କଟକ ଅଫିସ,୨୩।୩: ଜଣେ ବିଚାରପତିଙ୍କ ଆଇନଗତ ଜ୍ଞାନ ଯଥେଷ୍ଟ ରହିଥିଲେ ସୁଦ୍ଧା ଯଦି ତାଙ୍କଠାରେ ସଚ୍ଚୋଟତା ବା ସାଧୁତାର ଅଭାବ ରହିବ ଏବଂ ତାଙ୍କ ଚରିତ୍ର ସନ୍ଦେହଜନକ ରହିବ ତେବେ ଏହା ନ୍ୟାୟ ବ୍ୟବସ୍ଥାର ସୁପରିଚାଳନା ପ୍ରତି ବିପଦ ବୋଲି ଓଡ଼ିଶା ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟରେ ଉଲ୍ଲେଖ କରିଛନ୍ତି। ତଳ କୋର୍ଟର ଜଣେ ବିଚାରପତିଙ୍କୁ ବାଧ୍ୟତାମୂଳକ ଅବସର ଘୋଷଣାକୁ ଖାରଜ କରିବା ନେଇ ହାଇକୋର୍ଟରେ ହୋଇଥିବା ମାମଲାର ଶୁଣାଣି କରି ମୁଖ୍ୟ ବିଚାରପତି ଏସ୍.ମୁରଲୀଧର ଏବଂ ବିଚାରପତି ବି.ପି. ପାଣିଗ୍ରାହୀଙ୍କୁ ନେଇ ଗଠିତ ଖଣ୍ଡପୀଠ ଏହି ରାୟ ଶୁଣାଇବା ସହ ଆବେଦନକୁ ଖାରଜ କରିଦେଇଛନ୍ତି।
ରାମଚନ୍ଦ୍ର ମହାନ୍ତି କୋରାପୁଟ ସିଭିଲ୍ ଜଜ୍(ସିନିୟର ଡିଭିଜନ) ଭାବେ କାର୍ଯ୍ୟ କରୁଥିବାବେଳେ ତାଙ୍କ ବିରୋଧରେ ବହୁ ଅନିୟମିତତା ଅଭିଯୋଗ ଆସିଥିଲା। ଏହାର ପ୍ରମାଣ ମିଳିବା ପରେ ୨୦୧୦ ମାର୍ଚ୍ଚ ୨୨ରେ ଆଇନ ବିଭାଗ ପକ୍ଷରୁ ତାଙ୍କୁ ବାଧ୍ୟତାମୂଳକ ଅବସର ଦିଆଯାଇଥିଲା। ତାଙ୍କ କାର୍ଯ୍ୟକାଳ ସମୟରେ ୨ଟି ବିଭାଗୀୟ କାର୍ଯ୍ୟାନୁଷ୍ଠାନ ତାଙ୍କ ବିରୋଧରେ ଆରମ୍ଭ ହୋଇଥିଲା। ୨୦୦୩ରେ ସରକାରୀ କ୍ୱାର୍ଟର୍ସକୁ ବେଆଇନଭାବେ ନିଜ ଅଧୀନରେ ରଖିବା ଏବଂ ବଲାଙ୍ଗୀର ଜଜ୍ଶିପ୍ ପାଇଁ ଲ’ ଜର୍ନାଲ କିଣାରେ ଜାଣିଶୁଣି ଟଙ୍କା ପ୍ରଦାନ କରିବାରେ ବିଳମ୍ବ କରିବା ଅଭିଯୋଗ ହୋଇଥିଲା, ଯାହାକି ଓଡ଼ିଶା ଗଭର୍ନମେଣ୍ଟ ସର୍ଭ୍ୟାଣ୍ଟ କଣ୍ଡକ୍ଟ ରୁଲ୍ସ-୧୯୫୯ର ରୁଲ ୩ ଏବଂ ୪ର ବିରୁଦ୍ଧାଚରଣ। ଏପରି କି ସେ ଜଣେ ଚତୁର୍ଥ ଶ୍ରେଣୀ କର୍ମଚାରୀଙ୍କ ଅଗୋଚରରେ ତାଙ୍କ ନାମରେ ଏକ ଋଣ ଉଠାଇ ନେଇଥିଲେ। ପରବର୍ତ୍ତୀ ସମୟରେ ଏନେଇ ଜଣାପଡ଼ିବା ପରେ ଅଭିଯୋଗ ହେବା ପର୍ଯ୍ୟନ୍ତ ମଧ୍ୟ ଋଣ ପଇଠ କରି ନ ଥିଲେ। ସମ୍ବିଧାନର ଧାରା ୨୩୫ ଅନୁଯାୟୀ ରାଜ୍ୟରେ ଥିବା ତଳ କୋର୍ଟର ବିଚାରପତିମାନେ ହାଇକୋର୍ଟଙ୍କ ପ୍ରଶାସନିକ ବ୍ୟବସ୍ଥା ଅଧୀନରେ କାର୍ଯ୍ୟ କରନ୍ତି। ସେମାନେ ଅନ୍ୟ ସରକାରୀ ଅଧିକାରୀଙ୍କ ଠାରୁ ଭିନ୍ନ। ଅନ୍ୟ ସେବାରେ ଥିବା ଅଧିକାରୀଙ୍କ ବିରୋଧରେ କୌଣସି ଅଭିଯୋଗ ଆସିଲେ ସେମାନଙ୍କ ସର୍ଭିସ ରେକର୍ଡରେ ନାଲି ଦାଗ ରହିଯାଉଛି। ତେଣୁ ଜଣେ ବିଚାରବିଭାଗୀୟ ଅଧିକାରୀ ସବୁବେଳେ ନିଜ କାର୍ଯ୍ୟରେ ସ୍ବଚ୍ଛତା ଅବଲମ୍ବନ କରିବା ଆବଶ୍ୟକ। ଅସାଧୁତା, ଦୁର୍ନୀତି ହଟାଇବା ଉଦ୍ଦେଶ୍ୟରେ ମହାନ୍ତିଙ୍କୁ ବାଧ୍ୟତାମୂଳକ ଅବସର ଦିଆଯାଇଥିଲା। ଯଦି କୌଣସି ସଚ୍ଚୋଟ ଅଧିକାରୀଙ୍କୁ ବାଧ୍ୟତାମୂଳକ ଅବସର ଦିଆଯାଏ, ତେବେ ଅନ୍ୟ ସହଯୋଗୀଙ୍କ ମନୋବଳକୁ ହ୍ରାସ କରିବ। ଅପରପକ୍ଷରେ ଜଣେ ବିଚାରପତିଙ୍କ ଉତ୍ତମ ଆଇନ ଜ୍ଞାନ ରହିଥିଲେ ସୁଦ୍ଧା ଯଦି ସେ ଅସାଧୁ ଉପାୟ ଅବଲମ୍ବନ କରିବେ, ତେବେ ଏହା ବିଚାରପ୍ରକ୍ରିୟା ପ୍ରତି ବିପଦ ବୋଲି ଦର୍ଶାଇ ଖଣ୍ଡପୀଠ ମହାନ୍ତିଙ୍କ ଆବଦେନକୁ ଖାରଜ କରିଦେଇଛନ୍ତି।
