ଝୁମ୍ପୁରା,୨ା୯(ଡି.ଏନ.ଏ.)- କେନ୍ଦୁଝର ଜିଲା ଝୁମ୍ପୁରା ବ୍ଲକ କାର୍ଯ୍ୟାଳୟ ନିକଟରେ କାନପୁର ବୃହତ ଜଳସେଚନ ପ୍ରକଳ୍ପର ଗୋଟିଏ ପାର୍ଶ୍ୱର ମୁଖ୍ୟ କେନାଲ ଅତିକ୍ରମ କରୁଛି। ଏହି ସ୍ଥାନରେ ରାସ୍ତା ଉପରେ ପୋଲ ନିର୍ମାଣ ଲାଗି ଟେଣ୍ଡର ହୋଇଥିଲା। ମାତ୍ର ପୋଲ ନିର୍ମାଣ କେବଳ ଫାଉଣ୍ଡେଶନ ଖୋଳିବାରେ ସୀମିତ ରହିଯାଇଛି। ୨ ବର୍ଷ ବିତି ଯାଇଥିଲେ ମଧ୍ୟ କାମ ଆଗେଇ ପାରୁନାହିଁ। ଝୁମ୍ପୁରା-ଉଖୁଣ୍ଡା ରାସ୍ତାକୁ ଅତିକ୍ରମ କରୁଥିବା କେନାଲ ଖୋଳା ମଧ୍ୟ ସରିଯାଇଛି। ଗୋଟିଏ ପାର୍ଶ୍ୱରେ କେନାଲ ଗାଢ଼, ଅନ୍ୟ ପାର୍ଶ୍ୱରେ ପୋଲ ଫାଉଣ୍ଡେଶନ ଗାଢ, ମଝିରେ ଡାଇଭର୍ସନ ରାସ୍ତା ବିପଦସଙ୍କୁଳ ହୋଇପଡ଼ିଛି। ଡାଇଭର୍ସନ ରାସ୍ତା ମଧ୍ୟ ପିଚୁ କରାଯାଇ ନ ଥିବାରୁ ତାହା କାଦୁଅ ପଚ ପଚ ହୋଇଛି। ଏବେ ଏହି ଡାଇଭର୍ସନ ରାସ୍ତାର ଦୁଇ ପାର୍ଶ୍ୱରୁ ମାଟି ଧସିବା ଆରମ୍ଭ ହୋଇଛି। ଫଳରେ ଝୁମ୍ପୁରା ବ୍ଲକ ଓ ତହସିଲ କାର୍ଯ୍ୟାଳୟ ତଥା ବଜାରକୁ ସଂଯୋଗ କରୁଥିବା ଝୁମ୍ପୁରା- ଉଖୁଣ୍ଡା ରାସ୍ତା ବିଚ୍ଛିନ୍ନ ହେବାର ଆଶଙ୍କା ସୃଷ୍ଟି ହୋଇଛି। ରାସ୍ତା ସଂଯୋଗ ବିଚ୍ଛିନ୍ନ ହେଲେ ଝୁମ୍ପୁରା ବ୍ଲକର ୧୦ଟି ପଞ୍ଚାୟତର ଗ୍ରାମବାସୀ ଝୁମ୍ପୁରାକୁ ଯାତାୟାତ ପାଇଁ ଘୋର ଅସୁବିଧାର ସମ୍ମୁଖୀନ ହେବେ। ଏନେଇ ବିଭାଗୀୟ କାର୍ଯ୍ୟାଳୟରେ ବାରମ୍ବାର ଅଭିଯୋଗ ପରେ ମଧ୍ୟ କୋଭିଡ୍ର ଆଳ ଦେଖାଇ କାମ ବନ୍ଦ ଅଛି ବୋଲି ପୂର୍ତ୍ତ ବିଭାଗ ପକ୍ଷରୁ ସଫେଇ ଦିଆଯାଉଛି।
ସୂଚନା ଅନୁଯାୟୀ, ପ୍ରଥମ ଟେଣ୍ଡରର ଏଷ୍ଟିମେଟ ଉପରେ ଫାଉଣ୍ଡେଶନ ଧସିବାରୁ ପୋଲର ଡିଜାଇନ ବଦଳାଗଲା। ଡିଜାଇନ ବଦଳିବା ପରେ ଟେଣ୍ଡର ମଧ୍ୟ ସରିଛି। ବ୍ୟୟ ଅଟକଳ ୭କୋଟିରୁ ଊର୍ଦ୍ଧ୍ୱ ଟଙ୍କା ରହିଛି। ଜଳସମ୍ପଦ ବିଭାଗ ଟଙ୍କା ମଧ୍ୟ ପ୍ଲେସମେଟ କରିସାରିଛି। ହେଲେ ପୋଲ ନିର୍ମାଣ କାମ କାହିଁକି ଅଟକିଛି ବୁଝାପଡୁନାହିଁ। ପୁଣି ଡାଇଭର୍ସନ ରାସ୍ତା ପିଚୁ କରାଯିବା ନେଇ ଏଷ୍ଟିମେଟରେ ରହିଥିଲେ ହେଁ ତାହା କରାଯାଉ ନାହିଁ। ଡାଇଭର୍ସନ ପାର୍ଶ୍ୱରେ ସୁରକ୍ଷା ଗାର୍ଡ ମଧ୍ୟ ନାହିଁ। ଏସମ୍ପର୍କରେ ପୋଲ ନିର୍ମାଣ ଦାୟିତ୍ୱରେ ଥିବା ପୂର୍ତ୍ତ ବିଭାଗ ଯନ୍ତ୍ରୀ ଅଭିମନ୍ୟୁ ନାଏକଙ୍କୁ ପଚାରିବାରୁ ଟେଣ୍ଡରଧାରୀ ଆସିଲେ ହିଁ କାମ ଆରମ୍ଭ ହୋଇଯିବ ବୋଲି କହିଛନ୍ତି।
