ନୂଆଦିଲ୍ଲୀ,୧୩।୬: କ୍ରୋଏସିଆର ଜଣେ ସଙ୍ଗୀତ ଶିକ୍ଷକ ଫ୍ରାନୋ ସେଲାକଙ୍କ ଜୀବନ ଏକ ଫିଲ୍ମ କାହାଣୀଠାରୁ କମ ନୁହେଁ। ୧୯୨୯ ମସିହାରେ ଜନ୍ମ ହୋଇଥିବା ସେଲାକ ସାତ ଥର ମୃତ୍ୟୁକୁ ଜୟ କରିଛନ୍ତି ଅର୍ଥାତ୍ ମୃତ୍ୟୁମୁଖରୁ ଫେରି ଆସିଛନ୍ତି। ଶେଷରେ ଲଟେରୀରେ ପ୍ରାୟ ୧୦ କୋଟି ଟଙ୍କା (୧ ମିଲିୟନ ଡଲାର) ଜିତି ଦୁନିଆରେ ଚର୍ଚ୍ଚିତ ହୋଇଛନ୍ତି।
ସେଲାକଙ୍କ ଅସାଧାରଣ ଜୀବନ ଯାତ୍ରା ଆରମ୍ଭ ହୋଇଥିଲା ୧୯୫୭ ମସିହାରେ। ସେ ଏକ ବସେରେ ଯାତ୍ରା କରୁଥିବା ବେଳେ ବସଟିି ନଦୀକୁ ଖସି ପଡି ଅନ୍ୟ ଯାତ୍ରୀଙ୍କ ମଧ୍ୟରେ ଅନେକେ ମୃତ୍ୟୁ ବରଣ କରିଥିଲେ, କିନ୍ତୁ ସେଲାକ ବଞ୍ଚିଯାଇଥିଲେ। ଏହା ପରେ ଆହୁରି ଛଅଟି ଭୟଙ୍କର ଦୁର୍ଘଟଣାରୁ ସେ ଅଳ୍ପେ ଅଳ୍ପେ ବଞ୍ଚିଥିଲେ। ୧୯୬୨ ମସିହାରେ ଏକ ଟ୍ରେନ ଦୁର୍ଘଟଣାରେ ସେ ନଦୀକୁ ଖସି ପଡି ୧୯୬୩ ରେ ଏକ ବିମାନ ଦୁର୍ଘଟଣାରୁ ବଞ୍ଚିଥିଲେ। ଦୁଇଥର ତାଙ୍କ ଗାଡିରେ ନିଆଁ ଲାଗି ବିସ୍ଫୋରଣ ହୋଇଥିଲା, ଏକ ବସ ତାଙ୍କୁ ଧକ୍କା ଦେଇଥିଲା ଓ ୧୯୯୬ ରେ ଖାଇକୁ ଖସି ପଡିବାବେଳେ ସେ ଗଛରେ ଝୁଲି ପଡି ବଞ୍ଚିଥିଲେ।
ଏହି ସବୁ ଦୁର୍ଘଟଣା ପରେ ୨୦୦୩ ମସିହାରେ ସେଲାକଙ୍କ ଭାଗ୍ୟ ବଦଳିଗଲା। ସେ କ୍ରୋଏସିଆର ଲଟେରୀରେ ପ୍ରାୟ ୧୦ କୋଟି ଟଙ୍କା ଜିତିଥିଲେ। ଏହି ଟଙ୍କାରେ ସେ ଏକ ଆଲିଶାନ ଘର କିଣିଥିଲେ, କିନ୍ତୁ ୨୦୧୦ ମସିହାରେ ସେ ତାହା ବିକ୍ରି କରି ଏକ ସାଧାରଣ ଜୀବନଯାପନ ବାଛିଥିଲେ। ଅଧିକାଂଶ ଟଙ୍କା ସେ ବନ୍ଧୁ ଓ ପରିବାରକୁ ଦେଇ ଦେଇଥିଲେ। ନିଜ ବାକି ଟଙ୍କାରେ ସେ ଏକ ହିପ ଅପରେସନ କରିଥିଲେ ଓ ଭାର୍ଜିନ ମେରୀଙ୍କ ପାଇଁ ଏକ ଧର୍ମାସ୍ଥଳୀ ତିଆରି କରି ନିଜର କୃତଜ୍ଞତା ପ୍ରକାଶ କରିଥିଲେ।
୨୦୧୬ ମସିହାରେ ୮୬ ବର୍ଷ ବୟସରେ ତାଙ୍କର ମୃତ୍ୟୁ ହୋଇଥିଲା। ତାଙ୍କ ଜୀବନ ଏକ ପ୍ରେରଣାଦାୟୀ ଉଦାହରଣ ଯେ ଜୀବନରେ ଅସମ୍ଭବ ପରିସ୍ଥିତିରୁ ମଧ୍ୟ ଆଶା ଓ ସଫଳତା ଖୋଜି ପାଇପାରେ।
