ସୀତାପୁର,୨୩।୧୨-ପଞ୍ଜିକରଣ ପାଇଁ ଆସିଥିବା ଜଣେ ବୃଦ୍ଧଙ୍କୁ ଏକ ମାଙ୍କଡ ଚାପୁଡା ମାରି ତାଙ୍କଠାରୁ ଟଙ୍କା ଭର୍ତ୍ତି ବ୍ୟାଗ ନେଇଯାଇଛି। ପରେ ବ୍ୟାଗରେ ଥିବା ୪ ଲକ୍ଷ ଟଙ୍କା ମଧ୍ୟରୁ ୧୦ ରୁ ୧୨ ହଜାର ଟଙ୍କା ମାଙ୍କଡ ଚିରି ନଷ୍ଟ କରି ଦେଇଛି। ଉତ୍ତରପ୍ରଦେଶ ସୀତାପୁର ଜିଲା କୋଟଓ୍ବାଲି ଅଞ୍ଚଳରେ ଏଭଳି ଘଟଣା ଦେଖିବାକୁ ମିଳିଛି।
ଘଟଣାରୁ ଜଣାପଡିଛି, ଗତ ମଙ୍ଗଳବାର ବୃଦ୍ଧ ଜଣକ ବିକାଶ ଭବନ ସ୍ଥିତ ରେଜିଷ୍ଟ୍ରି କାର୍ଯ୍ୟାଳୟକୁ ଜମି ବିକ୍ରି ପାଇଁ ଆସିଥିଲେ। ଜମି ବିକ୍ରି କରି ତାଙ୍କୁ ୪ ଲକ୍ଷ ଟଙ୍କା ମିଳିଥିଲା। ପରେ ସେ କାର୍ଯ୍ୟାଳୟ ନିକଟରେ ଥିବା ଏକ ଗଛ ତଳେ ବସି ରହିଥିଲେ। ସେହି ସମୟରେ ହଠାତ୍ ଏକ ମାଙ୍କଡ ଆସି ତାଙ୍କୁ ଚାପୁଡା ମାରି ତାଙ୍କଠାରୁ ଟଙ୍କା ଭର୍ତ୍ତି ବ୍ୟାଗକୁ ନେଇ ପଳାଇଥିଲା। ବ୍ୟାଗରେ କିଛି ଖାଦ୍ୟ ଜିନିଷ ଥିବା ଭାବି ସେ ବ୍ୟାଗକୁ ନେଇ ଗଛ ଉପରକୁ ପଳାଇଥିଲା। ଏହାପରେ ସ୍ଥାନୀୟ ଲୋକ ଘଟଣାସ୍ଥଳରେ ପହଞ୍ଚି ମାଙ୍କଡ ଠାରୁ ବ୍ୟାଗ ଆଣିବାକୁ ଚେଷ୍ଟା କରିଥିଲେ। ହେଲେ ମାଙ୍କଡଟି ବ୍ୟାଗରୁ ଏକ ନୋଟ ବିଡା ବାହାର କରି ଟଙ୍କା ଚିରି ତଳକୁ ଫୋପାଡ଼ି ଦେଇଥିଲା। କିଛି ସମୟ ପରେ ମାଙ୍କଡ ହାତରୁ ବ୍ୟାଗ ତଳକୁ ଖସି ଯାଇଥିଲା। ପରେ ଲୋକେ ବ୍ୟାଗକୁ ଉଦ୍ଧାର କରି ବୃଦ୍ଧଙ୍କୁ ଫେରାଇଥିଲେ।
