ବୋଲି ମତ ପ୍ରକାଶ ପାଇଛି।
ସୂଚନା ଅନୁଯାୟୀ, ଡାକ୍ତରଖାନାଟି ପୁରୁଣା ବିପଦସଙ୍କୁଳ କୋଠାରୁ ନୂତନ କୋଠାକୁ ସ୍ଥାନାନ୍ତରିତ କରାଯାଇଛି। ନୂତନ କୋଠା ଦୀର୍ଘବର୍ଷ ହେବ ଅବ୍ୟବହୃତ ହୋଇପଡିଥିବାରୁ କରୋନା କାଳରେ ଜିଲା ପ୍ରଶାସନ ପକ୍ଷରୁ ଏହି କୋଠାକୁ ସଙ୍ଗରୋଧ କେନ୍ଦ୍ରରେ ପରିଣତ କରାଯାଇଥିଲା। ଏବେ କରୋନାର ପ୍ରକୋପ ନାହିଁ କି ସଙ୍ଗରୋଧର ଆବଶ୍ୟକତା ପଡୁନାହିଁ। ଏହାରି ଭିତରେ ନିୟମମୁତାବକ ଯାଜପୁର ଜିଲାପାଳଙ୍କ ନିର୍ଦ୍ଦେଶକ୍ରମେ ୨୯ସେପ୍ଟମ୍ବରରେ ଡାକ୍ତରଖାନାଟି ଜିଲା ଓ ବ୍ଲକ ପ୍ରଶାସନର ଉପସ୍ଥିତରେ ସ୍ଥାନାନ୍ତରିତ ହୋଇଥିଲା। ଏହାକୁ ବିଭିନ୍ନ ମହଲରେ ସ୍ବାଗତ କରାଯାଇଥିଲା। ହେଲେ ବିଭିନ୍ନ ସ୍ଥାନରୁ ଏପରି କି ବ୍ଲକର ବାହାରରୁ ଆସୁଥିବା ରୋଗୀମାନେ ଚିରାଚରିତ ଢଙ୍ଗରେ ପୁରୁଣା କୋଠାକୁ ଆସୁଛନ୍ତି। ହେଲେ ସେଠାରେ ଡାକ୍ତରଖାନା ଚାଲୁ ନ ଥିବା ଦେଖି ପୁରୁଣା ଡାକ୍ତରଖାନା ନିକଟରେ ଥିବା ଔଷଧ ଦୋକାନୀମାନଙ୍କୁ ଏ ସମ୍ପର୍କରେ ପଚାରି ବୁଝୁଛନ୍ତି। ସେମାନଙ୍କ ମଧ୍ୟରୁ କେତେଜଣ ରୋଗୀ ଓ ସେମାନଙ୍କ ସମ୍ପର୍କୀୟମାନଙ୍କୁ ଡାକ୍ତରଖାନା ଯାଜପୁର ଜିଲା ଚିକିତ୍ସାକେନ୍ଦ୍ରକୁ ଉଠିଗଲା ଭଳି ଭୁଲ ତଥ୍ୟ ପ୍ରଦାନ କରୁଛନ୍ତି। ଏଭଳି ସୂଚନାରେ ରୋଗୀ ଓ ସେମାନଙ୍କ ସମ୍ପର୍କୀୟମାନଙ୍କୁ ଅଡ଼ୁଆରେ ପକାଉଛି। ଅନ୍ୟପକ୍ଷେ ସର୍ବସାଧାରଣଙ୍କ ଅବଗତି ନିମନ୍ତେ ନୂତନ ଡାକ୍ତରଖାନାର ମୁଖ୍ୟ ଫାଟକରେ ଲେଖାଥିବା ସଙ୍ଗରୋଧ କେନ୍ଦ୍ର ସୂଚନାକୁ ବଦଳାଇ ତୁରନ୍ତ ମଧୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ବୋଲି ଲେଖାଯାଉ। ଏଥିସହ ପୁରୁଣା ଡାକ୍ତରଖାନା କୋଠାରେ ଡାକ୍ତରଖାନାଟି ନୂତନ କୋଠାକୁ ଉଠି ଯାଇଥିବା ନେଇ ସୂଚନା ପ୍ରଦାନ କରାଯାଉ। ଫଳରେ ରୋଗୀମାନଙ୍କୁ ଡାକ୍ତରଖାନରେ ପହଞ୍ଚତ୍ବାରେ ଅସୁବିଧା ହେବ ନାହିଁ। ଔଷଧ ବ୍ୟବସାୟୀମାନେ ଆଗନ୍ତୁକମାନଙ୍କୁ ବାଟବଣା କରିବାର ସୁଯୋଗ ସୃଷ୍ଟି ହେବ ନାହିଁ ବୋଲି ସାଧାରଣରେ ମତ ପ୍ରକାଶ ପାଇଛି।
ଏ ସଂକ୍ରାନ୍ତରେ ମଧୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଅଧିକାରୀ ଡାକ୍ତର ବିଶ୍ୱ ରଞ୍ଜନ କରଙ୍କୁ ଡାକ୍ତରଖାନାର ମୁଖ୍ୟ ଫାଟକର ସୂଚନା ଫଳକକୁ ବଦଳାଇବା ସମ୍ପର୍କରେ ପଚାରିବାରୁ ଡାକ୍ତରଖାନାରେ ଆଉ ଅଳ୍ପ କିଛି କାମ ବାକି ଅଛି। ସେହି କାମ ସରିବା ପରେ ନୂତନ କୋଠାର ମୁଖ୍ୟ ଫାଟକରେ ସଙ୍ଗରୋଧ କେନ୍ଦ୍ର ବଦଳରେ ମଧୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଲେଖାଯିବ ବୋଲି ପ୍ରକାଶ କରିଛନ୍ତି। ଏଥିସହ ସହିତ ପୁରୁଣା ଡାକ୍ତରଖାନା କୋଠାର ଫାଟକରେ ଡାକ୍ତରଖାନା ନୂତନ କୋଠାକୁ ଉଠି ଯାଇଛି ବୋଲି ଉଲ୍ଲେଖ ରହିଥିବା ସୂଚନା ଦେଇଛନ୍ତି।
