ବରଗଡ଼,୩।୭(ପ୍ରେମାନନ୍ଦ ଖମାରୀ):ଚାକିରି ଦେବା ଆଳରେ ଯୁବତୀ, ଯୁବକଙ୍କୁ ଠକେଇ କରି ବରଗଡ଼ ପୋଲିସ ହାତରେ ଧରାପଡ଼ିଥିବା ଠକସଂସ୍ଥାର ଗୁମର ଫିଟିବାରେ ଲାଗିଛି। ଏହି ଠକସଂସ୍ଥା ଦ୍ୱାରା ଶତାଧିକ ବେକାର ଯୁବତୀ, ଯୁବକ ଠକେଇର ସମ୍ମୁଖୀନ ହୋଇଥିବା ଚର୍ଚ୍ଚା ଚାଲିଛି। ସେହିପରି କେବଳ ବରଗଡ଼ ନୁହେଁ, ଅନ୍ୟଜିଲା ଗୁଡ଼ିକୁ ମଧ୍ୟ ଉକ୍ତ ଠକସଂସ୍ଥାର ଚେର ଲମ୍ବିଥିବା ସାଧାରଣରେ ଆଲୋଚିତ ହେଉଛି। ବୁଧବାର ବରଗଡ଼ରେ ଠକସଂସ୍ଥା ଧରାପଡ଼ିବା ପରେ ଠକାମୀରେ ପଡ଼ିଥିବା ଅନେକ ଯୁବତୀ, ଯୁବକ ଗୁରୁବାର ସ୍ଥାନୀୟ ଟାଉନ ଥାନା ପୋଲିସକୁ ଫେରାଦ ହୋଇଥିବା ଜଣାପଡ଼ିଛି। ସମ୍ପୃକ୍ତ ଯୁବତୀ, ଯୁବକଙ୍କୁ ଏହି ଠକସଂସ୍ଥା ଷ୍ଟିଲ କମ୍ପାନୀରେ ଚାକିରି ଦେବା ଆଳରେ ଜଣ ପ୍ରତି ୨୦ହଜାରରୁ ୩୦ହଜାର ଟଙ୍କା ପର୍ଯ୍ୟନ୍ତ ନେଇଥିବା ଏବଂ ପରବର୍ତ୍ତୀ ସମୟରେ ସେମାନଙ୍କୁ ବରଗଡ଼ ସହରକୁ ଆଣି ମାର୍କେଟିଂ କାମରେ ଲଗାଇଥିବା ଅଭିଯୋଗ ହୋଇଛି। ଠକସଂସ୍ଥାର ଏଭଳି ଜାଲରେ ପଡ଼ି ଉପକୂଳ ଓଡ଼ିଶାର ଅନେକ ଯୁବତୀ, ଯୁବକ ବରଗଡ଼ ସହରକୁ ଆସିଥିଲେ ଏବଂ ଠକସଂସ୍ଥା ନେଇଥିବା ଭଡ଼ାଘରେ ରହୁଥିଲେ। ଉକ୍ତ ଠକସଂସ୍ଥାର ଠକାମୀ ଧରାପଡ଼ିବା ପରେ ସେହି ସଂସ୍ଥାକୁ ପରିଚାଳନା କରୁଥିବା ଜଣେ ଯୁବକଙ୍କୁ ପୋଲିସ ଅଟକ ରଖି ଅଧିକ ପଚରାଉଚରା କରୁଥିବା ସୂଚନା ମିଳିଛି। ଅନ୍ୟପଟେ ଠକସଂସ୍ଥାର ଜାଲରେ ପଡ଼ି ବରଗଡ଼ରେ ରହୁଥିବା ଉପକୂଳ ଓଡ଼ିଶାର ନିରୀହ ଯୁବତୀ, ଯୁବକମାନେ ଚାକିରି ପ୍ରଲୋଭନରେ ସେହି ଠକସଂସ୍ଥାକୁ ଦେଇଥିବା ଟଙ୍କା ଆଉ ଫେରି ପାଇବେ କି ନାହିଁ, ସେ ନେଇ ସେମାନଙ୍କୁ ଚିନ୍ତା ଘାରିଛି। ଏହା ସହିତ ପାଖରେ ଟଙ୍କା ନଥିବା ଯୋଗୁ ଘରକୁ ଫେରିବା ମଧ୍ୟ ସେମାନଙ୍କ ପାଇଁ କଷ୍ଟସାଧ୍ୟ ହୋଇ ପଡ଼ିଥବା ଉକ୍ତ ଯୁବତୀ, ଯୁବକମାନେ କହିଛନ୍ତି। ବରଗଡ଼ ବାନ୍ଦୁଟିକ୍ରାସ୍ଥିତ ସୁନାରୀ ଗଳିର ଏକ ଭଡ଼ାଘରେ ଏହି ଠକସଂସ୍ଥା ଚାଲିଥିବାବେଳେ କୌଣସି ସୂତ୍ରରୁ ଖବର ପାଇ ସ୍ଥାନୀୟ ଟାଉନ ଥାନା ପୋଲିସ ସେଠାକୁ ପହଞ୍ଚିଥିଲା ଏବଂ ତାକୁ ନେଇ ତନାଘନା ଜାରି ରଖିଛି।