ସମ୍ବଲପୁର,୨୯।୭(ବ୍ୟୁରୋ): କରୋନା କଟକଣା ଯୋଗୁ ସମ୍ବଲପୁର ଜିଲାପାଳଙ୍କ କାର୍ଯ୍ୟାଳୟକୁ ସର୍ବସାଧାରଣଙ୍କ ପ୍ରବେଶ ଉପରେ ରୋକ୍ ଲାଗିଛି। ହେଲେ ମଙ୍ଗଳବାର ବିଧାୟକ ଜୟନାରାୟଣ ମିଶ୍ରଙ୍କ ନେତୃତ୍ୱରେ ଭାଜପା କର୍ମକର୍ତ୍ତା ଜିଲାପାଳଙ୍କ କାର୍ଯ୍ୟାଳୟକୁ ଧସେଇ ପଶିବାକୁ ଉଦ୍ୟମ କରିଥିଲେ। ଫଳରେ କିଛି ସମୟ ପାଇଁ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା। ସେଠାରେ ମୁତୟନ ପୋଲିସ ଫୋର୍ସ ସେମାନଙ୍କ ବାଟ ଓଗାଳିଥିଲେ। ଏହାକୁ ସହଜରେ ଗ୍ରହଣ କରି ପାରି ନ ଥିଲେ ବିଧାୟକ ମିଶ୍ର। ପୋଲିସ ମଧ୍ୟ ଭାଜପା କର୍ମକର୍ତ୍ତାଙ୍କୁ ଛାଡିବାକୁ ପ୍ରସ୍ତୁତ ନ ଥିଲା। ଦୁଇପକ୍ଷ ଜିଦ୍ରେ ଅଟଳ ରହିଥିଲେ। ଫଳରେ ପୋଲିସ ଓ ବିଧାୟକଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଶେଷରେ ଭାଜପା କର୍ମକର୍ତ୍ତା ଧସେଇ ପଶିବା ସହ ଏଡିଏମ୍ ଉମାକାନ୍ତ ରାଜଙ୍କୁ ଭେଟି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଥିଲେ।
ଏ ସଂକ୍ରାନ୍ତରେ ଭାଜପା କର୍ମକର୍ତ୍ତା କହିଛନ୍ତି, କରୋନା ମୁକାବିଲା ପାଇଁ ଭାଜପା ସବୁ ସମୟରେ ପ୍ରଶାସନ ସହିତ ସହଯୋଗ କରିଆସୁଛି। ହେଲେ ରାଜ୍ୟ ସରକାର କରୋନା ବାହାନାକରି ରାଜ୍ୟବାସୀଙ୍କୁ ଭଣ୍ଡାଇ ଚାଲିଛନ୍ତି। ଏବେ ଜିଲାରେ କୋଭିଡ୍ ପରୀକ୍ଷା ପାଇଁ କିଟ୍ ଅଭାବ ରହୁଛି। ସ୍ବାବ୍ ପରୀକ୍ଷା ଲାଗି ବିଳମ୍ବ ହେବାରୁ ସଂକ୍ରମଣ ବୃଦ୍ଧି ପାଇବାରେ ଲାଗିଛି। ପଶ୍ଚିମ ଓଡ଼ିଶାବାସୀ ଉପଯୁକ୍ତ ସ୍ବାସ୍ଥ୍ୟ ସେବା ପାଇବାରେ ବଞ୍ଚିତ ହେଉଛନ୍ତି। କୋଭିଡ୍ ପରିଚାଳନାରେ ଡାକ୍ତରମାନଙ୍କୁ ନିୟୋଜିତ କରିବା ଓ ଅନ୍ୟସ୍ଥାନକୁ ବଦଳି କରାଯାଇଛି। ହେଲେ ସେହି ସ୍ଥାନ ପୂରଣ କରାଯାଉ ନାହିଁ। ତେଣୁ ଡାକ୍ତରଖାନାଗୁଡିକରେ ସମସ୍ୟା ଦେଖାଦେଇଛି।
ଅନ୍ୟମାନଙ୍କ ମଧ୍ୟରେ ରେଙ୍ଗାଲି ବିଧାୟକ ନାଉରୀ ନାଏକ, ଜିଲା ସଭାପତି ଗିିରିଶ ପଟେଲ, ରାଜ୍ୟ ସାଧାରଣ ସମ୍ପାଦକ ରବି ନାଏକ, ରାଜ୍ୟ ସମ୍ପାଦକ ସୀମାଞ୍ଚଳ ଖଟେଇ, ଟଙ୍କଧର ତ୍ରିପାଠୀ, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଦେବେନ୍ଦ୍ର ମହାପାତ୍ର, ରାମଚନ୍ଦ୍ର ମେହେର ପ୍ରମୁଖ ଏହି ଆନ୍ଦୋଳନରେ ଉପସ୍ଥିତ ଥିଲେ।
ବିଧାୟକ ମିଶ୍ର କହିଛନ୍ତି, ଜଣେ ବିଧାୟକ ଲୋକମାନଙ୍କ ସମସ୍ୟା ନେଇ ଜିଲାପାଳଙ୍କୁ ଭେଟିବାରେ କୌଣସି ଅସୁବିଧା ନାହିଁ। ପୋଲିସ ଗେଟ୍ ସମ୍ମୁଖରେ ଆମକୁ ଅଟକାଇବା ଅଗଣତାନ୍ତ୍ରିକ। ଅନ୍ୟପକ୍ଷେ ବିଜେଡି ଜିଲା ସଭାପତି ସିଦ୍ଧାର୍ଥ ଦାସ ଏକ ପ୍ରେସ୍ ବିବୃତିରେ କହିଛନ୍ତି ଯେ, କରୋନା କଟକଣା ସମୟରେ ଭାଜପା ଜିଲା ପ୍ରଶାସନ ସହ ଆଲୋଚନା କରି ସମସ୍ୟାର ସମାଧାନ କରିବା କଥା। ହେଲେ ଖବରରେ ରହିବାକୁ ଭାଜପା ଚେଷ୍ଟା କରୁଛି। କରୋନା କଟକଣା ନିୟମ ଭାଙ୍ଗିବା, ସରକାରୀ ଅଧିକାରୀ ଓ କର୍ମଚାରୀଙ୍କୁ ଗାଳିଗୁଲଜ କରୁଥିବା ଭିଡିଓ ଭାଇରାଲ ହୋଇଛି। ତେଣୁ ଭାଜପା କର୍ମକର୍ତ୍ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ସେ ଦାବି କରିଛନ୍ତି।
