ଭୁବନେଶ୍ୱର,୧୮।୬(ବ୍ୟୁରୋ): ଚନ୍ଦ୍ରଶେଖରପୁର ଥାନା ନୀଳାଦ୍ରିବିହାର ପଣ୍ଡାପାର୍କ ବସ୍ତି ନିକଟ ଏକ ଖାଲ ସ୍ଥାନରୁ ଗୁରୁବାର ନାବାଳକ ଦୈତ୍ୟରାଜ ନାୟକଙ୍କ ମୃତଦେହ ମିଳିବା ଘଟଣାରେ ରହସ୍ୟ ବଢ଼ିବାରେ ଲାଗିଛି। ମୃତଦେହ ମିଳିଥିବା ସ୍ଥାନରୁ ସାଇଣ୍ଟିଫିକ୍ ଟିମ୍ ଶୁକ୍ରବାର ନମୁନା ସଂଗ୍ରହ କରିଛି। ପୂର୍ବାହ୍ନ ପ୍ରାୟ ୧୦ଟାରେ ସାଇଣ୍ଟିଫିକ ଟିମ୍କୁ ନେଇ ପୋଲିସ ସେଠାକୁ ଯାଇଥିଲା। ଉକ୍ତ ସ୍ଥାନରେ ବସ୍ତିବାସିନ୍ଦାଙ୍କ ଭିଡ଼ ଜମିଥିଲା। ସାଇଣ୍ଟିଫିକ୍ ଟିମ୍ର ସଦସ୍ୟମାନେ ସେଠାରେ କର୍ଡନ କରି ବିଭିନ୍ନ ଦିଗକୁ ଯାଞ୍ଚ କରିବା ସହ ନମୁନା ସଂଗ୍ରହ କରିଥିଲେ। ପୋଲିସ ମଧ୍ୟ ବସ୍ତିବାସିନ୍ଦାଙ୍କୁ ବିଭିନ୍ନ ପ୍ରଶ୍ନ ପଚାରି ଫେରିଛି। ଅନ୍ୟପକ୍ଷରେ ଦୈତ୍ୟରାଜଙ୍କୁ ବସ୍ତିର କେତେଜଣ ନିର୍ଦ୍ଦିଷ୍ଟ ଯୁବକ ହତ୍ୟା କରିଥିବା ପରିବାର ଲୋକ ଦୃଢ଼ ନିଶ୍ଚିତ ହୋଇଛନ୍ତି। ଏପଟେ ଶୁକ୍ରବାର କ୍ୟାପିଟାଲ ହସ୍ପିଟାଲରେ ମୃତଦେହ ବ୍ୟବଚ୍ଛେଦ ହୋଇଛି। ପୋଲିସ ମୃତ୍ୟୁର କାରଣ ଜାଣିବାକୁ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରିଛି। ଏଥିସହ ବିଷକ୍ରିୟାରୁ ମୃତ୍ୟୁ ହୋଇଛି କି ନାହିଁ ତାହା ଜାଣିବା ପାଇଁ ଭିସେରା ରିପୋର୍ଟ ନିମନ୍ତେ ରାଜ୍ୟ ଫୋରେନ୍ସିକ୍ ଲାବକୁ ନମୁନା ପଠାଯାଇଛି। ଦୈତ୍ୟରାଜ ନିଖୋଜ ପରେ ତାଙ୍କ ମୋବାଇଲକୁ ପରିବାରକୁ ଦେଇଥିବା ଗେଡ଼ୁ ଓ ପଡୋଶୀ ଦୀପକଙ୍କୁ ପୋଲିସ ଉଠାଇଆଣି ଅଟକ ରଖିଥିବା ବିଶ୍ୱସ୍ତ ସୂତ୍ରରୁ ସୂଚନା ମିଳିଥିବାବେଳେ ଥାନାଧିକାରୀ ପ୍ରଦୀପ କୁମାର ରାଉତ କିନ୍ତୁ ଏହାକୁ ଖଣ୍ଡନ କରିଛନ୍ତି। ସେ କହିଛନ୍ତି, ବ୍ୟବଚ୍ଛେଦ ରିପୋର୍ଟ ଓ ଭିସେରା ରିପୋର୍ଟକୁ ଅପେକ୍ଷା କରାଯାଇଛି। କୌଣସି ବ୍ୟକ୍ତିଙ୍କୁ ଅଟକ ରଖାଯାଇନାହିଁ। ବସ୍ତିବାସିନ୍ଦାଙ୍କ କହିବା ଅନୁଯାୟୀ, ଦୀପକ ନିଶା କାରବାର କରନ୍ତି। ତେଣୁ ଏଥିପାଇଁ ବସ୍ତିରେ ନିଶାଡ଼ିଙ୍କ ଭିଡ଼ ଜମୁଥିଲା। ଏହି କାରଣ ପାଇଁ ତାଙ୍କ ଶାଳୀ ଓ ଦୈତ୍ୟରାଜଙ୍କ ଭଉଣୀଙ୍କ ମଧ୍ୟରେ ଝଗଡ଼ା ହୋଇଥିଲା। ଉକ୍ତ ଘଟଣାର ଆପୋସ ସମାଧାନ ପାଇଁ କିଛିଦିନ ତଳେ ବୈଠକ ମଧ୍ୟ ହୋଇଥିଲା। ଏହାକୁ ନେଇ ଦୀପକ ଧମକ ଦେଇଥିଲେ ବୋଲି ଦୈତ୍ୟରାଜଙ୍କ ଭାଇ ଶିବଶଙ୍କର କହିଛନ୍ତି। ଦୀପକ ହିଁ ଦୈତ୍ୟରାଜଙ୍କୁ ହତ୍ୟା କରିଥିବା ପରିବାର ଲୋକେ ଦାବି କରିଛନ୍ତି। ସୂଚନାଯୋଗ୍ୟ, ସୋମବାର ସାରେ ଦୈତ୍ୟରାଜ ବସ୍ତିରେ ବୁଲାବୁଲି କରୁଥିଲେ। ରାତି ପ୍ରାୟ ୧୦ଟା ୩୦ବେଳେ ଉକ୍ତ ବସ୍ତିରେ ରହୁଥିବା ଗେଡ଼ୁ ନାମକ ଜଣେ ଯୁବକ ଦୈତ୍ୟରାଜଙ୍କ ମୋବାଇଲ ଆଣି ପରିବାର ଲୋକଙ୍କୁ ଦେଇଥିଲେ। ପୁଅ କୁଆଡ଼େ ଗଲା ବୋଲି ପଚାରିବାରୁ ଗେଡ଼ୁ କିଛି ନ କହି ପଳାଇଯାଇଥିଲେ। ପୁଅକୁ ନ ପାଇ ପରିବାର ଲୋକେ ବହୁ ଖୋଜାଖୋଜି କରି ନୟାନ୍ତ ହୋଇପଡ଼ିଥିଲେ। ବାପା ଯୁଧିଷ୍ଠିର ମଙ୍ଗଳବାର ଅପରାହ୍ନରେ ଥାନାରେ ଅଭିଯୋଗ କରିବା ପରେ ପୋଲିସ ଏକ ଅପହରଣ ମାମଲା (ନଂ. ୨୦୨/୨୦୨୨) ରୁଜୁ କରି ତଦନ୍ତ ଆରମ୍ଭ କରିଥିଲା।
