ପୁରୀ ଅଫିସ,୨୯।୮: ଶ୍ରୀମନ୍ଦିର ସିଂହଦ୍ୱାର ସମ୍ମୁଖ ଅରୁଣସ୍ତମ୍ଭରେ ଥିବା କିଛି ସୂକ୍ଷ୍ମ ଫାଟକୁ ନେଇ ଚର୍ଚ୍ଚା ଚାଲିଛି। ଅନ୍ୟପକ୍ଷରେ ସମ୍ପୃକ୍ତ ଫାଟ ୧୯୭୦-୭୫ ମସିହାଠାରୁ ଦେଖିବାକୁ ମିଳୁଥିବା ଶ୍ରୀମନ୍ଦିରର କେତେଜଣ ସେବାୟତ କହିଛନ୍ତି। ତେବେ ଦୀର୍ଘବର୍ଷ ଧରି ସେହି ସ୍ଥାନଗୁଡ଼ିକୁ ମରାମତି କାହିଁକି କରାଯାଉନାହିଁ ବୋଲି ଭକ୍ତଙ୍କ ମଧ୍ୟରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଅରୁଣସ୍ତମ୍ଭ ଗୋଟିଏ କଳା ମୁଗୁନି ପଥରରେ ନିର୍ମିତ। ଏହା ଭୂମିଠାରୁ ପ୍ରାୟ ୧୭ ଫୁଟ୍ ଉଚ୍ଚରେ ପୂର୍ବମୁହାଁ ହୋଇ ରହିଛି। ବାଇଶିପାହାଚ ପଟକୁ ଥିବା ଅରୁଣସ୍ତମ୍ଭର ଭାଗରେ ଏଭଳି ତିନୋଟି ସ୍ଥାନ ରହିଛି, ଯେଉଁଠାରେ ଗାର ପଡ଼ିବା ପରି ସୂକ୍ଷ୍ମ ଫାଟ ହୋଇଥିବା ଦେଖାଯାଉଛି। ଏସମ୍ପର୍କରେ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ (ଏଏସ୍ଆଇ)ର ପୁରୀ ସର୍କଲ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ, ପ୍ରାୟ ୧୯୭୦ ମସିହାଠାରୁ ରହିଥିବା ସମ୍ପୃକ୍ତ ସ୍ଥାନକୁ ଅଧିକାରୀ ଓ ସେବାୟତମାନେ ଦେଖୁଛନ୍ତି। ଏହା ଆଦୌ ନୂଆ ନୁହେଁ। ଏହାକୁ ଫାଟ କିମ୍ବା ଖାଲ ବୋଲି କୁହାଯାଇପାରିବ ନାହିଁ। ଦୀର୍ଘବର୍ଷ ଧରି ଗୋଟିଏ ପଥର ମୂଳରୁ ଶେଷ ପର୍ଯ୍ୟନ୍ତ ସମ୍ପୂର୍ଣ୍ଣ ପଲିସ ରହିବା ସମ୍ଭବପର ନୁହେଁ। ତେବେ ଏନେଇ କ’ଣ ପଦକ୍ଷେପ ନିଆଯାଇପାରିବ ସେ ସଂକ୍ରାନ୍ତରେ ଏଏସ୍ଆଇ ବିଚାର କରୁଛି। ଅନ୍ୟପକ୍ଷରେ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ଦୁର୍ଗାଦାସ ମହାପାତ୍ର କହିଛନ୍ତି, ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଏନେଇ ଚର୍ଚ୍ଚା ଚାଲିଛି। ତେବେ କାହାକୁ ଫାଟ ବୋଲି କୁହାଯାଉଛି ସେନେଇ ପ୍ରଥମେ ସ୍ପଷ୍ଟ ହେବା ଦରକାର। କିଏ ଏ ସଂକ୍ରାନ୍ତରେ ଅନୁସନ୍ଧାନ କଲେ ତାହା ଜାଣିବାକୁ ଚାହିଁବୁ। କୌଣସି ଏଜେନ୍ସି, ଏଏସ୍ଆଇ ଟିମ୍ କିମ୍ବା ଚୂନରା ସେବାୟତଙ୍କ ପକ୍ଷରୁ ଯଦି ଅରୁଣସ୍ତମ୍ଭ ଯାଞ୍ଚ କରି ସମ୍ପୃକ୍ତ ସ୍ଥାନ ଚିହ୍ନଟ କରାଯାଇଛି, ତେବେ ତାହା ପ୍ରଥମେ ସାର୍ବଜନୀନ ହେବା ଦରକାର। ସୋମବାର (୨୯ ତାରିଖ) ଶ୍ରୀମନ୍ଦିର ପରିଚାଳନା କମିଟିର ବିଭିନ୍ନ ନିଯୋଗ ସହ ଆଲୋଚନା ରହିଛି। ଉକ୍ତ ବୈଠକରେ ଚୂନରା ସେବାୟତଙ୍କୁ ଏ ସମ୍ପର୍କରେ ପଚରାଯିବ ଓ ଘଟଣାର ସତ୍ୟତା ଯାଞ୍ଚ କରାଯିବ। ଅନ୍ୟପକ୍ଷରେ ସେବାୟତ ରାଜକିଶୋର ପତି କହିଛନ୍ତି, କୌଣସି ନୂଆ ଘଟଣା ଘଟିନାହିଁ। ଗଣମାଧ୍ୟମ ପ୍ରାୟ ପ୍ରତିବର୍ଷ ଏହି ପ୍ରସଙ୍ଗ ନିଜେ ଉଠାଉଛି। ଫାଟ କଥା ସତ ନୁହେଁ। ଏଏସ୍ଆଇ ଚାହିଁଲେ ଏହାକୁ ସାମାନ୍ୟ ପଲିସ କରିପାରିବ, ଯାହାଫଳରେ ଅରୁଣସ୍ତମ୍ଭ ଅଧିକ ସୁନ୍ଦର ଦିଶିବ ବୋଲି ସେ ମତ ପ୍ରକାଶ କରିଛନ୍ତି।
