କେନ୍ଦ୍ରାପଡ଼ା ଅଫିସ,୨୧।୮: ଖରସ୍ରୋତାରୁ ଭଦ୍ରକକୁ ପାଣି ଦେବା ବିବାଦ ଦିନକୁଦିନ ବ୍ୟାପକ ହେବାରେ ଲାଗିଛି। ଜିଲା ଓ ଜିଲା ବାହାରେ ଏହାର ସମର୍ଥକଙ୍କ ସଂଖ୍ୟା ବଢି ଚାଲିଛି। ଖରସ୍ରୋତା ନଦୀ ବଞ୍ଚାଅ ସଂଗ୍ରାମ ସମିତିକୁ ଅଞ୍ଚଳବାସୀଙ୍କ ସହ ବିରୋଧୀ ରାଜନୈତିକ ଦଳ, ସାମାଜିକ ସଙ୍ଗଠନ, ପରିବେଶବିତ୍ ସମର୍ଥନ ଜଣାଇଛନ୍ତି। ଗତ ୧୦ ତାରିଖରେ ଭଦ୍ରକ ଜିଲା ମେଗା ପାନୀୟ ଜଳ ପ୍ରକଳ୍ପର ପାଣି ଉଠା ସ୍ଥାନ କେନ୍ଦ୍ରାପଡ଼ା ଜିଲା ରାଜକନିକା ବ୍ଲକ ବରୁଣାଡିହାରେ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହୋଇଥିଲା। ଏଥିପାଇଁ ୮୦୦ରୁ ଊର୍ଦ୍ଧ୍ୱ ଆନ୍ଦୋଳନକାରୀଙ୍କ ନାମରେ ପୋଲିସ ଦୁଇଟି ମାମଲା କରିଛି। ଏହି ଦୁଇ ମାମଲାରେ ୨୪ ଜଣ ଗିରଫ ହୋଇଥିବାରୁ ଜନ ଆକ୍ରୋଶ ବଢ଼ିବାରେ ଲାଗିଛି। ସଂଗ୍ରାମ ସମିତି ପକ୍ଷରୁ ଗତ ୧୫ ତାରିଖରୁ ଅଚ୍ୟୁତପୁରର ମା’ ଅନ୍ଧାରଘରଣୀ ଠାକୁରାଣୀ ପୀଠରେ ଗଣଧାରଣା ଜାରି ରହିଛି। ଜିଲା ଛାତ୍ର କଂଗ୍ରେସ ପକ୍ଷରୁ ପ୍ରକଳ୍ପର ପାଣି ଉଠା ସ୍ଥାନ ନିକଟ ପତ୍ରପୁର ପୋଲ ନିକଟରେ ସ୍ଥାନୀୟ ଆଳି ବିଧାୟକ ପ୍ରତାପ ଦେବଙ୍କ କୁଶ ପୁତ୍ତଳିକା ଦାହ ସହ ଶୁକ୍ରବାର ରାସ୍ତାରୋକୋ କରାଯାଇଛି। ସେହିପରି ଭିତରକନିକାର ସୁରକ୍ଷା ପାଇଁ ଇକୋ ସେନ୍ସିଟିଭ ଜୋନ କମିଟି ସଭ୍ୟ ଶ୍ରୀକାନ୍ତ ନାୟକଙ୍କ ଅନଶନକୁ ଇତିମଧ୍ୟରେ ୧୧ ଦିନରେ ପହଞ୍ଚତ୍ଛି। ତାଙ୍କର ସ୍ବାସ୍ଥ୍ୟାବସ୍ଥା ଉଦ୍ବେଗଜନକ ସ୍ଥିତିରେ ଅଛି।
ମିଳିତ ଓଡ଼ିଶା ନିଶା ନିବାରଣ ଅଭିଯାନର ପଥ ପ୍ରଦର୍ଶକ ତଥା ସ୍ବାଧୀନତା ସଂଗ୍ରାମୀ ପଦ୍ମଚରଣ ନାୟକ ଖରସ୍ରୋତା ନଦୀ ବଞ୍ଚାଅ ଆନ୍ଦୋଳନସ୍ଥଳରେ ପହଞ୍ଚତ୍ଛନ୍ତି। ଏଥିସହ ପ୍ରକଳ୍ପ ସମ୍ପର୍କରେ ଜିଲା ମୁଖ୍ୟ ଚିକିତ୍ସାଳୟରେ ନିଜର ମତ ରଖିବା ସହ ଶ୍ରୀକାନ୍ତଙ୍କୁ ଅନଶନରୁ ଓହରି ଆନ୍ଦୋଳନକୁ ବ୍ୟାପକ କରିବାକୁ ଆହ୍ବାନ ଦେଇଛନ୍ତି। ଅପରପକ୍ଷରେ ଜିଲା ପ୍ରଶାସନ ଏହି ଜନଅସନ୍ତୋଷକୁ ନିୟନ୍ତ୍ରଣ କରିବାରେ ବିଫଳ ହୋଇଛି। ପ୍ରକଳ୍ପର ପାଣି ଉଠାସ୍ଥାନ ବରୁଣାଡିହାରେ ପ୍ରଥମ ଥର ପାଇଁ ପ୍ରକଳ୍ପ ସମ୍ପର୍କରେ ସୂଚନା ଫଳକ ଲଗା ଯାଇଛି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ସୃଷ୍ଟି ହୋଇଛି। ଏହି ଜନ ଅସନ୍ତୋଷର ସମାଧାନ ପାଇଁ ଆସନ୍ତା ୨୪ତାରିଖରେ ଏକ ଜନସଭା ଆୟୋଜନ ପାଇଁ ବିଭିନ୍ନ ସଙ୍ଗଠନର କର୍ମକର୍ତ୍ତାଙ୍କ ସହ ଜିଲା ପ୍ରଶାସନ ଆଲୋଚନା ଚଳାଇଛି।
ସୂଚନାଯୋଗ୍ୟ, ଭଦ୍ରକ ଜିଲାର ବାସୁଦେବପୁର, ଧାମନଗର, ତିହିଡି ଓ ଚାନ୍ଦବାଲି ବ୍ଲକ ସମେତ ୩ ଏନ୍ଏସିର ୬,୧୮,୨୫୩ ଜଣଙ୍କୁ ପାଇପ ଯୋଗେ ପାନୀୟ ଜଳ ଯୋଗାଣ ପାଇଁ ଚାନ୍ଦବାଲି ବ୍ଲକ ନୂଆହାଟଠାରେ ମେଗା ପାନୀୟ ଜଳ ପ୍ରକଳ୍ପ ନିର୍ମାଣାଧୀନ ଅଛି। ବସୁଧା ଯୋଜନାରେ ଏହି ପ୍ରକଳ୍ପ ପାଇଁ ମୋଟ ୮୯୨.୧୪ କୋଟି ଟଙ୍କା ବ୍ୟୟ ବରାଦ ହୋଇଛି। ଏହି ପ୍ରକଳ୍ପ ପାଇଁ ପ୍ରାଥମିକ ଅବସ୍ଥାରେ ଭଦ୍ରକ ଜିଲାର ଆଖୁଆପଦାଠାରେ ପାଣି ଉଠାଇବାକୁ ସ୍ଥିର ହୋଇଥିଲା। ତେବେ କୌଣସି କାରଣରୁ ପାଣି ଉଠା ସ୍ଥାନ ପରିବର୍ତ୍ତନ କରାଯାଇ ରାଜକନିକା ବ୍ଲକ ବରୁଣାଡିହା ନିକଟ ଖରସ୍ରୋତା ନଦୀରୁ ପାଣି ଉଠାଇବାକୁ ୨୦୧୯ରେ ପାଇପ ପଡିଥିଲା। ପାଇପ ପଡିବା ଦିନଠାରୁ ଆଳି ଓ ରାଜକନିକା ବ୍ଲକବାସୀ ସ୍ଥାନୀୟ ଅଞ୍ଚଳର କୃଷି ଓ ପାନୀୟ ଜଳ ପ୍ରଭାବିତ ହେବ ଦର୍ଶାଇ ବିରୋଧ କରି ଆସୁଛନ୍ତି। ଜନସଭା, ଜଳ ସତ୍ୟାଗ୍ରହ, ମାନବ ଶୃଙ୍ଖଳ, ଗଣଧାରଣା ଆଦି ସ୍ଥାନୀୟ ଅଞ୍ଚଳବାସୀ ଖରସ୍ରୋତା ନଦୀ ବଞ୍ଚାଅ ସଂଗ୍ରାମ ସମିତି ମାଧ୍ୟମରେ କରି ଆସୁଛନ୍ତି। ତେବେ ଗତ ୭ ତାରିଖଠାରୁ ବରୁଣାଡିହାରେ ପୋଲିସ ବଳୟ ମଧ୍ୟରେ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ଗତ ୧୦ ତାରିଖରେ ଜନ ଅସନ୍ତୋଷ ବରୁଣାଡିହାସ୍ଥିତ ନିର୍ମାଣାଧୀନ ପ୍ରକଳ୍ପ ଅଞ୍ଚଳରେ ଜନ ଆକ୍ରୋଶରେ ପରିଣତ ହୋଇଥିଲା। କେନ୍ଦ୍ରାପଡ଼ା ଜିଲା ପ୍ରଶାସନର କଟକଣାକୁ ଖାତିର ନ କରି ଆନ୍ଦୋଳନକାରୀ ପ୍ରକଳ୍ପ ଅଞ୍ଚଳରେ ପହଞ୍ଚତ୍ ଭଙ୍ଗାରୁଜା କରିଥିଲେ। ତେବେ ପରଦିନଠାରୁ ପୋଲିସ ସୁରକ୍ଷାକୁ ଅଧିକ ବଢ଼ାଇ ନିର୍ମାଣ କାର୍ଯ୍ୟ ଜାରି ରଖିଛି।
