ମହାକାଳପଡ଼ା, ୬ା୧୨ (ପ୍ରତାପ ଚନ୍ଦ୍ର ସ୍ବାଇଁ):କେନ୍ଦ୍ରାପଡ଼ା ଜିଲାରେ ପ୍ରସ୍ତାବିତ ଶିଳ୍ପ ପ୍ରତିଷ୍ଠା ପାଇଁ ଆଶା ସଞ୍ଚାର ହୋଇଛି। ଜିଲାର ମହାକାଳପଡ଼ା ବ୍ଲକର ଆର୍ସେଲର ମିତ୍ତଲ ନିପନ୍ ଷ୍ଟିଲ ଇଣ୍ଡିଆ ପକ୍ଷରୁ ବାର୍ଷିକ ହାରାହାରି ୨୪ ମେଟ୍ରିକ୍ ଟନ୍ ଇସ୍ପାତ ପ୍ରକଳ୍ପ ପ୍ରତିଷ୍ଠା ପାଇଁ ଓଡ଼ିଶା ଶିଳ୍ପ ଭିତ୍ତିଭୂମି ଉନ୍ନୟନ ନିଗମ ଦ୍ୱାରା ବତୀଘର ପଞ୍ଚାୟତ ମୌଜା ବଡ଼ଟୁବି ଏ .୩୮୩. ୮୪୪ ଡିସିମିଲ, ଭୂମି ଅର୍ଜନ ଆବଶ୍ୟକ ହେଉଛି। ନ୍ୟାୟ ଯୁକ୍ତ କ୍ଷତି ପୂରଣ ଅଧିକାର ଓ ଅର୍ଜନ ପୁନର୍ବାସ ଥଇଥାନ କ୍ଷେତ୍ରରେ ସ୍ବଚ୍ଛତା ଆଇନ ୨୦୧୩ର ୧୧ (୧) ଧାରାରେ ଭାରପ୍ରାପ୍ତ ହୋଇ ସରକାର ଏହା ଦ୍ୱାରା ପ୍ରଦତ୍ତ ଜମି ଅଧିଗ୍ରହଣ ପାଇଁ ପ୍ରାରମ୍ଭିକ ଅନୁସୂଚନା ଜାରି କରାଯାଇଛି। ଏହି ଜମି ଅଧିଗ୍ରହଣ କରାଗଲେ ଆର୍ସେଲର ମିତ୍ତଲ ଷ୍ଟିଲ ଇଣ୍ଡିଆ ପକ୍ଷରୁ କାରଖାନା ପ୍ରତିଷ୍ଠା ନିମନ୍ତେ କାର୍ଯ୍ୟକାରୀ କରିବ ବୋଲି କୁହାଯାଇଛି। ଓଡ଼ିଶା ସରକାରଙ୍କ ରାଜସ୍ବ ବିପର୍ଯ୍ୟୟ ପରିଚାଳନା ବିଭାଗ ଚିଠି ସଂଖ୍ୟା ୭୩୬୯/୧୩ା୩ା୨୪ ଜମି ଅଧିଗ୍ରହଣ ନିମନ୍ତେ ଧାରା ୮ (୨) ଅନୁମୋଦନ ହେଇଛି ବୋଲି ନୋଟିସରେ ଉଲ୍ଲେଖ ରହିଛି ବୋଲି ପଞ୍ଚାୟତ କାର୍ଯ୍ୟାଳୟ ଝୁଲାଇ ଦିଆଯାଇଛି ବୋଲି ଗୁରୁବାର ଦେଖିବକୁ ମିଳିଛି। ମିଳିଥିବା ସୂଚନା ଅନୁସାରେ, ବର୍ଷେ ପୂର୍ବେ ୨୦୨୩ ଡିସେମ୍ବର ୧୧ା୧୨ା୨୩ରେ ପର୍ଯ୍ୟାୟକ୍ରମେ ରାମନଗର, ଖରିନାସୀ ଓ ବତୀଘର ପଞ୍ଚାୟତରେ ଶିଳ୍ପ ପ୍ରତିଷ୍ଠା ପାଇଁ ରାଜସ୍ବ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଗ୍ରାମସଭା ଅନୁଷ୍ଠିତ ହୋଇଥିଲା। ଏହା ସଫଳ ହୋଇଥିଲା ବୋଲି ସ୍ଥାନୀୟ ଲୋକମାନଙ୍କ ପକ୍ଷରୁ ଗ୍ରାମସଭାକୁ ସମର୍ଥନ ମିଳିଥିଲା। ଏ ସଂକ୍ରାନ୍ତରେ କେନ୍ଦ୍ରାପଡ଼ା ଅତିରିକ୍ତ ଜିଲାପାଳ ନିଲୁ ମହାପାତ୍ରଙ୍କୁ ପଚାରିବାରେ ବତୀଘର ପଞ୍ଚାୟତ ଅଫିସରେ ନୋଟିସ ଜାରି କରାଯାଇଛି। ସରକାରଙ୍କ ଅନୁମୋଦନ ଓ ଜମି ଅଧିଗ୍ରହଣ ପାଇଁ ନୋଟିସ୍ ହୋଇଛି ବୋଲି ସେ କହିଛନ୍ତି।
