ନୟାଗଡ଼ ଅଫିସ,୨୩।୧୨: ନୟାଗଡ଼ ଜିଲା ସଦର ମହକୁମାର ନୂଆ ବସ୍ଷ୍ଟାଣ୍ଡର ନବୀକରଣ ଓ ମାର୍କେଟ କମ୍ପ୍ଲେକ୍ସର ଉଦ୍ଘାଟନୀ ଉତ୍ସବ ବୁଧବାର ଅନୁଷ୍ଠିତ ହୋଇଥିଲା। ଏଥିରେ ବାଣିଜ୍ୟ ଓ ପରିବହନ ମନ୍ତ୍ରୀ ପଦ୍ମନାଭ ବେହେରା ଯୋଗ ଦେଇ ନୂଆ ବସ୍ଷ୍ଟାଣ୍ଡକୁ ଉଦ୍ଘାଟନ କରିବା ସହିତ ବସ୍ ଚଳାଚଳର ଶୁଭାରମ୍ଭ କରିଥିଲେ। ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ନୟାଗଡ଼ ବିଧାୟକ ତଥା ଉଚ୍ଚଶିକ୍ଷା ମନ୍ତ୍ରୀ ଅରୁଣ ସାହୁ ଯୋଗ ଦେଇଥିଲେ। ବସ୍ ଚଳାଚଳ ଆରମ୍ଭ ପରେ ମନ୍ତ୍ରୀ ସାହୁ ଖୁବ୍ ଉତ୍ସାହିତ ହୋଇପଡିଥିଲେ। ନୟାଗଡ଼-ରାଉରକେଲାର ରାଜ୍ୟ ପରିବହନ ବିଭାଗର ଏକ ସରକାରୀ ବସ୍କୁ ମନ୍ତ୍ରୀ ସାହୁ ଚଳାଇବାକୁ ଚେଷ୍ଟା କରିଥିଲେ। ଡ୍ରାଇଭରଙ୍କ ସିଟ୍ରେ ବସି ମନ୍ତ୍ରୀ ସେହି ବସ୍କୁ ପଛ ଆଗ କରି କିଛି ବାଟ ଗଡାଇଥିଲେ। ମନ୍ତ୍ରୀଙ୍କ ଏପରି ଡ୍ରାଇଭିଂକୁ ଦେଖି ଉପସ୍ଥିତ ଲୋକମାନେ ତାଳି ମାରିବା ସହ ମନ୍ତ୍ରୀଙ୍କୁ ଉତ୍ସାହିତ କରିଥିଲେ। କେହି କେହି ଆମ ବିଧାୟକ ସବୁଥିରେ ପାରଙ୍ଗମ ବୋଲି କହୁଥିବା ଶୁଣିବାକୁ ମିଳିଥିଲା।
