ଭୁବନେଶ୍ୱର,୭।୨(ବ୍ୟୁରୋ): ଭୁବନେଶ୍ୱର ପଳାଶପଲ୍ଲୀସ୍ଥିତ ନିଖିଳ ଉକତ୍ଳ ଶାରୀରିକ ଭିନ୍ନକ୍ଷମ କଲ୍ୟାଣ ମହାସଂଘ ତାଲିମ କେନ୍ଦ୍ରରେ ଯୌନ ଶୋଷଣ ଘଟଣାରେ ପୋଲିସ ମୁଖ୍ୟ ଅଭିଯୁକ୍ତ ତଥା ସଂଘ ସାଧାରଣ ସମ୍ପାଦକ ସୁରେଶ ଚନ୍ଦ୍ର ବେହେରାଙ୍କୁ ଥାନାରେ ବସାଇ ଶନିବାର ଦିନତମାମ ମାରାଥନ ଜେରା କରିଛି। ଏହି ସମୟରେ ପୋଲିସ ହାତରେ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ଲାଗିଥିବା ସୂଚନା ମିଳିଛି। ସୁରେଶଙ୍କ ଲିଙ୍କ୍ରେ ଆଉ ୫ଜଣ ବଡ଼ବଡ଼ିଆ ଏଥିରେ ସମ୍ପୃକ୍ତ ଥିବା ଜଣାପଡିବା ପରେ ପୋଲିସ ତାଙ୍କ ନିକଟରେ ପହଞ୍ଚତ୍ବାକୁ ଚେଷ୍ଟା କରିଛି। କେତେଜଣଙ୍କୁ ଉଠାଇ ଆଣି ରବିବାର ସାମ୍ନାସାମ୍ନି ଜେରା କରିପାରେ ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି। ତେବେ ପୋଲିସ ସୁରେଶଙ୍କୁ ଏପର୍ଯ୍ୟନ୍ତ ଗିରଫ ଦର୍ଶାଉ ନ ଥିବାରୁ ନାନା ଚର୍ଚ୍ଚା ଚାଲିଛି। ଶନିବାର ପୋଲିସ ସୁରେଶଙ୍କୁ ଧରିବାକୁ ନୟାଗଡ ଯାଇଥିବାବେଳେ ସେଠାରେ ବିରୋଧର ସମ୍ମୁଖୀନ ହୋଇଥିବା ସୂଚନା ମିଳିଛି। ସ୍ଥାନୀୟ ଅଞ୍ଚଳର ଜଣେ ରାଜନୈତିକ ବ୍ୟକ୍ତି ପୋଲିସ କାର୍ଯ୍ୟରେ ବାଧା ଦେଇଥିବା ସେଠାକାର ଲୋକଙ୍କଠାରୁ ଜଣାପଡିଛି। ତେଣୁ ଏହି ଘଟଣାରେ ପ୍ରଭାବଶାଳୀ ରାଜନେତାଙ୍କ ସମ୍ପୃକ୍ତି ଥିବା ମଧ୍ୟ ସନ୍ଦେହ କରାଯାଉଛି।
ସୂଚନା ଅନୁଯାୟୀ, ତାଲିମ କେନ୍ଦ୍ରରେ ଯୁବତୀ ଓ ମହିଳାଙ୍କୁ ଦୀର୍ଘଦିନ ହେବ ଯୌନ ଶୋଷଣ କରାଯାଉଥିଲା। ସେଠାକୁ ବହୁ ବଡବଡିଆ ବାବୁ ଓ ନେତା ଆସୁଥିବାବେଳେ ସେମାନଙ୍କୁ ଖୁସି କରିବାକୁ ସୁରେଶ ବାହାରୁ କର୍ଲଗାଲ ମଗାଉଥିଲେ। ନ ମିଳିଲେ ତାଲିମ୍ ନେଉଥିବା ଯୁବତୀ ଓ କର୍ମଚାରୀଙ୍କୁ ଟଙ୍କା ଲୋଭ ଦେଖାଇ ରାତି କାଟିବାକୁ ବାଧ୍ୟ କରାଯାଉଥିଲା। କଥା ନ ମାନିଲେ ନିର୍ଯାତନା ଦିଆଯିବା ସହ ତାଲିମ୍ କେନ୍ଦ୍ରରୁ ବାହାର କରିଦିଆଯାଉଥିଲା। ଘଟଣା ସଂକ୍ରାନ୍ତରେ ପୂର୍ବରୁ ଏୟାରପୋର୍ଟ ଥାନାରେ ଅଭିଯୋଗ ସତ୍ତ୍ୱେ ପୋଲିସ ଚୁପ୍ ବସିଥିଲା। ଏନେଇ ଏକ ଭିଡିଓ ଭାଇରାଲ ପରେ ସାରା ରାଜ୍ୟରେ ଆଲୋଡନ ସୃଷ୍ଟି ହୋଇଥିଲା। ଭିନ୍ନକ୍ଷମ କମିଶନ ନିଜଆଡୁ ମାମଲା ରୁଜୁ କରି ତଦନ୍ତ ନିର୍ଦ୍ଦେଶ ଦେଇଥିଲେ। ସେହିପରି କିଛିଦିନ ତଳେ ଜଣେ ଯୁବତୀଙ୍କ ଅଭିଯୋଗକ୍ରମେ ତାଲିମ କେନ୍ଦ୍ରର ଟେଲରିଂ ପ୍ରଶିକ୍ଷିକା ମଧୁମଞ୍ଜରୀ ଧଳଙ୍କୁ ପୋଲିସ ଗିରଫ କରିଥିଲା।
